Saturday, June 12, 2010

කෙවට්‌ටසුත්‌තං

11. කෙවට්‌ටසුත්‌තං

මෙම සුත්‍ර දේශනාවේ සිංහල පරිවර්තනයට මෙතැනින් පිවිසෙන්න

සිංහල පරිවර්ථනය සදහා ‍font මෙතැනින් ලබාගන්න

කෙවට්‌ටගහපතිපුත්‌තවත්‌ථු

481. එවං මෙ සුතං – එකං සමයං භගවා නාළන්‌දායං විහරති පාවාරිකම්‌බවනෙ. අථ ඛො කෙවට්‌ටො ගහපතිපුත්‌තො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො කෙවට්‌ටො ගහපතිපුත්‌තො භගවන්‌තං එතදවොච – ‘‘අයං, භන්‌තෙ, නාළන්‌දා ඉද්‌ධා චෙව ඵීතා ච බහුජනා ආකිණ්‌ණමනුස්‌සා භගවති අභිප්‌පසන්‌නා. සාධු, භන්‌තෙ, භගවා එකං භික්‌ඛුං සමාදිසතු, යො උත්‌තරිමනුස්‌සධම්‌මා, ඉද්‌ධිපාටිහාරියං කරිස්‌සති; එවායං නාළන්‌දා භිය්‍යොසො මත්‌තාය භගවති අභිප්‌පසීදිස්‌සතී’’ති. එවං වුත්‌තෙ, භගවා කෙවට්‌ටං ගහපතිපුත්‌තං එතදවොච – ‘‘න ඛො අහං, කෙවට්‌ට, භික්‌ඛූනං එවං ධම්‌මං දෙසෙමි – එථ තුම්‌හෙ, භික්‌ඛවෙ, ගිහීනං ඔදාතවසනානං උත්‌තරිමනුස්‌සධම්‌මා ඉද්‌ධිපාටිහාරියං කරොථා’’ති.

482. දුතියම්‌පි ඛො කෙවට්‌ටො ගහපතිපුත්‌තො භගවන්‌තං එතදවොච – ‘‘නාහං, භන්‌තෙ, භගවන්‌තං ධංසෙමි; අපි ච, එවං වදාමි – ‘අයං, භන්‌තෙ, නාළන්‌දා ඉද්‌ධා චෙව ඵීතා ච බහුජනා ආකිණ්‌ණමනුස්‌සා භගවති අභිප්‌පසන්‌නා. සාධු, භන්‌තෙ, භගවා එකං භික්‌ඛුං සමාදිසතු, යො උත්‌තරිමනුස්‌සධම්‌මා ඉද්‌ධිපාටිහාරියං කරිස්‌සති; එවායං නාළන්‌දා භිය්‍යොසො මත්‌තාය භගවති අභිප්‌පසීදිස්‌සතී’’’ති. දුතියම්‌පි ඛො භගවා කෙවට්‌ටං ගහපතිපුත්‌තං එතදවොච – ‘‘න ඛො අහං, කෙවට්‌ට, භික්‌ඛූනං එවං ධම්‌මං දෙසෙමි – එථ තුම්‌හෙ, භික්‌ඛවෙ, ගිහීනං ඔදාතවසනානං උත්‌තරිමනුස්‌සධම්‌මා ඉද්‌ධිපාටිහාරියං කරොථා’’’ති.

තතියම්‌පි ඛො කෙවට්‌ටො ගහපතිපුත්‌තො භගවන්‌තං එතදවොච – ‘‘නාහං, භන්‌තෙ, භගවන්‌තං ධංසෙමි; අපි ච, එවං වදාමි – ‘අයං, භන්‌තෙ, නාළන්‌දා ඉද්‌ධා චෙව ඵීතා ච බහුජනා ආකිණ්‌ණමනුස්‌සා භගවති අභිප්‌පසන්‌නා. සාධු, භන්‌තෙ, භගවා එකං භික්‌ඛුං සමාදිසතු, යො උත්‌තරිමනුස්‌සධම්‌මා ඉද්‌ධිපාටිහාරියං කරිස්‌සති. එවායං නාළන්‌දා භිය්‍යොසො මත්‌තාය භගවති අභිප්‌පසීදිස්‌සතී’ති.

ඉද්‌ධිපාටිහාරියං

483. ‘‘තීණි ඛො ඉමානි, කෙවට්‌ට, පාටිහාරියානි මයා සයං අභිඤ්‌ඤා සච්‌ඡිකත්‌වා පවෙදිතානි. කතමානි තීණි? ඉද්‌ධිපාටිහාරියං, ආදෙසනාපාටිහාරියං , අනුසාසනීපාටිහාරියං.

484. ‘‘කතමඤ්‌ච, කෙවට්‌ට, ඉද්‌ධිපාටිහාරියං? ඉධ, කෙවට්‌ට, භික්‌ඛු අනෙකවිහිතං ඉද්‌ධිවිධං පච්‌චනුභොති. එකොපි හුත්‌වා බහුධා හොති, බහුධාපි හුත්‌වා එකො හොති; ආවිභාවං තිරොභාවං තිරොකුට්‌ටං තිරොපාකාරං තිරොපබ්‌බතං අසජ්‌ජමානො ගච්‌ඡති සෙය්‍යථාපි ආකාසෙ; පථවියාපි උම්‌මුජ්‌ජනිමුජ්‌ජං කරොති සෙය්‍යථාපි උදකෙ; උදකෙපි අභිජ්‌ජමානෙ ගච්‌ඡති සෙය්‍යථාපි පථවියං; ආකාසෙපි පල්‌ලඞ්‌කෙන කමති සෙය්‍යථාපි පක්‌ඛී සකුණො; ඉමෙපි චන්‌දිමසූරියෙ එවං මහිද්‌ධිකෙ එවං මහානුභාවෙ පාණිනා පරාමසති පරිමජ්‌ජති; යාව බ්‍රහ්‌මලොකාපි කායෙන වසං වත්‌තෙති.

‘‘තමෙනං අඤ්‌ඤතරො සද්‌ධො පසන්‌නො පස්‌සති තං භික්‌ඛුං අනෙකවිහිතං ඉද්‌ධිවිධං පච්‌චනුභොන්‌තං – එකොපි හුත්‌වා බහුධා හොන්‌තං, බහුධාපි හුත්‌වා එකො හොන්‌තං; ආවිභාවං තිරොභාවං; තිරොකුට්‌ටං තිරොපාකාරං තිරොපබ්‌බතං අසජ්‌ජමානං ගච්‌ඡන්‌තං සෙය්‍යථාපි ආකාසෙ; පථවියාපි උම්‌මුජ්‌ජනිමුජ්‌ජං කරොන්‌තං සෙය්‍යථාපි උදකෙ; උදකෙපි අභිජ්‌ජමානෙ ගච්‌ඡන්‌තං සෙය්‍යථාපි පථවියං; ආකාසෙපි පල්‌ලඞ්‌කෙන කමන්‌තං සෙය්‍යථාපි පක්‌ඛී සකුණො; ඉමෙපි චන්‌දිමසූරියෙ එවං මහිද්‌ධිකෙ එවං මහානුභාවෙ පාණිනා පරාමසන්‌තං පරිමජ්‌ජන්‌තං යාව බ්‍රහ්‌මලොකාපි කායෙන වසං වත්‌තෙන්‌තං.

‘‘තමෙනං සො සද්‌ධො පසන්‌නො අඤ්‌ඤතරස්‌ස අස්‌සද්‌ධස්‌ස අප්‌පසන්‌නස්‌ස ආරොචෙති – ‘අච්‌ඡරියං වත, භො, අබ්‌භුතං වත, භො, සමණස්‌ස මහිද්‌ධිකතා මහානුභාවතා. අමාහං භික්‌ඛුං අද්‌දසං අනෙකවිහිතං ඉද්‌ධිවිධං පච්‌චනුභොන්‌තං – එකොපි හුත්‌වා බහුධා හොන්‌තං, බහුධාපි හුත්‌වා එකො හොන්‌තං…පෙ.… යාව බ්‍රහ්‌මලොකාපි කායෙන වසං වත්‌තෙන්‌ත’න්‌ති.

‘‘තමෙනං සො අස්‌සද්‌ධො අප්‌පසන්‌නො තං සද්‌ධං පසන්‌නං එවං වදෙය්‍ය – ‘අත්‌ථි ඛො, භො, ගන්‌ධාරී නාම විජ්‌ජා. තාය සො භික්‌ඛු අනෙකවිහිතං ඉද්‌ධිවිධං පච්‌චනුභොති – එකොපි හුත්‌වා බහුධා හොති, බහුධාපි හුත්‌වා එකො හොති…පෙ.… යාව බ්‍රහ්‌මලොකාපි කායෙන වසං වත්‌තෙතී’ති.

‘‘තං කිං මඤ්‌ඤසි, කෙවට්‌ට, අපි නු සො අස්‌සද්‌ධො අප්‌පසන්‌නො තං සද්‌ධං පසන්‌නං එවං වදෙය්‍යා’’ති? ‘‘වදෙය්‍ය, භන්‌තෙ’’ති. ‘‘ඉමං ඛො අහං, කෙවට්‌ට, ඉද්‌ධිපාටිහාරියෙ ආදීනවං සම්‌පස්‌සමානො ඉද්‌ධිපාටිහාරියෙන අට්‌ටීයාමි හරායාමි ජිගුච්‌ඡාමි’’.

ආදෙසනාපාටිහාරියං

485. ‘‘කතමඤ්‌ච, කෙවට්‌ට, ආදෙසනාපාටිහාරියං? ඉධ, කෙවට්‌ට, භික්‌ඛු පරසත්‌තානං පරපුග්‌ගලානං චිත්‌තම්‌පි ආදිසති, චෙතසිකම්‌පි ආදිසති, විතක්‌කිතම්‌පි ආදිසති, විචාරිතම්‌පි ආදිසති – ‘එවම්‌පි තෙ මනො, ඉත්‌ථම්‌පි තෙ මනො, ඉතිපි තෙ චිත්‌ත’න්‌ති.

‘‘තමෙනං අඤ්‌ඤතරො සද්‌ධො පසන්‌නො පස්‌සති තං භික්‌ඛුං පරසත්‌තානං පරපුග්‌ගලානං චිත්‌තම්‌පි ආදිසන්‌තං, චෙතසිකම්‌පි ආදිසන්‌තං, විතක්‌කිතම්‌පි ආදිසන්‌තං, විචාරිතම්‌පි ආදිසන්‌තං – ‘එවම්‌පි තෙ මනො, ඉත්‌ථම්‌පි තෙ මනො, ඉතිපි තෙ චිත්‌ත’න්‌ති. තමෙනං සො සද්‌ධො පසන්‌නො අඤ්‌ඤතරස්‌ස අස්‌සද්‌ධස්‌ස අප්‌පසන්‌නස්‌ස ආරොචෙති – ‘අච්‌ඡරියං වත, භො, අබ්‌භුතං වත, භො, සමණස්‌ස මහිද්‌ධිකතා මහානුභාවතා. අමාහං භික්‌ඛුං අද්‌දසං පරසත්‌තානං පරපුග්‌ගලානං චිත්‌තම්‌පි ආදිසන්‌තං, චෙතසිකම්‌පි ආදිසන්‌තං, විතක්‌කිතම්‌පි ආදිසන්‌තං, විචාරිතම්‌පි ආදිසන්‌තං – ‘‘එවම්‌පි තෙ මනො, ඉත්‌ථම්‌පි තෙ මනො, ඉතිපි තෙ චිත්‌ත’’’න්‌ති.

‘‘තමෙනං සො අස්‌සද්‌ධො අප්‌පසන්‌නො තං සද්‌ධං පසන්‌නං එවං වදෙය්‍ය – ‘අත්‌ථි ඛො, භො, මණිකා නාම විජ්‌ජා; තාය සො භික්‌ඛු පරසත්‌තානං පරපුග්‌ගලානං චිත්‌තම්‌පි ආදිසති, චෙතසිකම්‌පි ආදිසති, විතක්‌කිතම්‌පි ආදිසති, විචාරිතම්‌පි ආදිසති – ‘එවම්‌පි තෙ මනො, ඉත්‌ථම්‌පි තෙ මනො, ඉතිපි තෙ චිත්‌ත’’’න්‌ති.

‘‘තං කිං මඤ්‌ඤසි, කෙවට්‌ට, අපි නු සො අස්‌සද්‌ධො අප්‌පසන්‌නො තං සද්‌ධං පසන්‌නං එවං වදෙය්‍යා’’ති ? ‘‘වදෙය්‍ය, භන්‌තෙ’’ති. ‘‘ඉමං ඛො අහං, කෙවට්‌ට, ආදෙසනාපාටිහාරියෙ ආදීනවං සම්‌පස්‌සමානො ආදෙසනාපාටිහාරියෙන අට්‌ටීයාමි හරායාමි ජිගුච්‌ඡාමි’’.

අනුසාසනීපාටිහාරියං

486. ‘‘කතමඤ්‌ච, කෙවට්‌ට, අනුසාසනීපාටිහාරියං? ඉධ, කෙවට්‌ට, භික්‌ඛු එවමනුසාසති – ‘එවං විතක්‌කෙථ, මා එවං විතක්‌කයිත්‌ථ, එවං මනසිකරොථ, මා එවං මනසාකත්‌ථ, ඉදං පජහථ, ඉදං උපසම්‌පජ්‌ජ විහරථා’ති. ඉදං වුච්‌චති, කෙවට්‌ට, අනුසාසනීපාටිහාරියං.

‘‘පුන චපරං, කෙවට්‌ට, ඉධ තථාගතො ලොකෙ උප්‌පජ්‌ජති අරහං සම්‌මාසම්‌බුද්‌ධො …පෙ.… (යථා 190-212 අනුච්‌ඡෙදෙසු එවං විත්‌ථාරෙතබ්‌බං). එවං ඛො, කෙවට්‌ට, භික්‌ඛු සීලසම්‌පන්‌නො හොති…පෙ.… පඨමං ඣානං උපසම්‌පජ්‌ජ විහරති. ඉදම්‌පි වුච්‌චති, කෙවට්‌ට, අනුසාසනීපාටිහාරියං…පෙ.… දුතියං ඣානං…පෙ.… තතියං ඣානං…පෙ.… චතුත්‌ථං ඣානං උපසම්‌පජ්‌ජ විහරති. ඉදම්‌පි වුච්‌චති, කෙවට්‌ට, අනුසාසනීපාටිහාරියං…පෙ.… ඤාණදස්‌සනාය චිත්‌තං අභිනීහරතිඅභිනින්‌නාමෙති…පෙ.… ඉදම්‌පි වුච්‌චති, කෙවට්‌ට, අනුසාසනීපාටිහාරියං…පෙ.… නාපරං ඉත්‌ථත්‌තායාති පජානාති…පෙ.… ඉදම්‌පි වුච්‌චති, කෙවට්‌ට, අනුසාසනීපාටිහාරියං.

‘‘ඉමානි ඛො, කෙවට්‌ට, තීණි පාටිහාරියානි මයා සයං අභිඤ්‌ඤා සච්‌ඡිකත්‌වා පවෙදිතානි’’.

භූතනිරොධෙසකභික්‌ඛුවත්‌ථු

487. ‘‘භූතපුබ්‌බං, කෙවට්‌ට, ඉමස්‌මිඤ්‌ඤෙව භික්‌ඛුසඞ්‌ඝෙ අඤ්‌ඤතරස්‌ස භික්‌ඛුනො එවං චෙතසො පරිවිතක්‌කො උදපාදි – ‘කත්‌ථ නු ඛො ඉමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති?

488. ‘‘අථ ඛො සො, කෙවට්‌ට, භික්‌ඛු තථාරූපං සමාධිං සමාපජ්‌ජි, යථාසමාහිතෙ චිත්‌තෙ දෙවයානියො මග්‌ගො පාතුරහොසි. අථ ඛො සො, කෙවට්‌ට, භික්‌ඛු යෙන චාතුමහාරාජිකා දෙවා තෙනුපසඞ්‌කමි; උපසඞ්‌කමිත්‌වා චාතුමහාරාජිකෙ දෙවෙ එතදවොච – ‘කත්‌ථ නු ඛො, ආවුසො, ඉමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති?

‘‘එවං වුත්‌තෙ, කෙවට්‌ට, චාතුමහාරාජිකා දෙවා තං භික්‌ඛුං එතදවොචුං – ‘මයම්‌පි ඛො, භික්‌ඛු, න ජානාම, යත්‌ථිමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූති [වායොධාතු. අත්‌ථි ඛො (පී. එවමුපරිපි)]. අත්‌ථි ඛො [වායොධාතු. අත්‌ථි ඛො (පී. එවමුපරිපි)], භික්‌ඛු, චත්‌තාරො මහාරාජානො අම්‌හෙහි අභික්‌කන්‌තතරා ච පණීතතරා ච. තෙ ඛො එතං ජානෙය්‍යුං, යත්‌ථිමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති.

489. ‘‘අථ ඛො සො, කෙවට්‌ට, භික්‌ඛු යෙන චත්‌තාරො මහාරාජානො තෙනුපසඞ්‌කමි; උපසඞ්‌කමිත්‌වා චත්‌තාරො මහාරාජෙ එතදවොච – ‘කත්‌ථ නු ඛො, ආවුසො, ඉමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති? එවං වුත්‌තෙ, කෙවට්‌ට, චත්‌තාරො මහාරාජානො තං භික්‌ඛුං එතදවොචුං – ‘මයම්‌පි ඛො, භික්‌ඛු, න ජානාම, යත්‌ථිමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු, ආපොධාතු තෙජොධාතු වායොධාතූති. අත්‌ථි ඛො, භික්‌ඛු, තාවතිංසා නාම දෙවා අම්‌හෙහි අභික්‌කන්‌තතරා ච පණීතතරා ච. තෙ ඛො එතං ජානෙය්‍යුං, යත්‌ථිමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති.

490. ‘‘අථ ඛො සො, කෙවට්‌ට, භික්‌ඛු යෙන තාවතිංසා දෙවා තෙනුපසඞ්‌කමි; උපසඞ්‌කමිත්‌වා තාවතිංසෙ දෙවෙ එතදවොච – ‘කත්‌ථ නු ඛො, ආවුසො, ඉමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති? එවං වුත්‌තෙ, කෙවට්‌ට, තාවතිංසා දෙවා තං භික්‌ඛුං එතදවොචුං – ‘මයම්‌පි ඛො, භික්‌ඛු, න ජානාම, යත්‌ථිමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූති. අත්‌ථි ඛො, භික්‌ඛු, සක්‌කො නාම දෙවානමින්‌දො අම්‌හෙහි අභික්‌කන්‌තතරො ච පණීතතරො ච. සො ඛො එතං ජානෙය්‍ය, යත්‌ථිමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති.

491. ‘‘අථ ඛො සො, කෙවට්‌ට, භික්‌ඛු යෙන සක්‌කො දෙවානමින්‌දො තෙනුපසඞ්‌කමි; උපසඞ්‌කමිත්‌වා සක්‌කං දෙවානමින්‌දං එතදවොච – ‘කත්‌ථ නු ඛො, ආවුසො, ඉමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති? එවං වුත්‌තෙ, කෙවට්‌ට, සක්‌කො දෙවානමින්‌දො තං භික්‌ඛුං එතදවොච – ‘අහම්‌පි ඛො, භික්‌ඛු, න ජානාමි, යත්‌ථිමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූති. අත්‌ථි ඛො, භික්‌ඛු, යාමා නාම දෙවා…පෙ.… සුයාමො නාම දෙවපුත්‌තො… තුසිතා නාම දෙවා… සන්‌තුස්‌සිතො නාම දෙවපුත්‌තො… නිම්‌මානරතී නාම දෙවා … සුනිම්‌මිතො නාම දෙවපුත්‌තො… පරනිම්‌මිතවසවත්‌තී නාම දෙවා… වසවත්‌තී නාම දෙවපුත්‌තො අම්‌හෙහි අභික්‌කන්‌තතරො ච පණීතතරො ච. සො ඛො එතං ජානෙය්‍ය, යත්‌ථිමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති.

492. ‘‘අථ ඛො සො, කෙවට්‌ට, භික්‌ඛු යෙන වසවත්‌තී දෙවපුත්‌තො තෙනුපසඞ්‌කමි; උපසඞ්‌කමිත්‌වා වසවත්‌තිං දෙවපුත්‌තං එතදවොච – ‘කත්‌ථ නු ඛො, ආවුසො, ඉමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති? එවං වුත්‌තෙ , කෙවට්‌ට, වසවත්‌තී දෙවපුත්‌තො තං භික්‌ඛුං එතදවොච – ‘අහම්‌පි ඛො, භික්‌ඛු, න ජානාමි යත්‌ථිමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූති. අත්‌ථි ඛො, භික්‌ඛු, බ්‍රහ්‌මකායිකා නාම දෙවා අම්‌හෙහි අභික්‌කන්‌තතරා ච පණීතතරා ච. තෙ ඛො එතං ජානෙය්‍යුං, යත්‌ථිමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති.

493. ‘‘අථ ඛො සො, කෙවට්‌ට, භික්‌ඛු තථාරූපං සමාධිං සමාපජ්‌ජි, යථාසමාහිතෙ චිත්‌තෙ බ්‍රහ්‌මයානියො මග්‌ගො පාතුරහොසි. අථ ඛො සො, කෙවට්‌ට, භික්‌ඛු යෙන බ්‍රහ්‌මකායිකා දෙවා තෙනුපසඞ්‌කමි; උපසඞ්‌කමිත්‌වා බ්‍රහ්‌මකායිකෙ දෙවෙ එතදවොච – ‘කත්‌ථ නු ඛො, ආවුසො, ඉමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති? එවං වුත්‌තෙ, කෙවට්‌ට, බ්‍රහ්‌මකායිකා දෙවා තං භික්‌ඛුං එතදවොචුං – ‘මයම්‌පි ඛො, භික්‌ඛු, න ජානාම, යත්‌ථිමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූති. අත්‌ථි ඛො, භික්‌ඛු, බ්‍රහ්‌මා මහාබ්‍රහ්‌මා අභිභූ අනභිභූතො අඤ්‌ඤදත්‌ථුදසො වසවත්‌තී ඉස්‌සරො කත්‌තා නිම්‌මාතා සෙට්‌ඨො සජිතා වසී පිතා භූතභබ්‍යානං අම්‌හෙහි අභික්‌කන්‌තතරො ච පණීතතරො ච. සො ඛො එතං ජානෙය්‍ය, යත්‌ථිමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’’ති.

‘‘‘කහං පනාවුසො, එතරහි සො මහාබ්‍රහ්‌මා’ති? ‘මයම්‌පි ඛො, භික්‌ඛු, න ජානාම, යත්‌ථ වා බ්‍රහ්‌මා යෙන වා බ්‍රහ්‌මා යහිං වා බ්‍රහ්‌මා; අපි ච, භික්‌ඛු, යථා නිමිත්‌තා දිස්‌සන්‌ති, ආලොකො සඤ්‌ජායති, ඔභාසො පාතුභවති, බ්‍රහ්‌මා පාතුභවිස්‌සති, බ්‍රහ්‌මුනො හෙතං පුබ්‌බනිමිත්‌තං පාතුභාවාය, යදිදං ආලොකො සඤ්‌ජායති, ඔභාසො පාතුභවතී’ති. අථ ඛො සො, කෙවට්‌ට, මහාබ්‍රහ්‌මා නචිරස්‌සෙව පාතුරහොසි .

494. ‘‘අථ ඛො සො, කෙවට්‌ට, භික්‌ඛු යෙන සො මහාබ්‍රහ්‌මා තෙනුපසඞ්‌කමි; උපසඞ්‌කමිත්‌වා තං මහාබ්‍රහ්‌මානං එතදවොච – ‘කත්‌ථ නු ඛො, ආවුසො, ඉමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’’ති? එවං වුත්‌තෙ, කෙවට්‌ට, සො මහාබ්‍රහ්‌මා තං භික්‌ඛුං එතදවොච – ‘අහමස්‌මි, භික්‌ඛු, බ්‍රහ්‌මා මහාබ්‍රහ්‌මා අභිභූ අනභිභූතො අඤ්‌ඤදත්‌ථුදසො වසවත්‌තී ඉස්‌සරො කත්‌තා නිම්‌මාතා සෙට්‌ඨො සජිතා වසී පිතා භූතභබ්‍යාන’න්‌ති.

‘‘දුතියම්‌පි ඛො සො, කෙවට්‌ට, භික්‌ඛු තං මහාබ්‍රහ්‌මානං එතදවොච – ‘න ඛොහං තං, ආවුසො, එවං පුච්‌ඡාමි – ‘‘ත්‌වමසි බ්‍රහ්‌මා මහාබ්‍රහ්‌මා අභිභූ අනභිභූතො අඤ්‌ඤදත්‌ථුදසො වසවත්‌තී ඉස්‌සරො කත්‌තා නිම්‌මාතා සෙට්‌ඨො සජිතා වසී පිතා භූතභබ්‍යාන’’න්‌ති. එවඤ්‌ච ඛො අහං තං, ආවුසො, පුච්‌ඡාමි – ‘‘කත්‌ථ නු ඛො, ආවුසො, ඉමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’’’ති?

‘‘දුතියම්‌පි ඛො සො, කෙවට්‌ට, මහාබ්‍රහ්‌මා තං භික්‌ඛුං එතදවොච – ‘අහමස්‌මි, භික්‌ඛු, බ්‍රහ්‌මා මහාබ්‍රහ්‌මා අභිභූ අනභිභූතො අඤ්‌ඤදත්‌ථුදසො වසවත්‌තී ඉස්‌සරො කත්‌තා නිම්‌මාතා සෙට්‌ඨො සජිතා වසී පිතා භූතභබ්‍යාන’න්‌ති. තතියම්‌පි ඛො සො, කෙවට්‌ට, භික්‌ඛු තං මහාබ්‍රහ්‌මානං එතදවොච – ‘න ඛොහං තං, ආවුසො, එවං පුච්‌ඡාමි – ‘‘ත්‌වමසි බ්‍රහ්‌මා මහාබ්‍රහ්‌මා අභිභූ අනභිභූතො අඤ්‌ඤදත්‌ථුදසො වසවත්‌තී ඉස්‌සරො කත්‌තා නිම්‌මාතා සෙට්‌ඨො සජිතා වසී පිතා භූතභබ්‍යාන’’න්‌ති. එවඤ්‌ච ඛො අහං තං, ආවුසො, පුච්‌ඡාමි – ‘‘කත්‌ථ නු ඛො, ආවුසො, ඉමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’’’ති?

495. ‘‘අථ ඛො සො, කෙවට්‌ට, මහාබ්‍රහ්‌මා තං භික්‌ඛුං බාහායං ගහෙත්‌වා එකමන්‌තං අපනෙත්‌වා තං භික්‌ඛුං එතදවොච – ‘ඉමෙ ඛො මං, භික්‌ඛු, බ්‍රහ්‌මකායිකා දෙවා එවං ජානන්‌ති, ‘‘නත්‌ථි කිඤ්‌චි බ්‍රහ්‌මුනො අඤ්‌ඤාතං, නත්‌ථි කිඤ්‌චි බ්‍රහ්‌මුනො අදිට්‌ඨං, නත්‌ථි කිඤ්‌චි බ්‍රහ්‌මුනො අවිදිතං, නත්‌ථි කිඤ්‌චි බ්‍රහ්‌මුනො අසච්‌ඡිකත’’න්‌ති. තස්‌මාහං තෙසං සම්‌මුඛා න බ්‍යාකාසිං. අහම්‌පි ඛො, භික්‌ඛු, න ජානාමි යත්‌ථිමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූති. තස්‌මාතිහ, භික්‌ඛු, තුය්‌හෙවෙතං දුක්‌කටං, තුය්‌හෙවෙතං අපරද්‌ධං, යං ත්‌වං තං භගවන්‌තං අතිධාවිත්‌වා බහිද්‌ධා පරියෙට්‌ඨිං ආපජ්‌ජසි ඉමස්‌ස පඤ්‌හස්‌ස වෙය්‍යාකරණාය. ගච්‌ඡ ත්‌වං, භික්‌ඛු, තමෙව භගවන්‌තං උපසඞ්‌කමිත්‌වා ඉමං පඤ්‌හං පුච්‌ඡ, යථා ච තෙ භගවා බ්‍යාකරොති, තථා නං ධාරෙය්‍යාසී’ති.

496. ‘‘අථ ඛො සො, කෙවට්‌ට, භික්‌ඛු – සෙය්‍යථාපි නාම බලවා පුරිසො සමිඤ්‌ජිතං වා බාහං පසාරෙය්‍ය, පසාරිතං වා බාහං සමිඤ්‌ජෙය්‍ය එවමෙව බ්‍රහ්‌මලොකෙ අන්‌තරහිතො මම පුරතො පාතුරහොසි. අථ ඛො සො, කෙවට්‌ට, භික්‌ඛු මං අභිවාදෙත්‌වා එකමන්‌තං නිසීදි, එකමන්‌තං නිසින්‌නො ඛො, කෙවට්‌ට, සො භික්‌ඛු මං එතදවොච – ‘කත්‌ථ නු ඛො, භන්‌තෙ, ඉමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති?

තීරදස්‌සිසකුණුපමා

497. ‘‘එවං වුත්‌තෙ, අහං, කෙවට්‌ට, තං භික්‌ඛුං එතදවොචං – ‘භූතපුබ්‌බං, භික්‌ඛු, සාමුද්‌දිකා වාණිජා තීරදස්‌සිං සකුණං ගහෙත්‌වා නාවාය සමුද්‌දං අජ්‌ඣොගාහන්‌ති. තෙ අතීරදක්‌ඛිනියා නාවාය තීරදස්‌සිං සකුණං මුඤ්‌චන්‌ති. සො ගච්‌ඡතෙව පුරත්‌ථිමං දිසං, ගච්‌ඡති දක්‌ඛිණං දිසං, ගච්‌ඡති පච්‌ඡිමං දිසං, ගච්‌ඡති උත්‌තරං දිසං, ගච්‌ඡති උද්‌ධං දිසං, ගච්‌ඡති අනුදිසං. සචෙ සො සමන්‌තා තීරං පස්‌සති, තථාගතකොව [තථාපක්‌කන්‌තොව (ස්‍යා.)] හොති. සචෙ පන සො සමන්‌තා තීරං න පස්‌සති, තමෙව නාවං පච්‌චාගච්‌ඡති. එවමෙව ඛො ත්‌වං, භික්‌ඛු, යතො යාව බ්‍රහ්‌මලොකා පරියෙසමානො ඉමස්‌ස පඤ්‌හස්‌ස වෙය්‍යාකරණං නාජ්‌ඣගා, අථ මමඤ්‌ඤෙව සන්‌තිකෙ පච්‌චාගතො. න ඛො එසො, භික්‌ඛු, පඤ්‌හො එවං පුච්‌ඡිතබ්‌බො – ‘කත්‌ථ නු ඛො, භන්‌තෙ, ඉමෙ චත්‌තාරො මහාභූතා අපරිසෙසා නිරුජ්‌ඣන්‌ති, සෙය්‍යථිදං – පථවීධාතු ආපොධාතු තෙජොධාතු වායොධාතූ’ති?

498. ‘‘එවඤ්‌ච ඛො එසො, භික්‌ඛු, පඤ්‌හො පුච්‌ඡිතබ්‌බො –

‘කත්‌ථ ආපො ච පථවී, තෙජො වායො න ගාධති;

කත්‌ථ දීඝඤ්‌ච රස්‌සඤ්‌ච, අණුං ථූලං සුභාසුභං;

කත්‌ථ නාමඤ්‌ච රූපඤ්‌ච, අසෙසං උපරුජ්‌ඣතී’ති.

499. ‘‘තත්‍ර වෙය්‍යාකරණං භවති –

‘විඤ්‌ඤාණං අනිදස්‌සනං, අනන්‌තං සබ්‌බතොපභං;

එත්‌ථ ආපො ච පථවී, තෙජො වායො න ගාධති.

එත්‌ථ දීඝඤ්‌ච රස්‌සඤ්‌ච, අණුං ථූලං සුභාසුභං;

එත්‌ථ නාමඤ්‌ච රූපඤ්‌ච, අසෙසං උපරුජ්‌ඣති;

විඤ්‌ඤාණස්‌ස නිරොධෙන, එත්‌ථෙතං උපරුජ්‌ඣතී’ති.

500. ඉදමවොච භගවා. අත්‌තමනො කෙවට්‌ටො ගහපතිපුත්‌තො භගවතො භාසිතං අභිනන්‌දීති.

කෙවට්‌ටසුත්‌තං නිට්‌ඨිතං එකාදසමං.

No comments:

Post a Comment