Saturday, June 26, 2010

සාමඤ්‌ඤඵලසුත්‌තං

2. සාමඤ්‌ඤඵලසුත්‌තං

මෙම සුත්‍ර දේශනාවේ සිංහල පරිවර්තනයට මෙතැනින් පිවිසෙන්න

සිංහල පරිවර්ථනය සදහා ‍font මෙතැනින් ලබාගන්න

රාජාමච්‌චකථා

150. එවං මෙ සුතං – එකං සමයං භගවා රාජගහෙ විහරති ජීවකස්‌ස කොමාරභච්‌චස්‌ස අම්‌බවනෙ මහතා භික්‌ඛුසඞ්‌ඝෙන සද්‌ධිං අඩ්‌ඪතෙළසෙහි භික්‌ඛුසතෙහි. තෙන ඛො පන සමයෙන රාජා මාගධො අජාතසත්‌තු වෙදෙහිපුත්‌තො තදහුපොසථෙ පන්‌නරසෙ කොමුදියා චාතුමාසිනියා පුණ්‌ණාය පුණ්‌ණමාය රත්‌තියා රාජාමච්‌චපරිවුතො උපරිපාසාදවරගතො නිසින්‌නො හොති. අථ ඛො රාජා මාගධො අජාතසත්‌තු වෙදෙහිපුත්‌තො තදහුපොසථෙ උදානං උදානෙසි – ‘‘රමණීයා වත භො දොසිනා රත්‌ති, අභිරූපා වත භො දොසිනා රත්‌ති, දස්‌සනීයා වත භො දොසිනා රත්‌ති, පාසාදිකා වත භො දොසිනා රත්‌ති, ලක්‌ඛඤ්‌ඤා වත භො දොසිනා රත්‌ති. කං නු ඛ්‌වජ්‌ජ සමණං වා බ්‍රාහ්‌මණං වා පයිරුපාසෙය්‍යාම, යං නො පයිරුපාසතො චිත්‌තං පසීදෙය්‍යා’’ති?

151. එවං වුත්‌තෙ, අඤ්‌ඤතරො රාජාමච්‌චො රාජානං මාගධං අජාතසත්‌තුං වෙදෙහිපුත්‌තං එතදවොච – ‘‘අයං, දෙව, පූරණො කස්‌සපො සඞ්‌ඝී චෙව ගණී ච ගණාචරියො ච ඤාතො යසස්‌සී තිත්‌ථකරො සාධුසම්‌මතො බහුජනස්‌ස රත්‌තඤ්‌ඤූ චිරපබ්‌බජිතො අද්‌ධගතො වයොඅනුප්‌පත්‌තො. තං දෙවො පූරණං කස්‌සපං පයිරුපාසතු. අප්‌පෙව නාම දෙවස්‌ස පූරණං කස්‌සපං පයිරුපාසතො චිත්‌තං පසීදෙය්‍යා’’ති. එවං වුත්‌තෙ, රාජා මාගධො අජාතසත්‌තු වෙදෙහිපුත්‌තො තුණ්‌හී අහොසි.

152. අඤ්‌ඤතරොපි ඛො රාජාමච්‌චො රාජානං මාගධං අජාතසත්‌තුං වෙදෙහිපුත්‌තං එතදවොච – ‘‘අයං, දෙව, මක්‌ඛලි ගොසාලො සඞ්‌ඝී චෙව ගණී ච ගණාචරියො ච ඤාතො යසස්‌සී තිත්‌ථකරො සාධුසම්‌මතො බහුජනස්‌ස රත්‌තඤ්‌ඤූ චිරපබ්‌බජිතො අද්‌ධගතො වයොඅනුප්‌පත්‌තො. තං දෙවො මක්‌ඛලිං ගොසාලං පයිරුපාසතු. අප්‌පෙව නාම දෙවස්‌ස මක්‌ඛලිං ගොසාලං පයිරුපාසතො චිත්‌තං පසීදෙය්‍යා’’ති. එවං වුත්‌තෙ, රාජා මාගධො අජාතසත්‌තු වෙදෙහිපුත්‌තො තුණ්‌හී අහොසි.

153. අඤ්‌ඤතරොපි ඛො රාජාමච්‌චො රාජානං මාගධං අජාතසත්‌තුං වෙදෙහිපුත්‌තං එතදවොච – ‘‘අයං, දෙව, අජිතො කෙසකම්‌බලො සඞ්‌ඝී චෙව ගණී ච ගණාචරියො ච ඤාතො යසස්‌සී තිත්‌ථකරො සාධුසම්‌මතො බහුජනස්‌ස රත්‌තඤ්‌ඤූ චිරපබ්‌බජිතො අද්‌ධගතො වයොඅනුප්‌පත්‌තො. තං දෙවො අජිතං කෙසකම්‌බලං පයිරුපාසතු. අප්‌පෙව නාම දෙවස්‌ස අජිතං කෙසකම්‌බලං පයිරුපාසතො චිත්‌තං පසීදෙය්‍යා’’ති. එවං වුත්‌තෙ, රාජා මාගධො අජාතසත්‌තු වෙදෙහිපුත්‌තො තුණ්‌හී අහොසි.

154. අඤ්‌ඤතරොපි ඛො රාජාමච්‌චො රාජානං මාගධං අජාතසත්‌තුං වෙදෙහිපුත්‌තං එතදවොච – ‘‘අයං, දෙව, පකුධො [පකුද්‌ධො (සී.)] කච්‌චායනො සඞ්‌ඝී චෙව ගණී ච ගණාචරියො ච ඤාතො යසස්‌සී තිත්‌ථකරො සාධුසම්‌මතො බහුජනස්‌ස රත්‌තඤ්‌ඤූ චිරපබ්‌බජිතො අද්‌ධගතො වයොඅනුප්‌පත්‌තො. තං දෙවො පකුධං කච්‌චායනං පයිරුපාසතු. අප්‌පෙව නාම දෙවස්‌ස පකුධං කච්‌චායනං පයිරුපාසතො චිත්‌තං පසීදෙය්‍යා’’ති. එවං වුත්‌තෙ, රාජා මාගධො අජාතසත්‌තු වෙදෙහිපුත්‌තො තුණ්‌හී අහොසි.

155. අඤ්‌ඤතරොපි ඛො රාජාමච්‌චො රාජානං මාගධං අජාතසත්‌තුං වෙදෙහිපුත්‌තං එතදවොච – ‘‘අයං, දෙව, සඤ්‌චයො [සඤ්‌ජයො (සී. ස්‍යා.)] බෙලට්‌ඨපුත්‌තො[බෙල්‌ලට්‌ඨිපුත්‌තො (සී.), වෙලට්‌ඨපුත්‌තො (ස්‍යා.)] සඞ්‌ඝී චෙව ගණී ච ගණාචරියො ච ඤාතො යසස්‌සී තිත්‌ථකරො සාධුසම්‌මතො බහුජනස්‌ස රත්‌තඤ්‌ඤූ චිරපබ්‌බජිතො අද්‌ධගතො වයොඅනුප්‌පත්‌තො. තං දෙවො සඤ්‌චයං බෙලට්‌ඨපුත්‌තං පයිරුපාසතු. අප්‌පෙව නාම දෙවස්‌ස සඤ්‌චයං බෙලට්‌ඨපුත්‌තං පයිරුපාසතො චිත්‌තං පසීදෙය්‍යා’’ති. එවං වුත්‌තෙ, රාජා මාගධො අජාතසත්‌තු වෙදෙහිපුත්‌තො තුණ්‌හී අහොසි.

156. අඤ්‌ඤතරොපි ඛො රාජාමච්‌චො රාජානං මාගධං අජාතසත්‌තුං වෙදෙහිපුත්‌තං එතදවොච – ‘‘අයං, දෙව, නිගණ්‌ඨො නාටපුත්‌තො [නාථපුත්‌තො (සී.), නාතපුත්‌තො (පී.)] සඞ්‌ඝී චෙව ගණී ච ගණාචරියො ච ඤාතො යසස්‌සී තිත්‌ථකරො සාධුසම්‌මතො බහුජනස්‌ස රත්‌තඤ්‌ඤූ චිරපබ්‌බජිතො අද්‌ධගතො වයොඅනුප්‌පත්‌තො. තං දෙවො නිගණ්‌ඨං නාටපුත්‌තං පයිරුපාසතු. අප්‌පෙව නාම දෙවස්‌ස නිගණ්‌ඨං නාටපුත්‌තං පයිරුපාසතො චිත්‌තං පසීදෙය්‍යා’’ති. එවං වුත්‌තෙ, රාජා මාගධො අජාතසත්‌තු වෙදෙහිපුත්‌තො තුණ්‌හී අහොසි.

කොමාරභච්‌චජීවකකථා

157. තෙන ඛො පන සමයෙන ජීවකො කොමාරභච්‌චො රඤ්‌ඤො මාගධස්‌ස අජාතසත්‌තුස්‌ස වෙදෙහිපුත්‌තස්‌ස අවිදූරෙ තුණ්‌හීභූතො නිසින්‌නො හොති. අථ ඛො රාජා මාගධො අජාතසත්‌තු වෙදෙහිපුත්‌තො ජීවකං කොමාරභච්‌චං එතදවොච – ‘‘ත්‌වං පන, සම්‌ම ජීවක, කිං තුණ්‌හී’’ති? ‘‘අයං, දෙව, භගවා අරහං සම්‌මාසම්‌බුද්‌ධො අම්‌හාකං අම්‌බවනෙ විහරති මහතා භික්‌ඛුසඞ්‌ඝෙන සද්‌ධිං අඩ්‌ඪතෙළසෙහි භික්‌ඛුසතෙහි. තං ඛො පන භගවන්‌තං [භගවන්‌තං ගොතමං (සී. ක. පී.)] එවං කල්‍යාණො කිත්‌තිසද්‌දො අබ්‌භුග්‌ගතො – ‘ඉතිපි සො භගවා අරහං සම්‌මාසම්‌බුද්‌ධො විජ්‌ජාචරණසම්‌පන්‌නො සුගතො ලොකවිදූ අනුත්‌තරො පුරිසදම්‌මසාරථි සත්‌ථා දෙවමනුස්‌සානං බුද්‌ධො භගවා’ති. තං දෙවො භගවන්‌තං පයිරුපාසතු. අප්‌පෙව නාම දෙවස්‌ස භගවන්‌තං පයිරුපාසතො චිත්‌තං පසීදෙය්‍යා’ති.

158. ‘‘තෙන හි, සම්‌ම ජීවක, හත්‌ථියානානි කප්‌පාපෙහී’’ති. ‘‘එවං, දෙවා’’ති ඛො ජීවකො කොමාරභච්‌චො රඤ්‌ඤො මාගධස්‌ස අජාතසත්‌තුස්‌ස වෙදෙහිපුත්‌තස්‌ස පටිස්‌සුණිත්‌වා පඤ්‌චමත්‌තානි හත්‌ථිනිකාසතානි කප්‌පාපෙත්‌වා රඤ්‌ඤො ච ආරොහණීයං නාගං, රඤ්‌ඤො මාගධස්‌ස අජාතසත්‌තුස්‌ස වෙදෙහිපුත්‌තස්‌ස පටිවෙදෙසි – ‘‘කප්‌පිතානි ඛො තෙ, දෙව, හත්‌ථියානානි, යස්‌සදානි කාලං මඤ්‌ඤසී’’ති.

159. අථ ඛො රාජා මාගධො අජාතසත්‌තු වෙදෙහිපුත්‌තො පඤ්‌චසු හත්‌ථිනිකාසතෙසු පච්‌චෙකා ඉත්‌ථියො ආරොපෙත්‌වා ආරොහණීයං නාගං අභිරුහිත්‌වා උක්‌කාසු ධාරියමානාසු රාජගහම්‌හා නිය්‍යාසි මහච්‌චරාජානුභාවෙන, යෙන ජීවකස්‌ස කොමාරභච්‌චස්‌ස අම්‌බවනං තෙන පායාසි.

අථ ඛො රඤ්‌ඤො මාගධස්‌ස අජාතසත්‌තුස්‌ස වෙදෙහිපුත්‌තස්‌ස අවිදූරෙ අම්‌බවනස්‌ස අහුදෙව භයං, අහු ඡම්‌භිතත්‌තං, අහු ලොමහංසො. අථ ඛො රාජා මාගධො අජාතසත්‌තු වෙදෙහිපුත්‌තො භීතො සංවිග්‌ගො ලොමහට්‌ඨජාතො ජීවකං කොමාරභච්‌චං එතදවොච – ‘‘කච්‌චි මං, සම්‌ම ජීවක, න වඤ්‌චෙසි? කච්‌චි මං, සම්‌ම ජීවක, න පලම්‌භෙසි? කච්‌චි මං, සම්‌ම ජීවක, න පච්‌චත්‌ථිකානං දෙසි ? කථඤ්‌හි නාම තාව මහතො භික්‌ඛුසඞ්‌ඝස්‌ස අඩ්‌ඪතෙළසානං භික්‌ඛුසතානං නෙව ඛිපිතසද්‌දො භවිස්‌සති, න උක්‌කාසිතසද්‌දො න නිග්‌ඝොසො’’ති.

‘‘මා භායි, මහාරාජ, මා භායි, මහාරාජ. න තං දෙව, වඤ්‌චෙමි; න තං, දෙව, පලම්‌භාමි ; න තං, දෙව, පච්‌චත්‌ථිකානං දෙමි. අභික්‌කම, මහාරාජ, අභික්‌කම, මහාරාජ, එතෙ මණ්‌ඩලමාළෙ දීපා [පදීපා (සී. ස්‍යා.)] ඣායන්‌තී’’ති.

සාමඤ්‌ඤඵලපුච්‌ඡා

160. අථ ඛො රාජා මාගධො අජාතසත්‌තු වෙදෙහිපුත්‌තො යාවතිකා නාගස්‌ස භූමි නාගෙන ගන්‌ත්‌වා, නාගා පච්‌චොරොහිත්‌වා, පත්‌තිකොව [පදිකොව (ස්‍යා.)]යෙන මණ්‌ඩලමාළස්‌ස ද්‌වාරං තෙනුපසඞ්‌කමි; උපසඞ්‌කමිත්‌වා ජීවකං කොමාරභච්‌චං එතදවොච – ‘‘කහං පන, සම්‌ම ජීවක, භගවා’’ති? ‘‘එසො, මහාරාජ, භගවා; එසො, මහාරාජ, භගවා මජ්‌ඣිමං ථම්‌භං නිස්‌සාය පුරත්‌ථාභිමුඛො නිසින්‌නො පුරක්‌ඛතො භික්‌ඛුසඞ්‌ඝස්‌සා’’ති.

161. අථ ඛො රාජා මාගධො අජාතසත්‌තු වෙදෙහිපුත්‌තො යෙන භගවා තෙනුපසඞ්‌කමි; උපසඞ්‌කමිත්‌වා එකමන්‌තං අට්‌ඨාසි. එකමන්‌තං ඨිතො ඛො රාජා මාගධො අජාතසත්‌තු වෙදෙහිපුත්‌තො තුණ්‌හීභූතං තුණ්‌හීභූතං භික්‌ඛුසඞ්‌ඝං අනුවිලොකෙත්‌වා රහදමිව විප්‌පසන්‌නං උදානං උදානෙසි – ‘‘ඉමිනා මෙ උපසමෙන උදයභද්‌දො[උදායිභද්‌දො (සී. පී.)] කුමාරො සමන්‌නාගතො හොතු, යෙනෙතරහි උපසමෙන භික්‌ඛුසඞ්‌ඝො සමන්‌නාගතො’’ති. ‘‘අගමා ඛො ත්‌වං, මහාරාජ, යථාපෙම’’න්‌ති. ‘‘පියො මෙ, භන්‌තෙ, උදයභද්‌දො කුමාරො. ඉමිනා මෙ, භන්‌තෙ, උපසමෙන උදයභද්‌දො කුමාරො සමන්‌නාගතො හොතු යෙනෙතරහි උපසමෙන භික්‌ඛුසඞ්‌ඝො සමන්‌නාගතො’’ති.

162. අථ ඛො රාජා මාගධො අජාතසත්‌තු වෙදෙහිපුත්‌තො භගවන්‌තං අභිවාදෙත්‌වා, භික්‌ඛුසඞ්‌ඝස්‌ස අඤ්‌ජලිං පණාමෙත්‌වා , එකමන්‌තං නිසීදි. එකමන්‌තංනිසින්‌නො ඛො රාජා මාගධො අජාතසත්‌තු වෙදෙහිපුත්‌තො භගවන්‌තං එතදවොච – ‘‘පුච්‌ඡෙය්‍යාමහං, භන්‌තෙ, භගවන්‌තං කිඤ්‌චිදෙව දෙසං [කිඤ්‌චිදෙව දෙසං ලෙසමත්‌තං (ස්‍යා. කං. ක.)]; සචෙ මෙ භගවා ඔකාසං කරොති පඤ්‌හස්‌ස වෙය්‍යාකරණායා’’ති. ‘‘පුච්‌ඡ, මහාරාජ, යදාකඞ්‌ඛසී’’ති.

163. ‘‘යථා නු ඛො ඉමානි, භන්‌තෙ, පුථුසිප්‌පායතනානි, සෙය්‍යථිදං – හත්‌ථාරොහා අස්‌සාරොහා රථිකා ධනුග්‌ගහා චෙලකා චලකා පිණ්‌ඩදායකා උග්‌ගා රාජපුත්‌තා පක්‌ඛන්‌දිනො මහානාගා සූරා චම්‌මයොධිනො දාසිකපුත්‌තා ආළාරිකා කප්‌පකා න්‌හාපකා [නහාපිකා (සී.), න්‌හාපිකා (ස්‍යා.)] සූදා මාලාකාරා රජකා පෙසකාරා නළකාරා කුම්‌භකාරා ගණකා මුද්‌දිකා, යානි වා පනඤ්‌ඤානිපි එවංගතානි පුථුසිප්‌පායතනානි, තෙ දිට්‌ඨෙව ධම්‌මෙ සන්‌දිට්‌ඨිකං සිප්‌පඵලං උපජීවන්‌ති; තෙ තෙන අත්‌තානං සුඛෙන්‌ති පීණෙන්‌ති [පීනෙන්‌ති (කත්‌ථචි)], මාතාපිතරො සුඛෙන්‌ති පීණෙන්‌ති, පුත්‌තදාරං සුඛෙන්‌ති පීණෙන්‌ති, මිත්‌තාමච්‌චෙ සුඛෙන්‌ති පීණෙන්‌ති, සමණබ්‍රාහ්‌මණෙසු [සමණෙසු බ්‍රාහ්‌මණෙසු (ක.)] උද්‌ධග්‌ගිකං දක්‌ඛිණං පතිට්‌ඨපෙන්‌ති සොවග්‌ගිකං සුඛවිපාකං සග්‌ගසංවත්‌තනිකං. සක්‌කා නු ඛො, භන්‌තෙ, එවමෙව දිට්‌ඨෙව ධම්‌මෙ සන්‌දිට්‌ඨිකං සාමඤ්‌ඤඵලං පඤ්‌ඤපෙතු’’න්‌ති?

164. ‘‘අභිජානාසි නො ත්‌වං, මහාරාජ, ඉමං පඤ්‌හං අඤ්‌ඤෙ සමණබ්‍රාහ්‌මණෙ පුච්‌ඡිතා’’ති ? ‘‘අභිජානාමහං, භන්‌තෙ, ඉමං පඤ්‌හං අඤ්‌ඤෙ සමණබ්‍රාහ්‌මණෙ පුච්‌ඡිතා’’ති. ‘‘යථා කථං පන තෙ, මහාරාජ, බ්‍යාකරිංසු, සචෙ තෙ අගරු භාසස්‌සූ’’ති. ‘‘න ඛො මෙ, භන්‌තෙ, ගරු, යත්‌ථස්‌ස භගවා නිසින්‌නො, භගවන්‌තරූපො වා’’ති [චාති (සී. ක.)]. ‘‘තෙන හි, මහාරාජ, භාසස්‌සූ’’ති.

පූරණකස්‌සපවාදො

165. ‘‘එකමිදාහං, භන්‌තෙ, සමයං යෙන පූරණො කස්‌සපො තෙනුපසඞ්‌කමි; උපසඞ්‌කමිත්‌වා පූරණෙන කස්‌සපෙන සද්‌ධිං සම්‌මොදිං. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදිං. එකමන්‌තං නිසින්‌නො ඛො අහං, භන්‌තෙ, පූරණං කස්‌සපං එතදවොචං – ‘යථා නු ඛො ඉමානි, භො කස්‌සප, පුථුසිප්‌පායතනානි, සෙය්‍යථිදං – හත්‌ථාරොහා අස්‌සාරොහා රථිකා ධනුග්‌ගහා චෙලකා චලකා පිණ්‌ඩදායකා උග්‌ගා රාජපුත්‌තා පක්‌ඛන්‌දිනො මහානාගා සූරා චම්‌මයොධිනො දාසිකපුත්‌තා ආළාරිකා කප්‌පකා න්‌හාපකා සූදා මාලාකාරා රජකා පෙසකාරා නළකාරා කුම්‌භකාරා ගණකා මුද්‌දිකා, යානි වා පනඤ්‌ඤානිපි එවංගතානි පුථුසිප්‌පායතනානි- තෙ දිට්‌ඨෙව ධම්‌මෙ සන්‌දිට්‌ඨිකං සිප්‌පඵලං උපජීවන්‌ති; තෙ තෙන අත්‌තානං සුඛෙන්‌ති පීණෙන්‌ති, මාතාපිතරො සුඛෙන්‌ති පීණෙන්‌ති, පුත්‌තදාරං සුඛෙන්‌ති පීණෙන්‌ති, මිත්‌තාමච්‌චෙ සුඛෙන්‌ති පීණෙන්‌ති, සමණබ්‍රාහ්‌මණෙසු උද්‌ධග්‌ගිකං දක්‌ඛිණං පතිට්‌ඨපෙන්‌ති සොවග්‌ගිකං සුඛවිපාකං සග්‌ගසංවත්‌තනිකං. සක්‌කා නු ඛො, භො කස්‌සප, එවමෙව දිට්‌ඨෙව ධම්‌මෙ සන්‌දිට්‌ඨිකං සාමඤ්‌ඤඵලං පඤ්‌ඤපෙතු’න්‌ති?

166. ‘‘එවං වුත්‌තෙ, භන්‌තෙ, පූරණො කස්‌සපො මං එතදවොච – ‘කරොතො ඛො, මහාරාජ, කාරයතො, ඡින්‌දතො ඡෙදාපයතො, පචතො පාචාපයතො සොචයතො, සොචාපයතො, කිලමතො කිලමාපයතො, ඵන්‌දතො ඵන්‌දාපයතො, පාණමතිපාතාපයතො, අදින්‌නං ආදියතො, සන්‌ධිං ඡින්‌දතො, නිල්‌ලොපං හරතො, එකාගාරිකං කරොතො, පරිපන්‌ථෙ තිට්‌ඨතො, පරදාරං ගච්‌ඡතො, මුසා භණතො, කරොතො න කරීයති පාපං. ඛුරපරියන්‌තෙන චෙපි චක්‌කෙන යො ඉමිස්‌සා පථවියා පාණෙ එකං මංසඛලං එකං මංසපුඤ්‌ජං කරෙය්‍ය, නත්‌ථි තතොනිදානං පාපං, නත්‌ථි පාපස්‌ස ආගමො. දක්‌ඛිණං චෙපි ගඞ්‌ගාය තීරං ගච්‌ඡෙය්‍ය හනන්‌තො ඝාතෙන්‌තො ඡින්‌දන්‌තො ඡෙදාපෙන්‌තො පචන්‌තො පාචාපෙන්‌තො, නත්‌ථි තතොනිදානං පාපං, නත්‌ථි පාපස්‌ස ආගමො. උත්‌තරඤ්‌චෙපි ගඞ්‌ගාය තීරං ගච්‌ඡෙය්‍ය දදන්‌තො දාපෙන්‌තො යජන්‌තො යජාපෙන්‌තො, නත්‌ථි තතොනිදානං පුඤ්‌ඤං, නත්‌ථි පුඤ්‌ඤස්‌ස ආගමො. දානෙන දමෙන සංයමෙන සච්‌චවජ්‌ජෙන නත්‌ථි පුඤ්‌ඤං, නත්‌ථි පුඤ්‌ඤස්‌ස ආගමො’ති. ඉත්‌ථං ඛො මෙ, භන්‌තෙ, පූරණො කස්‌සපො සන්‌දිට්‌ඨිකං සාමඤ්‌ඤඵලං පුට්‌ඨො සමානො අකිරියං බ්‍යාකාසි.

‘‘සෙය්‍යථාපි, භන්‌තෙ, අම්‌බං වා පුට්‌ඨො ලබුජං බ්‍යාකරෙය්‍ය , ලබුජං වා පුට්‌ඨො අම්‌බං බ්‍යාකරෙය්‍ය; එවමෙව ඛො මෙ, භන්‌තෙ, පූරණො කස්‌සපො සන්‌දිට්‌ඨිකං සාමඤ්‌ඤඵලං පුට්‌ඨො සමානො අකිරියං බ්‍යාකාසි. තස්‌ස මය්‌හං, භන්‌තෙ, එතදහොසි – ‘කථඤ්‌හි නාම මාදිසො සමණං වා බ්‍රාහ්‌මණං වා විජිතෙ වසන්‌තං අපසාදෙතබ්‌බං මඤ්‌ඤෙය්‍යා’ති. සො ඛො අහං, භන්‌තෙ, පූරණස්‌ස කස්‌සපස්‌ස භාසිතං නෙව අභිනන්‌දිං නප්‌පටික්‌කොසිං. අනභිනන්‌දිත්‌වා අප්‌පටිකොසිත්‌වාඅනත්‌තමනො, අනත්‌තමනවාචං අනිච්‌ඡාරෙත්‌වා, තමෙව වාචං අනුග්‌ගණ්‌හන්‌තො අනික්‌කුජ්‌ජන්‌තො [අනික්‌කුජ්‌ජෙන්‌තො (ස්‍යා. කං. ක.)] උට්‌ඨායාසනා පක්‌කමිං[පක්‌කාමිං (සී. ස්‍යා. කං. පී.)].

මක්‌ඛලිගොසාලවාදො

167. ‘‘එකමිදාහං, භන්‌තෙ, සමයං යෙන මක්‌ඛලි ගොසාලො තෙනුපසඞ්‌කමිං; උපසඞ්‌කමිත්‌වා මක්‌ඛලිනා ගොසාලෙන සද්‌ධිං සම්‌මොදිං. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදිං. එකමන්‌තං නිසින්‌නො ඛො අහං, භන්‌තෙ, මක්‌ඛලිං ගොසාලං එතදවොචං – ‘යථා නු ඛො ඉමානි, භො ගොසාල, පුථුසිප්‌පායතනානි…පෙ.… සක්‌කා නු ඛො, භො ගොසාල, එවමෙව දිට්‌ඨෙව ධම්‌මෙ සන්‌දිට්‌ඨිකං සාමඤ්‌ඤඵලං පඤ්‌ඤපෙතු’න්‌ති?

168. ‘‘එවං වුත්‌තෙ, භන්‌තෙ, මක්‌ඛලි ගොසාලො මං එතදවොච – ‘නත්‌ථි මහාරාජ හෙතු නත්‌ථි පච්‌චයො සත්‌තානං සංකිලෙසාය, අහෙතූ [අහෙතු (කත්‌ථචි)]අපච්‌චයා සත්‌තා සංකිලිස්‌සන්‌ති. නත්‌ථි හෙතු, නත්‌ථි පච්‌චයො සත්‌තානං විසුද්‌ධියා, අහෙතූ අපච්‌චයා සත්‌තා විසුජ්‌ඣන්‌ති. නත්‌ථි අත්‌තකාරෙ, නත්‌ථි පරකාරෙ, නත්‌ථි පුරිසකාරෙ, නත්‌ථි බලං, නත්‌ථි වීරියං, නත්‌ථි පුරිසථාමො, නත්‌ථි පුරිසපරක්‌කමො . සබ්‌බෙ සත්‌තා සබ්‌බෙ පාණා සබ්‌බෙ භූතා සබ්‌බෙ ජීවා අවසා අබලා අවීරියා නියතිසඞ්‌ගතිභාවපරිණතා ඡස්‌වෙවාභිජාතීසු සුඛදුක්‌ඛං [සුඛඤ්‌ච දුක්‌ඛඤ්‌ච (ස්‍යා.)] පටිසංවෙදෙන්‌ති. චුද්‌දස ඛො පනිමානි යොනිපමුඛසතසහස්‌සානි සට්‌ඨි ච සතානි ඡ ච සතානි පඤ්‌ච ච කම්‌මුනො සතානි පඤ්‌ච ච කම්‌මානි තීණි ච කම්‌මානි කම්‌මෙ ච අඩ්‌ඪකම්‌මෙ ච ද්‌වට්‌ඨිපටිපදා ද්‌වට්‌ඨන්‌තරකප්‌පා ඡළාභිජාතියො අට්‌ඨ පුරිසභූමියො එකූනපඤ්‌ඤාස ආජීවකසතෙ එකූනපඤ්‌ඤාස පරිබ්‌බාජකසතෙ එකූනපඤ්‌ඤාස නාගාවාසසතෙ වීසෙ ඉන්‌ද්‍රියසතෙ තිංසෙ නිරයසතෙ ඡත්‌තිංස රජොධාතුයො සත්‌ත සඤ්‌ඤීගබ්‌භා සත්‌ත අසඤ්‌ඤීගබ්‌භා සත්‌ත නිගණ්‌ඨිගබ්‌භා සත්‌ත දෙවා සත්‌ත මානුසා සත්‌ත පිසාචා සත්‌ත සරා සත්‌ත පවුටා [සපුටා (ක.), පබුටා (සී.)] සත්‌ත පවුටසතානි සත්‌ත පපාතා සත්‌ත පපාතසතානි සත්‌ත සුපිනා සත්‌ත සුපිනසතානි චුල්‌ලාසීති මහාකප්‌පිනො [මහාකප්‌පුනො (ක. සී. පී.)]සතසහස්‌සානි, යානි බාලෙ ච පණ්‌ඩිතෙ ච සන්‌ධාවිත්‌වා සංසරිත්‌වා දුක්‌ඛස්‌සන්‌තං කරිස්‌සන්‌ති. තත්‌ථ නත්‌ථි ‘‘ඉමිනාහං සීලෙන වා වතෙන වා තපෙන වා බ්‍රහ්‌මචරියෙන වා අපරිපක්‌කං වා කම්‌මං පරිපාචෙස්‌සාමි, පරිපක්‌කං වා කම්‌මං ඵුස්‌ස ඵුස්‌ස බ්‍යන්‌තිං කරිස්‌සාමී’ති හෙවං නත්‌ථි. දොණමිතෙ සුඛදුක්‌ඛෙ පරියන්‌තකතෙ සංසාරෙ , නත්‌ථි හායනවඩ්‌ඪනෙ, නත්‌ථි උක්‌කංසාවකංසෙ. සෙය්‍යථාපි නාම සුත්‌තගුළෙ ඛිත්‌තෙ නිබ්‌බෙඨියමානමෙව පලෙති, එවමෙව බාලෙ ච පණ්‌ඩිතෙ ච සන්‌ධාවිත්‌වා සංසරිත්‌වා දුක්‌ඛස්‌සන්‌තං කරිස්‌සන්‌තී’ති.

169. ‘‘ඉත්‌ථං ඛො මෙ, භන්‌තෙ, මක්‌ඛලි ගොසාලො සන්‌දිට්‌ඨිකං සාමඤ්‌ඤඵලං පුට්‌ඨො සමානො සංසාරසුද්‌ධිං බ්‍යාකාසි. සෙය්‍යථාපි, භන්‌තෙ, අම්‌බං වා පුට්‌ඨො ලබුජං බ්‍යාකරෙය්‍ය, ලබුජං වා පුට්‌ඨො අම්‌බං බ්‍යාකරෙය්‍ය; එවමෙව ඛො මෙ, භන්‌තෙ, මක්‌ඛලි ගොසාලො සන්‌දිට්‌ඨිකං සාමඤ්‌ඤඵලං පුට්‌ඨො සමානො සංසාරසුද්‌ධිං බ්‍යාකාසි. තස්‌ස මය්‌හං, භන්‌තෙ, එතදහොසි – ‘කථඤ්‌හි නාම මාදිසො සමණං වා බ්‍රාහ්‌මණං වා විජිතෙ වසන්‌තං අපසාදෙතබ්‌බං මඤ්‌ඤෙය්‍යා’ති. සො ඛො අහං, භන්‌තෙ, මක්‌ඛලිස්‌ස ගොසාලස්‌ස භාසිතං නෙව අභිනන්‌දිං නප්‌පටික්‌කොසිං. අනභිනන්‌දිත්‌වා අප්‌පටික්‌කොසිත්‌වා අනත්‌තමනො, අනත්‌තමනවාචං අනිච්‌ඡාරෙත්‌වා, තමෙව වාචං අනුග්‌ගණ්‌හන්‌තො අනික්‌කුජ්‌ජන්‌තො උට්‌ඨායාසනා පක්‌කමිං.

අජිතකෙසකම්‌බලවාදො

170. ‘‘එකමිදාහං, භන්‌තෙ, සමයං යෙන අජිතො කෙසකම්‌බලො තෙනුපසඞ්‌කමිං; උපසඞ්‌කමිත්‌වා අජිතෙන කෙසකම්‌බලෙන සද්‌ධිං සම්‌මොදිං. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදිං. එකමන්‌තං නිසින්‌නො ඛො අහං, භන්‌තෙ, අජිතං කෙසකම්‌බලං එතදවොචං – ‘යථා නු ඛො ඉමානි, භො අජිත, පුථුසිප්‌පායතනානි…පෙ.… සක්‌කා නු ඛො, භො අජිත, එවමෙව දිට්‌ඨෙව ධම්‌මෙ සන්‌දිට්‌ඨිකං සාමඤ්‌ඤඵලං පඤ්‌ඤපෙතු’න්‌ති?

171. ‘‘එවං වුත්‌තෙ, භන්‌තෙ, අජිතො කෙසකම්‌බලො මං එතදවොච – ‘නත්‌ථි, මහාරාජ, දින්‌නං , නත්‌ථි යිට්‌ඨං, නත්‌ථි හුතං, නත්‌ථි සුකතදුක්‌කටානං කම්‌මානං ඵලං විපාකො, නත්‌ථි අයං ලොකො [පරලොකො (ස්‍යා.)], නත්‌ථි පරො ලොකො, නත්‌ථි මාතා, නත්‌ථි පිතා, නත්‌ථි සත්‌තා ඔපපාතිකා, නත්‌ථි ලොකෙ සමණබ්‍රාහ්‌මණා සම්‌මග්‌ගතා [සමග්‌ගතා (ක.), සමග්‌ගතා (ස්‍යා.)] සම්‌මාපටිපන්‌නා, යෙ ඉමඤ්‌ච ලොකං පරඤ්‌ච ලොකං සයං අභිඤ්‌ඤා සච්‌ඡිකත්‌වා පවෙදෙන්‌ති. චාතුමහාභූතිකො අයං පුරිසො, යදා කාලඞ්‌කරොති, පථවී පථවිකායං අනුපෙති අනුපගච්‌ඡති, ආපො ආපොකායං අනුපෙති අනුපගච්‌ඡති, තෙජො තෙජොකායං අනුපෙති අනුපගච්‌ඡති, වායො වායොකායං අනුපෙති අනුපගච්‌ඡති, ආකාසං ඉන්‌ද්‍රියානි සඞ්‌කමන්‌ති. ආසන්‌දිපඤ්‌චමා පුරිසා මතං ආදාය ගච්‌ඡන්‌ති. යාවාළාහනා පදානි පඤ්‌ඤායන්‌ති. කාපොතකානි අට්‌ඨීනි භවන්‌ති, භස්‌සන්‌තා ආහුතියො. දත්‌තුපඤ්‌ඤත්‌තං යදිදං දානං. තෙසං තුච්‌ඡං මුසා විලාපො යෙ කෙචි අත්‌ථිකවාදං වදන්‌ති. බාලෙ ච පණ්‌ඩිතෙ ච කායස්‌ස භෙදා උච්‌ඡිජ්‌ජන්‌ති විනස්‌සන්‌ති, න හොන්‌ති පරං මරණා’ති.

172. ‘‘ඉත්‌ථං ඛො මෙ, භන්‌තෙ, අජිතො කෙසකම්‌බලො සන්‌දිට්‌ඨිකං සාමඤ්‌ඤඵලං පුට්‌ඨො සමානො උච්‌ඡෙදං බ්‍යාකාසි. සෙය්‍යථාපි, භන්‌තෙ, අම්‌බං වා පුට්‌ඨො ලබුජං බ්‍යාකරෙය්‍ය , ලබුජං වා පුට්‌ඨො අම්‌බං බ්‍යාකරෙය්‍ය; එවමෙව ඛො මෙ, භන්‌තෙ, අජිතො කෙසකම්‌බලො සන්‌දිට්‌ඨිකං සාමඤ්‌ඤඵලං පුට්‌ඨො සමානො උච්‌ඡෙදං බ්‍යාකාසි. තස්‌ස මය්‌හං, භන්‌තෙ, එතදහොසි – ‘කථඤ්‌හි නාම මාදිසො සමණං වා බ්‍රාහ්‌මණං වා විජිතෙ වසන්‌තං අපසාදෙතබ්‌බං මඤ්‌ඤෙය්‍යා’ති. සො ඛො අහං, භන්‌තෙ, අජිතස්‌ස කෙසකම්‌බලස්‌ස භාසිතං නෙව අභිනන්‌දිං නප්‌පටික්‌කොසිං. අනභිනන්‌දිත්‌වා අප්‌පටික්‌කොසිත්‌වා අනත්‌තමනො අනත්‌තමනවාචං අනිච්‌ඡාරෙත්‌වා තමෙව වාචං අනුග්‌ගණ්‌හන්‌තො අනික්‌කුජ්‌ජන්‌තො උට්‌ඨායාසනා පක්‌කමිං.

පකුධකච්‌චායනවාදො

173. ‘‘එකමිදාහං, භන්‌තෙ, සමයං යෙන පකුධො කච්‌චායනො තෙනුපසඞ්‌කමිං; උපසඞ්‌කමිත්‌වා පකුධෙන කච්‌චායනෙන සද්‌ධිං සම්‌මොදිං. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදිං. එකමන්‌තං නිසින්‌නො ඛො අහං, භන්‌තෙ, පකුධං කච්‌චායනං එතදවොචං – ‘යථා නු ඛො ඉමානි, භො කච්‌චායන, පුථුසිප්‌පායතනානි…පෙ.… සක්‌කා නු ඛො, භො කච්‌චායන, එවමෙව දිට්‌ඨෙව ධම්‌මෙ සන්‌දිට්‌ඨිකං සාමඤ්‌ඤඵලං පඤ්‌ඤපෙතු’න්‌ති?

174. ‘‘එවං වුත්‌තෙ, භන්‌තෙ, පකුධො කච්‌චායනො මං එතදවොච – ‘සත්‌තිමෙ, මහාරාජ, කායා අකටා අකටවිධා අනිම්‌මිතා අනිම්‌මාතා වඤ්‌ඣා කූටට්‌ඨාඑසිකට්‌ඨායිට්‌ඨිතා. තෙ න ඉඤ්‌ජන්‌ති , න විපරිණමන්‌ති, න අඤ්‌ඤමඤ්‌ඤං බ්‍යාබාධෙන්‌ති, නාලං අඤ්‌ඤමඤ්‌ඤස්‌ස සුඛාය වා දුක්‌ඛාය වා සුඛදුක්‌ඛාය වා. කතමෙ සත්‌ත? පථවිකායො, ආපොකායො, තෙජොකායො, වායොකායො, සුඛෙ, දුක්‌ඛෙ, ජීවෙ සත්‌තමෙ – ඉමෙ සත්‌ත කායා අකටා අකටවිධා අනිම්‌මිතා අනිම්‌මාතා වඤ්‌ඣා කූටට්‌ඨා එසිකට්‌ඨායිට්‌ඨිතා. තෙ න ඉඤ්‌ජන්‌ති, න විපරිණමන්‌ති, න අඤ්‌ඤමඤ්‌ඤං බ්‍යාබාධෙන්‌ති, නාලං අඤ්‌ඤමඤ්‌ඤස්‌ස සුඛාය වා දුක්‌ඛාය වා සුඛදුක්‌ඛාය වා. තත්‌ථ නත්‌ථි හන්‌තා වා ඝාතෙතා වා, සොතා වා සාවෙතා වා, විඤ්‌ඤාතා වා විඤ්‌ඤාපෙතා වා. යොපි තිණ්‌හෙන සත්‌ථෙන සීසං ඡින්‌දති, න කොචි කිඤ්‌චි [කඤ්‌චි (කං.)] ජීවිතා වොරොපෙති; සත්‌තන්‌නං ත්‌වෙව [සත්‌තන්‌නං යෙව (සී. ස්‍යා. කං. පී.)] කායානමන්‌තරෙන සත්‌ථං විවරමනුපතතී’ති.

175. ‘‘ඉත්‌ථං ඛො මෙ, භන්‌තෙ, පකුධො කච්‌චායනො සන්‌දිට්‌ඨිකං සාමඤ්‌ඤඵලං පුට්‌ඨො සමානො අඤ්‌ඤෙන අඤ්‌ඤං බ්‍යාකාසි. සෙය්‍යථාපි, භන්‌තෙ, අම්‌බං වා පුට්‌ඨො ලබුජං බ්‍යාකරෙය්‍ය, ලබුජං වා පුට්‌ඨො අම්‌බං බ්‍යාකරෙය්‍ය; එවමෙව ඛො මෙ, භන්‌තෙ, පකුධො කච්‌චායනො සන්‌දිට්‌ඨිකං සාමඤ්‌ඤඵලං පුට්‌ඨො සමානො අඤ්‌ඤෙන අඤ්‌ඤං බ්‍යාකාසි. තස්‌ස මය්‌හං, භන්‌තෙ, එතදහොසි – ‘කථඤ්‌හි නාම මාදිසො සමණං වා බ්‍රාහ්‌මණං වා විජිතෙ වසන්‌තං අපසාදෙතබ්‌බං මඤ්‌ඤෙය්‍යා’ති. සො ඛො අහං, භන්‌තෙ, පකුධස්‌ස කච්‌චායනස්‌ස භාසිතං නෙව අභිනන්‌දිං නප්‌පටික්‌කොසිං, අනභිනන්‌දිත්‌වා අප්‌පටික්‌කොසිත්‌වා අනත්‌තමනො, අනත්‌තමනවාචං අනිච්‌ඡාරෙත්‌වා තමෙව වාචං අනුග්‌ගණ්‌හන්‌තො අනික්‌කුජ්‌ජන්‌තො උට්‌ඨායාසනා පක්‌කමිං.

නිගණ්‌ඨනාටපුත්‌තවාදො

176. ‘‘එකමිදාහං, භන්‌තෙ, සමයං යෙන නිගණ්‌ඨො නාටපුත්‌තො තෙනුපසඞ්‌කමිං ; උපසඞ්‌කමිත්‌වා නිගණ්‌ඨෙන නාටපුත්‌තෙන සද්‌ධිං සම්‌මොදිං. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදිං. එකමන්‌තං නිසින්‌නො ඛො අහං, භන්‌තෙ, නිගණ්‌ඨං නාටපුත්‌තං එතදවොචං – ‘යථා නු ඛො ඉමානි, භො අග්‌ගිවෙස්‌සන, පුථුසිප්‌පායතනානි…පෙ.… සක්‌කා නු ඛො, භො අග්‌ගිවෙස්‌සන, එවමෙව දිට්‌ඨෙව ධම්‌මෙ සන්‌දිට්‌ඨිකං සාමඤ්‌ඤඵලං පඤ්‌ඤපෙතු’න්‌ති?

177. ‘‘එවං වුත්‌තෙ, භන්‌තෙ, නිගණ්‌ඨො නාටපුත්‌තො මං එතදවොච – ‘ඉධ, මහාරාජ, නිගණ්‌ඨො චාතුයාමසංවරසංවුතො හොති. කථඤ්‌ච, මහාරාජ, නිගණ්‌ඨො චාතුයාමසංවරසංවුතො හොති? ඉධ, මහාරාජ, නිගණ්‌ඨො සබ්‌බවාරිවාරිතො ච හොති, සබ්‌බවාරියුත්‌තො ච, සබ්‌බවාරිධුතො ච, සබ්‌බවාරිඵුටො ච. එවං ඛො, මහාරාජ, නිගණ්‌ඨො චාතුයාමසංවරසංවුතො හොති . යතො ඛො, මහාරාජ, නිගණ්‌ඨො එවං චාතුයාමසංවරසංවුතො හොති; අයං වුච්‌චති, මහාරාජ, නිගණ්‌ඨො[නිගණ්‌ඨො නාටපුත්‌තො (ස්‍යා. ක.)] ගතත්‌තො ච යතත්‌තො ච ඨිතත්‌තො චා’ති.

178. ‘‘ඉත්‌ථං ඛො මෙ, භන්‌තෙ, නිගණ්‌ඨො නාටපුත්‌තො සන්‌දිට්‌ඨිකං සාමඤ්‌ඤඵලං පුට්‌ඨො සමානො චාතුයාමසංවරං බ්‍යාකාසි. සෙය්‍යථාපි, භන්‌තෙ, අම්‌බං වා පුට්‌ඨො ලබුජං බ්‍යාකරෙය්‍ය, ලබුජං වා පුට්‌ඨො අම්‌බං බ්‍යාකරෙය්‍ය; එවමෙව ඛො මෙ, භන්‌තෙ, නිගණ්‌ඨො නාටපුත්‌තො සන්‌දිට්‌ඨිකං සාමඤ්‌ඤඵලං පුට්‌ඨො සමානො චාතුයාමසංවරං බ්‍යාකාසි. තස්‌ස මය්‌හං, භන්‌තෙ, එතදහොසි – ‘කථඤ්‌හි නාම මාදිසො සමණං වා බ්‍රාහ්‌මණං වා විජිතෙ වසන්‌තං අපසාදෙතබ්‌බං මඤ්‌ඤෙය්‍යා’ති . සො ඛො අහං, භන්‌තෙ, නිගණ්‌ඨස්‌ස නාටපුත්‌තස්‌ස භාසිතං නෙව අභිනන්‌දිං නප්‌පටික්‌කොසිං. අනභිනන්‌දිත්‌වා අප්‌පටික්‌කොසිත්‌වා අනත්‌තමනො අනත්‌තමනවාචං අනිච්‌ඡාරෙත්‌වා තමෙව වාචං අනුග්‌ගණ්‌හන්‌තො අනික්‌කුජ්‌ජන්‌තො උට්‌ඨායාසනා පක්‌කමිං.

සඤ්‌චයබෙලට්‌ඨපුත්‌තවාදො

179. ‘‘එකමිදාහං, භන්‌තෙ, සමයං යෙන සඤ්‌චයො බෙලට්‌ඨපුත්‌තො තෙනුපසඞ්‌කමිං; උපසඞ්‌කමිත්‌වා සඤ්‌චයෙන බෙලට්‌ඨපුත්‌තෙන සද්‌ධිං සම්‌මොදිං. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදිං. එකමන්‌තං නිසින්‌නො ඛො අහං භන්‌තෙ, සඤ්‌චයං බෙලට්‌ඨපුත්‌තං එතදවොචං – ‘යථා නු ඛො ඉමානි, භො සඤ්‌චය, පුථුසිප්‌පායතනානි…පෙ.… සක්‌කා නු ඛො, භො සඤ්‌චය, එවමෙව දිට්‌ඨෙව ධම්‌මෙ සන්‌දිට්‌ඨිකං සාමඤ්‌ඤඵලං පඤ්‌ඤපෙතු’න්‌ති?

180. ‘‘එවං වුත්‌තෙ, භන්‌තෙ, සඤ්‌චයො බෙලට්‌ඨපුත්‌තො මං එතදවොච – ‘අත්‌ථි පරො ලොකොති ඉති චෙ මං පුච්‌ඡසි, අත්‌ථි පරො ලොකොති ඉති චෙ මෙ අස්‌ස, අත්‌ථි පරො ලොකොති ඉති තෙ නං බ්‍යාකරෙය්‍යං. එවන්‌තිපි මෙ නො, තථාතිපි මෙ නො, අඤ්‌ඤථාතිපි මෙ නො, නොතිපි මෙ නො, නො නොතිපි මෙ නො. නත්‌ථි පරො ලොකො…පෙ.… අත්‌ථි ච නත්‌ථි ච පරො ලොකො…පෙ.… නෙවත්‌ථි න නත්‌ථි පරො ලොකො…පෙ.… අත්‌ථි සත්‌තා ඔපපාතිකා…පෙ.… නත්‌ථි සත්‌තා ඔපපාතිකා…පෙ.… අත්‌ථි ච නත්‌ථි ච සත්‌තා ඔපපාතිකා…පෙ.… නෙවත්‌ථි න නත්‌ථි සත්‌තා ඔපපාතිකා…පෙ.… අත්‌ථි සුකතදුක්‌කටානං කම්‌මානං ඵලං විපාකො…පෙ.… නත්‌ථි සුකතදුක්‌කටානං කම්‌මානං ඵලං විපාකො…පෙ.…අත්‌ථි ච නත්‌ථි ච සුකතදුක්‌කටානං කම්‌මානං ඵලං විපාකො…පෙ.… නෙවත්‌ථි න නත්‌ථි සුකතදුක්‌කටානං කම්‌මානං ඵලං විපාකො…පෙ.… හොති තථාගතො පරං මරණා…පෙ.… න හොති තථාගතො පරං මරණා…පෙ.… හොති ච න ච හොති තථාගතො පරං මරණා…පෙ.… නෙව හොති න න හොති තථාගතො පරං මරණාති ඉති චෙ මං පුච්‌ඡසි, නෙව හොති න න හොති තථාගතො පරං මරණාති ඉති චෙ මෙ අස්‌ස, නෙව හොති න න හොති තථාගතො පරං මරණාති ඉති තෙ නං බ්‍යාකරෙය්‍යං. එවන්‌තිපි මෙ නො, තථාතිපි මෙ නො, අඤ්‌ඤථාතිපි මෙ නො, නොතිපි මෙ නො, නො නොතිපි මෙ නො’ති.

181. ‘‘ඉත්‌ථං ඛො මෙ, භන්‌තෙ, සඤ්‌චයො බෙලට්‌ඨපුත්‌තො සන්‌දිට්‌ඨිකං සාමඤ්‌ඤඵලං පුට්‌ඨො සමානො වික්‌ඛෙපං බ්‍යාකාසි. සෙය්‍යථාපි, භන්‌තෙ, අම්‌බං වා පුට්‌ඨො ලබුජං බ්‍යාකරෙය්‍ය, ලබුජං වා පුට්‌ඨො අම්‌බං බ්‍යාකරෙය්‍ය; එවමෙව ඛො මෙ, භන්‌තෙ, සඤ්‌චයො බෙලට්‌ඨපුත්‌තො සන්‌දිට්‌ඨිකං සාමඤ්‌ඤඵලං පුට්‌ඨො සමානො වික්‌ඛෙපං බ්‍යාකාසි. තස්‌ස මය්‌හං, භන්‌තෙ, එතදහොසි – ‘අයඤ්‌ච ඉමෙසං සමණබ්‍රාහ්‌මණානං සබ්‌බබාලො සබ්‌බමූළ්‌හො. කථඤ්‌හි නාම සන්‌දිට්‌ඨිකං සාමඤ්‌ඤඵලං පුට්‌ඨො සමානො වික්‌ඛෙපං බ්‍යාකරිස්‌සතී’ති. තස්‌ස මය්‌හං, භන්‌තෙ, එතදහොසි – ‘කථඤ්‌හි නාම මාදිසො සමණං වා බ්‍රාහ්‌මණං වා විජිතෙ වසන්‌තං අපසාදෙතබ්‌බං මඤ්‌ඤෙය්‍යා’ති. සො ඛො අහං, භන්‌තෙ, සඤ්‌චයස්‌ස බෙලට්‌ඨපුත්‌තස්‌ස භාසිතං නෙව අභිනන්‌දිං නප්‌පටික්‌කොසිං. අනභිනන්‌දිත්‌වා අප්‌පටික්‌කොසිත්‌වා අනත්‌තමනො අනත්‌තමනවාචං අනිච්‌ඡාරෙත්‌වා තමෙව වාචං අනුග්‌ගණ්‌හන්‌තො අනික්‌කුජ්‌ජන්‌තො උට්‌ඨායාසනා පක්‌කමිං.

පඨමසන්‌දිට්‌ඨිකසාමඤ්‌ඤඵලං

182. ‘‘සොහං, භන්‌තෙ, භගවන්‌තම්‌පි පුච්‌ඡාමි – ‘යථා නු ඛො ඉමානි, භන්‌තෙ, පුථුසිප්‌පායතනානි සෙය්‍යථිදං – හත්‌ථාරොහා අස්‌සාරොහා රථිකා ධනුග්‌ගහාචෙලකා චලකා පිණ්‌ඩදායකා උග්‌ගා රාජපුත්‌තා පක්‌ඛන්‌දිනො මහානාගා සූරා චම්‌මයොධිනො දාසිකපුත්‌තා ආළාරිකා කප්‌පකා න්‌හාපකා සූදා මාලාකාරා රජකා පෙසකාරා නළකාරා කුම්‌භකාරා ගණකා මුද්‌දිකා, යානි වා පනඤ්‌ඤානිපි එවංගතානි පුථුසිප්‌පායතනානි, තෙ දිට්‌ඨෙව ධම්‌මෙ සන්‌දිට්‌ඨිකං සිප්‌පඵලං උපජීවන්‌ති, තෙ තෙන අත්‌තානං සුඛෙන්‌ති පීණෙන්‌ති, මාතාපිතරො සුඛෙන්‌ති පීණෙන්‌ති, පුත්‌තදාරං සුඛෙන්‌ති පීණෙන්‌ති, මිත්‌තාමච්‌චෙ සුඛෙන්‌ති පීණෙන්‌ති, සමණබ්‍රාහ්‌මණෙසු උද්‌ධග්‌ගිකං දක්‌ඛිණං පතිට්‌ඨපෙන්‌ති සොවග්‌ගිකං සුඛවිපාකං සග්‌ගසංවත්‌තනිකං. සක්‌කා නු ඛො මෙ , භන්‌තෙ, එවමෙව දිට්‌ඨෙව ධම්‌මෙ සන්‌දිට්‌ඨිකං සාමඤ්‌ඤඵලං පඤ්‌ඤපෙතු’න්‌ති?

183. ‘‘සක්‌කා, මහාරාජ. තෙන හි, මහාරාජ, තඤ්‌ඤෙවෙත්‌ථ පටිපුච්‌ඡිස්‌සාමි. යථා තෙ ඛමෙය්‍ය, තථා නං බ්‍යාකරෙය්‍යාසි. තං කිං මඤ්‌ඤසි, මහාරාජ, ඉධ තෙ අස්‌ස පුරිසො දාසො කම්‌මකාරො [කම්‌මකරො (සී. ස්‍යා. කං. පී.)] පුබ්‌බුට්‌ඨායී පච්‌ඡානිපාතී කිඞ්‌කාරපටිස්‌සාවී මනාපචාරී පියවාදී මුඛුල්‌ලොකකො [මුඛුල්‌ලොකිකො (ස්‍යා. කං. ක.)]. තස්‌ස එවමස්‌ස – ‘අච්‌ඡරියං, වත භො, අබ්‌භුතං, වත භො, පුඤ්‌ඤානං ගති, පුඤ්‌ඤානං විපාකො. අයඤ්‌හි රාජා මාගධො අජාතසත්‌තු වෙදෙහිපුත්‌තො මනුස්‌සො ; අහම්‌පි මනුස්‌සො. අයඤ්‌හි රාජා මාගධො අජාතසත්‌තු වෙදෙහිපුත්‌තො පඤ්‌චහි කාමගුණෙහි සමප්‌පිතො සමඞ්‌ගීභූතො පරිචාරෙති, දෙවො මඤ්‌ඤෙ. අහං පනම්‌හිස්‌ස දාසො කම්‌මකාරො පුබ්‌බුට්‌ඨායී පච්‌ඡානිපාතී කිඞ්‌කාරපටිස්‌සාවී මනාපචාරී පියවාදී මුඛුල්‌ලොකකො. සො වතස්‌සාහං පුඤ්‌ඤානි කරෙය්‍යං. යංනූනාහං කෙසමස්‌සුං ඔහාරෙත්‌වා කාසායානි වත්‌ථානි අච්‌ඡාදෙත්‌වා අගාරස්‌මා අනගාරියං පබ්‌බජෙය්‍ය’න්‌ති. සො අපරෙන සමයෙන කෙසමස්‌සුං ඔහාරෙත්‌වා කාසායානි වත්‌ථානි අච්‌ඡාදෙත්‌වා අගාරස්‌මා අනගාරියං පබ්‌බජෙය්‍ය. සො එවං පබ්‌බජිතො සමානො කායෙන සංවුතො විහරෙය්‍ය, වාචාය සංවුතො විහරෙය්‍ය, මනසා සංවුතො විහරෙය්‍ය, ඝාසච්‌ඡාදනපරමතාය සන්‌තුට්‌ඨො, අභිරතො පවිවෙකෙ. තං චෙ තෙ පුරිසා එවමාරොචෙය්‍යුං – ‘යග්‌ඝෙ දෙව ජානෙය්‍යාසි, යො තෙ සො පුරිසො [යො තෙ පුරිසො (සී. ක.)] දාසො කම්‌මකාරො පුබ්‌බුට්‌ඨායී පච්‌ඡානිපාතී කිඞ්‌කාරපටිස්‌සාවී මනාපචාරී පියවාදී මුඛුල්‌ලොකකො; සො, දෙව, කෙසමස්‌සුං ඔහාරෙත්‌වා කාසායානි වත්‌ථානි අච්‌ඡාදෙත්‌වා අගාරස්‌මා අනගාරියං පබ්‌බජිතො. සො එවං පබ්‌බජිතො සමානො කායෙන සංවුතො විහරති, වාචාය සංවුතො විහරති, මනසා සංවුතො විහරති, ඝාසච්‌ඡාදනපරමතාය සන්‌තුට්‌ඨො, අභිරතො පවිවෙකෙ’ති. අපි නු ත්‌වං එවං වදෙය්‍යාසි – ‘එතු මෙ, භො, සො පුරිසො, පුනදෙව හොතු දාසො කම්‌මකාරො පුබ්‌බුට්‌ඨායී පච්‌ඡානිපාතී කිඞ්‌කාරපටිස්‌සාවී මනාපචාරී පියවාදී මුඛුල්‌ලොකකො’ති?

184. ‘‘නො හෙතං, භන්‌තෙ. අථ ඛො නං මයමෙව අභිවාදෙය්‍යාමපි , පච්‌චුට්‌ඨෙය්‍යාමපි, ආසනෙනපි නිමන්‌තෙය්‍යාම, අභිනිමන්‌තෙය්‍යාමපි නං චීවරපිණ්‌ඩපාතසෙනාසනගිලානප්‌පච්‌චයභෙසජ්‌ජපරික්‌ඛාරෙහි, ධම්‌මිකම්‌පිස්‌ස රක්‌ඛාවරණගුත්‌තිං සංවිදහෙය්‍යාමා’’ති.

185. ‘‘තං කිං මඤ්‌ඤසි, මහාරාජ, යදි එවං සන්‌තෙ හොති වා සන්‌දිට්‌ඨිකං සාමඤ්‌ඤඵලං නො වා’’ති? ‘‘අද්‌ධා ඛො, භන්‌තෙ, එවං සන්‌තෙ හොති සන්‌දිට්‌ඨිකං සාමඤ්‌ඤඵල’’න්‌ති. ‘‘ඉදං ඛො තෙ, මහාරාජ, මයා පඨමං දිට්‌ඨෙව ධම්‌මෙ සන්‌දිට්‌ඨිකං සාමඤ්‌ඤඵලං පඤ්‌ඤත්‌ත’’න්‌ති.

දුතියසන්‌දිට්‌ඨිකසාමඤ්‌ඤඵලං

186. ‘‘සක්‌කා පන, භන්‌තෙ, අඤ්‌ඤම්‌පි එවමෙව දිට්‌ඨෙව ධම්‌මෙ සන්‌දිට්‌ඨිකං සාමඤ්‌ඤඵලං පඤ්‌ඤපෙතු’’න්‌ති? ‘‘සක්‌කා, මහාරාජ. තෙන හි, මහාරාජ, තඤ්‌ඤෙවෙත්‌ථ පටිපුච්‌ඡිස්‌සාමි. යථා තෙ ඛමෙය්‍ය, තථා නං බ්‍යාකරෙය්‍යාසි. තං කිං මඤ්‌ඤසි, මහාරාජ, ඉධ තෙ අස්‌ස පුරිසො කස්‌සකො ගහපතිකො කරකාරකො රාසිවඩ්‌ඪකො. තස්‌ස එවමස්‌ස – ‘අච්‌ඡරියං වත භො, අබ්‌භුතං වත භො, පුඤ්‌ඤානං ගති, පුඤ්‌ඤානං විපාකො. අයඤ්‌හි රාජා මාගධො අජාතසත්‌තු වෙදෙහිපුත්‌තො මනුස්‌සො, අහම්‌පි මනුස්‌සො. අයඤ්‌හි රාජා මාගධො අජාතසත්‌තු වෙදෙහිපුත්‌තො පඤ්‌චහි කාමගුණෙහි සමප්‌පිතො සමඞ්‌ගීභූතො පරිචාරෙති, දෙවො මඤ්‌ඤෙ. අහං පනම්‌හිස්‌ස කස්‌සකො ගහපතිකො කරකාරකො රාසිවඩ්‌ඪකො. සො වතස්‌සාහං පුඤ්‌ඤානි කරෙය්‍යං. යංනූනාහං කෙසමස්‌සුං ඔහාරෙත්‌වා කාසායානි වත්‌ථානි අච්‌ඡාදෙත්‌වා අගාරස්‌මා අනගාරියං පබ්‌බජෙය්‍ය’න්‌ති.

‘‘සො අපරෙන සමයෙන අප්‌පං වා භොගක්‌ඛන්‌ධං පහාය මහන්‌තං වා භොගක්‌ඛන්‌ධං පහාය, අප්‌පං වා ඤාතිපරිවට්‌ටං පහාය මහන්‌තං වා ඤාතිපරිවට්‌ටං පහාය කෙසමස්‌සුං ඔහාරෙත්‌වා කාසායානි වත්‌ථානි අච්‌ඡාදෙත්‌වා අගාරස්‌මා අනගාරියං පබ්‌බජෙය්‍ය. සො එවං පබ්‌බජිතො සමානො කායෙන සංවුතො විහරෙය්‍ය, වාචාය සංවුතො විහරෙය්‍ය, මනසා සංවුතො විහරෙය්‍ය, ඝාසච්‌ඡාදනපරමතාය සන්‌තුට්‌ඨො, අභිරතො පවිවෙකෙ. තං චෙ තෙ පුරිසා එවමාරොචෙය්‍යුං – ‘යග්‌ඝෙ, දෙව ජානෙය්‍යාසි, යො තෙ සො පුරිසො [යො තෙ පුරිසො (සී.)] කස්‌සකො ගහපතිකො කරකාරකො රාසිවඩ්‌ඪකො; සො දෙව කෙසමස්‌සුං ඔහාරෙත්‌වා කාසායානි වත්‌ථානි අච්‌ඡාදෙත්‌වා අගාරස්‌මා අනගාරියං පබ්‌බජිතො. සො එවං පබ්‌බජිතො සමානො කායෙන සංවුතො විහරති, වාචාය සංවුතො විහරති, මනසා සංවුතො විහරති, ඝාසච්‌ඡාදනපරමතාය සන්‌තුට්‌ඨො, අභිරතො පවිවෙකෙ’’ති. අපි නු ත්‌වං එවං වදෙය්‍යාසි – ‘එතු මෙ, භො, සො පුරිසො, පුනදෙව හොතු කස්‌සකො ගහපතිකො කරකාරකො රාසිවඩ්‌ඪකො’ති?

187. ‘‘නො හෙතං, භන්‌තෙ. අථ ඛො නං මයමෙව අභිවාදෙය්‍යාමපි, පච්‌චුට්‌ඨෙය්‍යාමපි, ආසනෙනපි නිමන්‌තෙය්‍යාම, අභිනිමන්‌තෙය්‍යාමපි නං චීවරපිණ්‌ඩපාතසෙනාසනගිලානප්‌පච්‌චයභෙසජ්‌ජපරික්‌ඛාරෙහි, ධම්‌මිකම්‌පිස්‌ස රක්‌ඛාවරණගුත්‌තිං සංවිදහෙය්‍යාමා’’ති.

188. ‘‘තං කිං මඤ්‌ඤසි, මහාරාජ? යදි එවං සන්‌තෙ හොති වා සන්‌දිට්‌ඨිකං සාමඤ්‌ඤඵලං නො වා’’ති? ‘‘අද්‌ධා ඛො, භන්‌තෙ, එවං සන්‌තෙ හොති සන්‌දිට්‌ඨිකං සාමඤ්‌ඤඵල’’න්‌ති . ‘‘ඉදං ඛො තෙ, මහාරාජ, මයා දුතියං දිට්‌ඨෙව ධම්‌මෙ සන්‌දිට්‌ඨිකං සාමඤ්‌ඤඵලං පඤ්‌ඤත්‌ත’’න්‌ති.

පණීතතරසාමඤ්‌ඤඵලං

189. ‘‘සක්‌කා පන, භන්‌තෙ, අඤ්‌ඤම්‌පි දිට්‌ඨෙව ධම්‌මෙ සන්‌දිට්‌ඨිකං සාමඤ්‌ඤඵලං පඤ්‌ඤපෙතුං ඉමෙහි සන්‌දිට්‌ඨිකෙහි සාමඤ්‌ඤඵලෙහි අභික්‌කන්‌තතරඤ්‌ච පණීතතරඤ්‌චා’’ති? ‘‘සක්‌කා, මහාරාජ. තෙන හි, මහාරාජ, සුණොහි, සාධුකං මනසි කරොහි, භාසිස්‌සාමී’’ති. ‘‘එවං, භන්‌තෙ’’ති ඛො රාජා මාගධො අජාතසත්‌තු වෙදෙහිපුත්‌තො භගවතො පච්‌චස්‌සොසි.

190. භගවා එතදවොච – ‘‘ඉධ, මහාරාජ, තථාගතො ලොකෙ උප්‌පජ්‌ජති අරහං සම්‌මාසම්‌බුද්‌ධො විජ්‌ජාචරණසම්‌පන්‌නො සුගතො ලොකවිදූ අනුත්‌තරො පුරිසදම්‌මසාරථි සත්‌ථා දෙවමනුස්‌සානං බුද්‌ධො භගවා. සො ඉමං ලොකං සදෙවකං සමාරකං සබ්‍රහ්‌මකං සස්‌සමණබ්‍රාහ්‌මණිං පජං සදෙවමනුස්‌සං සයං අභිඤ්‌ඤා සච්‌ඡිකත්‌වා පවෙදෙති. සො ධම්‌මං දෙසෙති ආදිකල්‍යාණං මජ්‌ඣෙකල්‍යාණං පරියොසානකල්‍යාණං සාත්‌ථං සබ්‍යඤ්‌ජනං, කෙවලපරිපුණ්‌ණං පරිසුද්‌ධං බ්‍රහ්‌මචරියං පකාසෙති.

191. ‘‘තං ධම්‌මං සුණාති ගහපති වා ගහපතිපුත්‌තො වා අඤ්‌ඤතරස්‌මිං වා කුලෙ පච්‌චාජාතො. සො තං ධම්‌මං සුත්‌වා තථාගතෙ සද්‌ධං පටිලභති. සො තෙන සද්‌ධාපටිලාභෙන සමන්‌නාගතො ඉති පටිසඤ්‌චික්‌ඛති – ‘සම්‌බාධො ඝරාවාසො රජොපථො, අබ්‌භොකාසො පබ්‌බජ්‌ජා. නයිදං සුකරං අගාරං අජ්‌ඣාවසතා එකන්‌තපරිපුණ්‌ණං එකන්‌තපරිසුද්‌ධං සඞ්‌ඛලිඛිතං බ්‍රහ්‌මචරියං චරිතුං. යංනූනාහං කෙසමස්‌සුං ඔහාරෙත්‌වා කාසායානි වත්‌ථානි අච්‌ඡාදෙත්‌වා අගාරස්‌මා අනගාරියංපබ්‌බජෙය්‍ය’න්‌ති.

192. ‘‘සො අපරෙන සමයෙන අප්‌පං වා භොගක්‌ඛන්‌ධං පහාය මහන්‌තං වා භොගක්‌ඛන්‌ධං පහාය අප්‌පං වා ඤාතිපරිවට්‌ටං පහාය මහන්‌තං වා ඤාතිපරිවට්‌ටං පහාය කෙසමස්‌සුං ඔහාරෙත්‌වා කාසායානි වත්‌ථානි අච්‌ඡාදෙත්‌වා අගාරස්‌මා අනගාරියං පබ්‌බජති.

193. ‘‘සො එවං පබ්‌බජිතො සමානො පාතිමොක්‌ඛසංවරසංවුතො විහරති ආචාරගොචරසම්‌පන්‌නො, අණුමත්‌තෙසු වජ්‌ජෙසු භයදස්‌සාවී, සමාදාය සික්‌ඛති සික්‌ඛාපදෙසු, කායකම්‌මවචීකම්‌මෙන සමන්‌නාගතො කුසලෙන, පරිසුද්‌ධාජීවො සීලසම්‌පන්‌නො, ඉන්‌ද්‍රියෙසු ගුත්‌තද්‌වාරො [ගුත්‌තද්‌වාරො, භොජනෙ මත්‌තඤ්‌ඤූ (ක.)], සතිසම්‌පජඤ්‌ඤෙන සමන්‌නාගතො, සන්‌තුට්‌ඨො.

චූළසීලං

194. ‘‘කථඤ්‌ච, මහාරාජ, භික්‌ඛු සීලසම්‌පන්‌නො හොති? ඉධ, මහාරාජ, භික්‌ඛු පාණාතිපාතං පහාය පාණාතිපාතා පටිවිරතො හොති. නිහිතදණ්‌ඩො නිහිතසත්‌ථො ලජ්‌ජී දයාපන්‌නො සබ්‌බපාණභූතහිතානුකම්‌පී විහරති. ඉදම්‌පිස්‌ස හොති සීලස්‌මිං.

‘‘අදින්‌නාදානං පහාය අදින්‌නාදානා පටිවිරතො හොති දින්‌නාදායී දින්‌නපාටිකඞ්‌ඛී, අථෙනෙන සුචිභූතෙන අත්‌තනා විහරති. ඉදම්‌පිස්‌ස හොති සීලස්‌මිං.

‘‘අබ්‍රහ්‌මචරියං පහාය බ්‍රහ්‌මචාරී හොති ආරාචාරී විරතො මෙථුනා ගාමධම්‌මා. ඉදම්‌පිස්‌ස හොති සීලස්‌මිං.

‘‘මුසාවාදං පහාය මුසාවාදා පටිවිරතො හොති සච්‌චවාදී සච්‌චසන්‌ධො ථෙතො පච්‌චයිකො අවිසංවාදකො ලොකස්‌ස. ඉදම්‌පිස්‌ස හොති සීලස්‌මිං.

‘‘පිසුණං වාචං පහාය පිසුණාය වාචාය පටිවිරතො හොති; ඉතො සුත්‌වා න අමුත්‍ර අක්‌ඛාතා ඉමෙසං භෙදාය; අමුත්‍ර වා සුත්‌වා න ඉමෙසං අක්‌ඛාතා, අමූසං භෙදාය. ඉති භින්‌නානං වා සන්‌ධාතා, සහිතානං වා අනුප්‌පදාතා, සමග්‌ගාරාමො සමග්‌ගරතො සමග්‌ගනන්‌දී සමග්‌ගකරණිං වාචං භාසිතා හොති. ඉදම්‌පිස්‌ස හොති සීලස්‌මිං.

‘‘ඵරුසං වාචං පහාය ඵරුසාය වාචාය පටිවිරතො හොති; යා සා වාචා නෙලා කණ්‌ණසුඛා පෙමනීයා හදයඞ්‌ගමා පොරී බහුජනකන්‌තා බහුජනමනාපා තථාරූපිං වාචං භාසිතා හොති. ඉදම්‌පිස්‌ස හොති සීලස්‌මිං.

‘‘සම්‌ඵප්‌පලාපං පහාය සම්‌ඵප්‌පලාපා පටිවිරතො හොති කාලවාදී භූතවාදී අත්‌ථවාදී ධම්‌මවාදී විනයවාදී, නිධානවතිං වාචං භාසිතා හොති කාලෙන සාපදෙසං පරියන්‌තවතිං අත්‌ථසංහිතං. ඉදම්‌පිස්‌ස හොති සීලස්‌මිං.

‘‘බීජගාමභූතගාමසමාරම්‌භා පටිවිරතො හොති…පෙ.… එකභත්‌තිකො හොති රත්‌තූපරතො විරතො විකාලභොජනා. නච්‌චගීතවාදිතවිසූකදස්‌සනා පටිවිරතො හොති. මාලාගන්‌ධවිලෙපනධාරණමණ්‌ඩනවිභූසනට්‌ඨානා පටිවිරතො හොති. උච්‌චාසයනමහාසයනා පටිවිරතො හොති. ජාතරූපරජතපටිග්‌ගහණා පටිවිරතො හොති. ආමකධඤ්‌ඤපටිග්‌ගහණා පටිවිරතො හොති. ආමකමංසපටිග්‌ගහණා පටිවිරතො හොති. ඉත්‌ථිකුමාරිකපටිග්‌ගහණා පටිවිරතො හොති. දාසිදාසපටිග්‌ගහණා පටිවිරතො හොති. අජෙළකපටිග්‌ගහණා පටිවිරතො හොති. කුක්‌කුටසූකරපටිග්‌ගහණා පටිවිරතො හොති. හත්‌ථිගවස්‌සවළවපටිග්‌ගහණා පටිවිරතො හොති. ඛෙත්‌තවත්‌ථුපටිග්‌ගහණා පටිවිරතො හොති . දූතෙය්‍යපහිණගමනානුයොගා පටිවිරතො හොති. කයවික්‌කයා පටිවිරතො හොති. තුලාකූටකංසකූටමානකූටා පටිවිරතො හොති. උක්‌කොටනවඤ්‌චනනිකතිසාචියොගා පටිවිරතො හොති. ඡෙදනවධබන්‌ධනවිපරාමොසආලොපසහසාකාරා පටිවිරතො හොති. ඉදම්‌පිස්‌ස හොති සීලස්‌මිං.

චූළසීලං නිට්‌ඨිතං.

මජ්‌ඣිමසීලං

195. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපං බීජගාමභූතගාමසමාරම්‌භං අනුයුත්‌තා විහරන්‌ති. සෙය්‍යථිදං – මූලබීජං ඛන්‌ධබීජං ඵළුබීජං අග්‌ගබීජං බීජබීජමෙව පඤ්‌චමං, ඉති එවරූපා බීජගාමභූතගාමසමාරම්‌භා පටිවිරතො හොති. ඉදම්‌පිස්‌ස හොති සීලස්‌මිං.

196. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපං සන්‌නිධිකාරපරිභොගං අනුයුත්‌තා විහරන්‌ති. සෙය්‍යථිදං – අන්‌නසන්‌නිධිං පානසන්‌නිධිං වත්‌ථසන්‌නිධිං යානසන්‌නිධිං සයනසන්‌නිධිං ගන්‌ධසන්‌නිධිං ආමිසසන්‌නිධිං, ඉති වා ඉති එවරූපා සන්‌නිධිකාරපරිභොගා පටිවිරතො හොති. ඉදම්‌පිස්‌ස හොති සීලස්‌මිං.

197. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපං විසූකදස්‌සනං අනුයුත්‌තා විහරන්‌ති. සෙය්‍යථිදං – නච්‌චං ගීතං වාදිතං පෙක්‌ඛං අක්‌ඛානං පාණිස්‌සරං වෙතාළං කුම්‌භථූණං සොභනකං චණ්‌ඩාලං වංසං ධොවනං හත්‌ථියුද්‌ධං අස්‌සයුද්‌ධං මහිංසයුද්‌ධං උසභයුද්‌ධං අජයුද්‌ධං මෙණ්‌ඩයුද්‌ධං කුක්‌කුටයුද්‌ධං වට්‌ටකයුද්‌ධං දණ්‌ඩයුද්‌ධං මුට්‌ඨියුද්‌ධං නිබ්‌බුද්‌ධං උය්‍යොධිකං බලග්‌ගං සෙනාබ්‍යූහං අනීකදස්‌සනං ඉති වා ඉති එවරූපා විසූකදස්‌සනා පටිවිරතො හොති. ඉදම්‌පිස්‌ස හොති සීලස්‌මිං.

198. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපං ජූතප්‌පමාදට්‌ඨානානුයොගං අනුයුත්‌තා විහරන්‌ති. සෙය්‍යථිදං – අට්‌ඨපදං දසපදං ආකාසං පරිහාරපථං සන්‌තිකං ඛලිකං ඝටිකං සලාකහත්‌ථං අක්‌ඛං පඞ්‌ගචීරං වඞ්‌කකං මොක්‌ඛචිකං චිඞ්‌ගුලිකං පත්‌තාළ්‌හකං රථකං ධනුකං අක්‌ඛරිකං මනෙසිකං යථාවජ්‌ජං ඉති වා ඉති එවරූපා ජූතප්‌පමාදට්‌ඨානානුයොගා පටිවිරතො හොති. ඉදම්‌පිස්‌ස හොති සීලස්‌මිං.

199. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපං උච්‌චාසයනමහාසයනං අනුයුත්‌තා විහරන්‌ති. සෙය්‍යථිදං – ආසන්‌දිං පල්‌ලඞ්‌කං ගොනකං චිත්‌තකං පටිකං පටලිකං තූලිකං විකතිකං උද්‌දලොමිං එකන්‌තලොමිං කට්‌ටිස්‌සං කොසෙය්‍යං කුත්‌තකං හත්‌ථත්‌ථරං අස්‌සත්‌ථරං රථත්‌ථරං අජිනප්‌පවෙණිං කදලිමිගපවරපච්‌චත්‌ථරණං සඋත්‌තරච්‌ඡදං උභතොලොහිතකූපධානං ඉති වා ඉති එවරූපා උච්‌චාසයනමහාසයනා පටිවිරතො හොති. ඉදම්‌පිස්‌ස හොති සීලස්‌මිං.

200. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපං මණ්‌ඩනවිභූසනට්‌ඨානානුයොගං අනුයුත්‌තා විහරන්‌ති. සෙය්‍යථිදං – උච්‌ඡාදනං පරිමද්‌දනං න්‌හාපනං සම්‌බාහනං ආදාසං අඤ්‌ජනං මාලාගන්‌ධවිලෙපනං මුඛචුණ්‌ණං මුඛලෙපනං හත්‌ථබන්‌ධං සිඛාබන්‌ධං දණ්‌ඩං නාළිකං අසිං [ඛග්‌ගං (සී. පී.), අසිං ඛග්‌ගං (ස්‍යා. කං.), ඛග්‌ගං අසිං (ක.)] ඡත්‌තං චිත්‍රුපාහනං උණ්‌හීසං මණිං වාලබීජනිං ඔදාතානි වත්‌ථානි දීඝදසානි ඉති වා ඉති එවරූපා මණ්‌ඩනවිභූසනට්‌ඨානානුයොගා පටිවිරතො හොති. ඉදම්‌පිස්‌ස හොති සීලස්‌මිං.

201. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපං තිරච්‌ඡානකථං අනුයුත්‌තා විහරන්‌ති. සෙය්‍යථිදං – රාජකථං චොරකථං මහාමත්‌තකථං සෙනාකථං භයකථං යුද්‌ධකථං අන්‌නකථං පානකථං වත්‌ථකථං සයනකථං මාලාකථං ගන්‌ධකථං ඤාතිකථං යානකථං ගාමකථං නිගමකථං නගරකථං ජනපදකථං ඉත්‌ථිකථං [ඉත්‌ථිකථං පුරිසකථං කුමාරකථං කුමාරිකථං (ක.)] සූරකථං විසිඛාකථං කුම්‌භට්‌ඨානකථං පුබ්‌බපෙතකථංනානත්‌තකථං ලොකක්‌ඛායිකං සමුද්‌දක්‌ඛායිකං ඉතිභවාභවකථං ඉති වා ඉති එවරූපාය තිරච්‌ඡානකථාය පටිවිරතො හොති. ඉදම්‌පිස්‌ස හොති සීලස්‌මිං.

202. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපං විග්‌ගාහිකකථං අනුයුත්‌තා විහරන්‌ති. සෙය්‍යථිදං – න ත්‌වං ඉමං ධම්‌මවිනයං ආජානාසි, අහං ඉමං ධම්‌මවිනයං ආජානාමි, කිං ත්‌වං ඉමං ධම්‌මවිනයං ආජානිස්‌සසි, මිච්‌ඡා පටිපන්‌නො ත්‌වමසි, අහමස්‌මි සම්‌මා පටිපන්‌නො, සහිතං මෙ, අසහිතං තෙ, පුරෙ වචනීයං පච්‌ඡා අවච, පච්‌ඡා වචනීයං පුරෙ අවච, අධිචිණ්‌ණං තෙ විපරාවත්‌තං, ආරොපිතො තෙ වාදො, නිග්‌ගහිතො ත්‌වමසි, චර වාදප්‌පමොක්‌ඛාය, නිබ්‌බෙඨෙහි වා සචෙ පහොසීති ඉති වා ඉති එවරූපාය විග්‌ගාහිකකථාය පටිවිරතො හොති. ඉදම්‌පිස්‌ස හොති සීලස්‌මිං.

203. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපං දූතෙය්‍යපහිණගමනානුයොගං අනුයුත්‌තා විහරන්‌ති. සෙය්‍යථිදං – රඤ්‌ඤං, රාජමහාමත්‌තානං, ඛත්‌තියානං, බ්‍රාහ්‌මණානං, ගහපතිකානං, කුමාරානං – ‘ඉධ ගච්‌ඡ, අමුත්‍රාගච්‌ඡ, ඉදං හර, අමුත්‍ර ඉදං ආහරා’ති ඉති වා ඉති එවරූපා දූතෙය්‍යපහිණගමනානුයොගා පටිවිරතො හොති. ඉදම්‌පිස්‌ස හොති සීලස්‌මිං.

204. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ කුහකා ච හොන්‌ති ලපකා ච නෙමිත්‌තිකා ච නිප්‌පෙසිකා ච ලාභෙන ලාභං නිජිගීංසිතාරො ච. ඉති එවරූපා කුහනලපනා පටිවිරතො හොති. ඉදම්‌පිස්‌ස හොති සීලස්‌මිං’’.

මජ්‌ඣිමසීලං නිට්‌ඨිතං.

මහාසීලං

205. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපාය තිරච්‌ඡානවිජ්‌ජාය මිච්‌ඡාජීවෙන ජීවිතං කප්‌පෙන්‌ති. සෙය්‍යථිදං – අඞ්‌ගං නිමිත්‌තං උප්‌පාතං සුපිනං ලක්‌ඛණං මූසිකච්‌ඡින්‌නං අග්‌ගිහොමං දබ්‌බිහොමං ථුසහොමං කණහොමං තණ්‌ඩුලහොමං සප්‌පිහොමං තෙලහොමංමුඛහොමං ලොහිතහොමං අඞ්‌ගවිජ්‌ජා වත්‌ථුවිජ්‌ජා ඛත්‌තවිජ්‌ජා සිවවිජ්‌ජා භූතවිජ්‌ජා භූරිවිජ්‌ජා අහිවිජ්‌ජා විසවිජ්‌ජා විච්‌ඡිකවිජ්‌ජා මූසිකවිජ්‌ජා සකුණවිජ්‌ජා වායසවිජ්‌ජා පක්‌කජ්‌ඣානං සරපරිත්‌තාණං මිගචක්‌කං ඉති වා ඉති එවරූපාය තිරච්‌ඡානවිජ්‌ජාය මිච්‌ඡාජීවා පටිවිරතො හොති. ඉදම්‌පිස්‌ස හොති සීලස්‌මිං.

206. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපාය තිරච්‌ඡානවිජ්‌ජාය මිච්‌ඡාජීවෙන ජීවිතං කප්‌පෙන්‌ති. සෙය්‍යථිදං – මණිලක්‌ඛණං වත්‌ථලක්‌ඛණං දණ්‌ඩලක්‌ඛණං සත්‌ථලක්‌ඛණං අසිලක්‌ඛණං උසුලක්‌ඛණං ධනුලක්‌ඛණං ආවුධලක්‌ඛණං ඉත්‌ථිලක්‌ඛණං පුරිසලක්‌ඛණං කුමාරලක්‌ඛණං කුමාරිලක්‌ඛණං දාසලක්‌ඛණං දාසිලක්‌ඛණං හත්‌ථිලක්‌ඛණං අස්‌සලක්‌ඛණං මහිංසලක්‌ඛණං උසභලක්‌ඛණං ගොලක්‌ඛණං අජලක්‌ඛණං මෙණ්‌ඩලක්‌ඛණං කුක්‌කුටලක්‌ඛණං වට්‌ටකලක්‌ඛණං ගොධාලක්‌ඛණං කණ්‌ණිකලක්‌ඛණං කච්‌ඡපලක්‌ඛණං මිගලක්‌ඛණං ඉති වා ඉති එවරූපාය තිරච්‌ඡානවිජ්‌ජාය මිච්‌ඡාජීවා පටිවිරතො හොති. ඉදම්‌පිස්‌ස හොති සීලස්‌මිං.

207. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපාය තිරච්‌ඡානවිජ්‌ජාය මිච්‌ඡාජීවෙන ජීවිතං කප්‌පෙන්‌ති. සෙය්‍යථිදං – රඤ්‌ඤං නිය්‍යානං භවිස්‌සති, රඤ්‌ඤං අනිය්‍යානං භවිස්‌සති, අබ්‌භන්‌තරානං රඤ්‌ඤං උපයානං භවිස්‌සති, බාහිරානං රඤ්‌ඤං අපයානං භවිස්‌සති, බාහිරානං රඤ්‌ඤං උපයානං භවිස්‌සති, අබ්‌භන්‌තරානං රඤ්‌ඤං අපයානං භවිස්‌සති, අබ්‌භන්‌තරානං රඤ්‌ඤං ජයො භවිස්‌සති, බාහිරානං රඤ්‌ඤං පරාජයො භවිස්‌සති, බාහිරානං රඤ්‌ඤං ජයො භවිස්‌සති, අබ්‌භන්‌තරානං රඤ්‌ඤං පරාජයො භවිස්‌සති, ඉති ඉමස්‌ස ජයො භවිස්‌සති, ඉමස්‌ස පරාජයො භවිස්‌සති ඉති වා ඉති එවරූපාය තිරච්‌ඡානවිජ්‌ජාය මිච්‌ඡාජීවා පටිවිරතො හොති. ඉදම්‌පිස්‌ස හොති සීලස්‌මිං.

208. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපාය තිරච්‌ඡානවිජ්‌ජාය මිච්‌ඡාජීවෙන ජීවිතං කප්‌පෙන්‌ති. සෙය්‍යථිදං – චන්‌දග්‌ගාහො භවිස්‌සති, සූරියග්‌ගාහො භවිස්‌සති, නක්‌ඛත්‌තග්‌ගාහො භවිස්‌සති, චන්‌දිමසූරියානං පථගමනං භවිස්‌සති, චන්‌දිමසූරියානං උප්‌පථගමනං භවිස්‌සති, නක්‌ඛත්‌තානං පථගමනං භවිස්‌සති, නක්‌ඛත්‌තානං උප්‌පථගමනං භවිස්‌සති , උක්‌කාපාතො භවිස්‌සති, දිසාඩාහො භවිස්‌සති, භූමිචාලො භවිස්‌සති, දෙවදුද්‍රභි භවිස්‌සති, චන්‌දිමසූරියනක්‌ඛත්‌තානං උග්‌ගමනං ඔගමනං සංකිලෙසං වොදානං භවිස්‌සති, එවංවිපාකො චන්‌දග්‌ගාහො භවිස්‌සති, එවංවිපාකො සූරියග්‌ගාහො භවිස්‌සති, එවංවිපාකො නක්‌ඛත්‌තග්‌ගාහො භවිස්‌සති, එවංවිපාකං චන්‌දිමසූරියානං පථගමනං භවිස්‌සති, එවංවිපාකං චන්‌දිමසූරියානං උප්‌පථගමනං භවිස්‌සති, එවංවිපාකං නක්‌ඛත්‌තානං පථගමනං භවිස්‌සති, එවංවිපාකං නක්‌ඛත්‌තානං උප්‌පථගමනං භවිස්‌සති, එවංවිපාකො උක්‌කාපාතො භවිස්‌සති, එවංවිපාකො දිසාඩාහො භවිස්‌සති, එවංවිපාකො භූමිචාලො භවිස්‌සති, එවංවිපාකො දෙවදුද්‍රභි භවිස්‌සති, එවංවිපාකං චන්‌දිමසූරියනක්‌ඛත්‌තානං උග්‌ගමනං ඔගමනං සංකිලෙසං වොදානං භවිස්‌සති ඉති වා ඉති එවරූපාය තිරච්‌ඡානවිජ්‌ජාය මිච්‌ඡාජීවා පටිවිරතො හොති. ඉදම්‌පිස්‌ස හොති සීලස්‌මිං.

209. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපාය තිරච්‌ඡානවිජ්‌ජාය මිච්‌ඡාජීවෙන ජීවිතං කප්‌පෙන්‌ති. සෙය්‍යථිදං – සුවුට්‌ඨිකා භවිස්‌සති, දුබ්‌බුට්‌ඨිකා භවිස්‌සති, සුභික්‌ඛං භවිස්‌සති, දුබ්‌භික්‌ඛං භවිස්‌සති, ඛෙමං භවිස්‌සති, භයං භවිස්‌සති, රොගො භවිස්‌සති, ආරොග්‍යං භවිස්‌සති, මුද්‌දා, ගණනා, සඞ්‌ඛානං, කාවෙය්‍යං, ලොකායතං ඉති වා ඉති එවරූපාය තිරච්‌ඡානවිජ්‌ජාය මිච්‌ඡාජීවා පටිවිරතො හොති. ඉදම්‌පිස්‌ස හොති සීලස්‌මිං.

210. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපාය තිරච්‌ඡානවිජ්‌ජාය මිච්‌ඡාජීවෙන ජීවිතං කප්‌පෙන්‌ති. සෙය්‍යථිදං – ආවාහනං විවාහනං සංවරණං විවරණං සඞ්‌කිරණං විකිරණං සුභගකරණං දුබ්‌භගකරණං විරුද්‌ධගබ්‌භකරණං ජිව්‌හානිබන්‌ධනං හනුසංහනනං හත්‌ථාභිජප්‌පනං හනුජප්‌පනං කණ්‌ණජප්‌පනං ආදාසපඤ්‌හං කුමාරිකපඤ්‌හං දෙවපඤ්‌හං ආදිච්‌චුපට්‌ඨානං මහතුපට්‌ඨානං අබ්‌භුජ්‌ජලනං සිරිව්‌හායනං ඉති වා ඉති එවරූපාය තිරච්‌ඡානවිජ්‌ජාය මිච්‌ඡාජීවා පටිවිරතො හොති. ඉදම්‌පිස්‌ස හොති සීලස්‌මිං.

211. ‘‘යථා වා පනෙකෙ භොන්‌තො සමණබ්‍රාහ්‌මණා සද්‌ධාදෙය්‍යානි භොජනානි භුඤ්‌ජිත්‌වා තෙ එවරූපාය තිරච්‌ඡානවිජ්‌ජාය මිච්‌ඡාජීවෙන ජීවිතං කප්‌පෙන්‌ති . සෙය්‍යථිදං – සන්‌තිකම්‌මං පණිධිකම්‌මං භූතකම්‌මං භූරිකම්‌මං වස්‌සකම්‌මං වොස්‌සකම්‌මං වත්‌ථුකම්‌මං වත්‌ථුපරිකම්‌මං ආචමනං න්‌හාපනං ජුහනං වමනං විරෙචනං උද්‌ධංවිරෙචනං අධොවිරෙචනං සීසවිරෙචනං කණ්‌ණතෙලං නෙත්‌තතප්‌පනං නත්‌ථුකම්‌මං අඤ්‌ජනං පච්‌චඤ්‌ජනං සාලාකියං සල්‌ලකත්‌තියං දාරකතිකිච්‌ඡා, මූලභෙසජ්‌ජානං අනුප්‌පදානං, ඔසධීනං පටිමොක්‌ඛො ඉති වා ඉති එවරූපාය තිරච්‌ඡානවිජ්‌ජාය මිච්‌ඡාජීවා පටිවිරතො හොති. ඉදම්‌පිස්‌ස හොති සීලස්‌මිං.

212. ‘‘ස ඛො සො, මහාරාජ, භික්‌ඛු එවං සීලසම්‌පන්‌නො න කුතොචි භයං සමනුපස්‌සති, යදිදං සීලසංවරතො. සෙය්‍යථාපි – මහාරාජ, රාජා ඛත්‌තියො මුද්‌ධාභිසිත්‌තො නිහතපච්‌චාමිත්‌තො කුතොචි භයං සමනුපස්‌සති, යදිදං පච්‌චත්‌ථිකතො; එවමෙව ඛො, මහාරාජ, භික්‌ඛු එවං සීලසම්‌පන්‌නො න කුතොචි භයං සමනුපස්‌සති, යදිදං සීලසංවරතො. සො ඉමිනා අරියෙන සීලක්‌ඛන්‌ධෙන සමන්‌නාගතො අජ්‌ඣත්‌තං අනවජ්‌ජසුඛං පටිසංවෙදෙති. එවං ඛො, මහාරාජ, භික්‌ඛු සීලසම්‌පන්‌නො හොති.

මහාසීලං නිට්‌ඨිතං.

ඉන්‌ද්‍රියසංවරො

213. ‘‘කථඤ්‌ච, මහාරාජ, භික්‌ඛු ඉන්‌ද්‍රියෙසු ගුත්‌තද්‌වාරො හොති? ඉධ, මහාරාජ, භික්‌ඛු චක්‌ඛුනා රූපං දිස්‌වා න නිමිත්‌තග්‌ගාහී හොති නානුබ්‍යඤ්‌ජනග්‌ගාහී. යත්‌වාධිකරණමෙනං චක්‌ඛුන්‌ද්‍රියං අසංවුතං විහරන්‌තං අභිජ්‌ඣා දොමනස්‌සා පාපකා අකුසලා ධම්‌මා අන්‌වාස්‌සවෙය්‍යුං, තස්‌ස සංවරාය පටිපජ්‌ජති, රක්‌ඛති චක්‌ඛුන්‌ද්‍රියං, චක්‌ඛුන්‌ද්‍රියෙ සංවරං ආපජ්‌ජති. සොතෙන සද්‌දං සුත්‌වා…පෙ.… ඝානෙන ගන්‌ධං ඝායිත්‌වා…පෙ.… ජිව්‌හාය රසං සායිත්‌වා…පෙ.… කායෙන ඵොට්‌ඨබ්‌බං ඵුසිත්‌වා…පෙ.… මනසා ධම්‌මං විඤ්‌ඤාය න නිමිත්‌තග්‌ගාහී හොති නානුබ්‍යඤ්‌ජනග්‌ගාහී. යත්‌වාධිකරණමෙනං මනින්‌ද්‍රියං අසංවුතං විහරන්‌තං අභිජ්‌ඣා දොමනස්‌සා පාපකා අකුසලා ධම්‌මා අන්‌වාස්‌සවෙය්‍යුං, තස්‌ස සංවරාය පටිපජ්‌ජති, රක්‌ඛති මනින්‌ද්‍රියං, මනින්‌ද්‍රියෙ සංවරං ආපජ්‌ජති. සො ඉමිනා අරියෙන ඉන්‌ද්‍රියසංවරෙන සමන්‌නාගතො අජ්‌ඣත්‌තං අබ්‍යාසෙකසුඛං පටිසංවෙදෙති. එවං ඛො, මහාරාජ, භික්‌ඛු ඉන්‌ද්‍රියෙසු ගුත්‌තද්‌වාරො හොති.

සතිසම්‌පජඤ්‌ඤං

214. ‘‘කථඤ්‌ච , මහාරාජ, භික්‌ඛු සතිසම්‌පජඤ්‌ඤෙන සමන්‌නාගතො හොති? ඉධ, මහාරාජ, භික්‌ඛු අභික්‌කන්‌තෙ පටික්‌කන්‌තෙ සම්‌පජානකාරී හොති, ආලොකිතෙ විලොකිතෙ සම්‌පජානකාරී හොති, සමිඤ්‌ජිතෙ පසාරිතෙ සම්‌පජානකාරී හොති, සඞ්‌ඝාටිපත්‌තචීවරධාරණෙ සම්‌පජානකාරී හොති, අසිතෙ පීතෙ ඛායිතෙ සායිතෙ සම්‌පජානකාරී හොති, උච්‌චාරපස්‌සාවකම්‌මෙ සම්‌පජානකාරී හොති, ගතෙ ඨිතෙ නිසින්‌නෙ සුත්‌තෙ ජාගරිතෙ භාසිතෙ තුණ්‌හීභාවෙ සම්‌පජානකාරී හොති. එවං ඛො, මහාරාජ , භික්‌ඛු සතිසම්‌පජඤ්‌ඤෙන සමන්‌නාගතො හොති.

සන්‌තොසො

215. ‘‘කථඤ්‌ච, මහාරාජ, භික්‌ඛු සන්‌තුට්‌ඨො හොති? ඉධ, මහාරාජ, භික්‌ඛු සන්‌තුට්‌ඨො හොති කායපරිහාරිකෙන චීවරෙන, කුච්‌ඡිපරිහාරිකෙන පිණ්‌ඩපාතෙන . සො යෙන යෙනෙව පක්‌කමති, සමාදායෙව පක්‌කමති. සෙය්‍යථාපි, මහාරාජ, පක්‌ඛී සකුණො යෙන යෙනෙව ඩෙති, සපත්‌තභාරොව ඩෙති. එවමෙව ඛො, මහාරාජ, භික්‌ඛු සන්‌තුට්‌ඨො හොති කායපරිහාරිකෙන චීවරෙන කුච්‌ඡිපරිහාරිකෙන පිණ්‌ඩපාතෙන. සො යෙන යෙනෙව පක්‌කමති, සමාදායෙව පක්‌කමති. එවං ඛො, මහාරාජ, භික්‌ඛු සන්‌තුට්‌ඨො හොති.

නීවරණප්‌පහානං

216. ‘‘සො ඉමිනා ච අරියෙන සීලක්‌ඛන්‌ධෙන සමන්‌නාගතො, ඉමිනා ච අරියෙන ඉන්‌ද්‍රියසංවරෙන සමන්‌නාගතො, ඉමිනා ච අරියෙන සතිසම්‌පජඤ්‌ඤෙන සමන්‌නාගතො, ඉමාය ච අරියාය සන්‌තුට්‌ඨියා සමන්‌නාගතො, විවිත්‌තං සෙනාසනං භජති අරඤ්‌ඤං රුක්‌ඛමූලං පබ්‌බතං කන්‌දරං ගිරිගුහං සුසානං වනපත්‌ථං අබ්‌භොකාසං පලාලපුඤ්‌ජං. සො පච්‌ඡාභත්‌තං පිණ්‌ඩපාතප්‌පටික්‌කන්‌තො නිසීදති පල්‌ලඞ්‌කං ආභුජිත්‌වා උජුං කායං පණිධාය පරිමුඛං සතිං උපට්‌ඨපෙත්‌වා.

217. ‘‘සො අභිජ්‌ඣං ලොකෙ පහාය විගතාභිජ්‌ඣෙන චෙතසා විහරති, අභිජ්‌ඣාය චිත්‌තං පරිසොධෙති. බ්‍යාපාදපදොසං පහාය අබ්‍යාපන්‌නචිත්‌තො විහරති සබ්‌බපාණභූතහිතානුකම්‌පී, බ්‍යාපාදපදොසා චිත්‌තං පරිසොධෙති. ථිනමිද්‌ධං පහාය විගතථිනමිද්‌ධො විහරති ආලොකසඤ්‌ඤී, සතො සම්‌පජානො, ථිනමිද්‌ධා චිත්‌තං පරිසොධෙති. උද්‌ධච්‌චකුක්‌කුච්‌චං පහාය අනුද්‌ධතො විහරති, අජ්‌ඣත්‌තං වූපසන්‌තචිත්‌තො, උද්‌ධච්‌චකුක්‌කුච්‌චා චිත්‌තං පරිසොධෙති. විචිකිච්‌ඡං පහාය තිණ්‌ණවිචිකිච්‌ඡො විහරති, අකථංකථී කුසලෙසු ධම්‌මෙසු, විචිකිච්‌ඡාය චිත්‌තං පරිසොධෙති.

218. ‘‘සෙය්‍යථාපි , මහාරාජ, පුරිසො ඉණං ආදාය කම්‌මන්‌තෙ පයොජෙය්‍ය. තස්‌ස තෙ කම්‌මන්‌තා සමිජ්‌ඣෙය්‍යුං. සො යානි ච පොරාණානි ඉණමූලානි, තානි ච බ්‍යන්‌තිං කරෙය්‍ය [බ්‍යන්‌තීකරෙය්‍ය (සී. ස්‍යා. කං.)], සියා චස්‌ස උත්‌තරිං අවසිට්‌ඨං දාරභරණාය. තස්‌ස එවමස්‌ස – ‘අහං ඛො පුබ්‌බෙ ඉණං ආදාය කම්‌මන්‌තෙපයොජෙසිං. තස්‌ස මෙ තෙ කම්‌මන්‌තා සමිජ්‌ඣිංසු. සොහං යානි ච පොරාණානි ඉණමූලානි, තානි ච බ්‍යන්‌තිං අකාසිං, අත්‌ථි ච මෙ උත්‌තරිං අවසිට්‌ඨං දාරභරණායා’ති. සො තතොනිදානං ලභෙථ පාමොජ්‌ජං, අධිගච්‌ඡෙය්‍ය සොමනස්‌සං.

219. ‘‘සෙය්‍යථාපි, මහාරාජ, පුරිසො ආබාධිකො අස්‌ස දුක්‌ඛිතො බාළ්‌හගිලානො; භත්‌තඤ්‌චස්‌ස නච්‌ඡාදෙය්‍ය, න චස්‌ස කායෙ බලමත්‌තා. සො අපරෙන සමයෙන තම්‌හා ආබාධා මුච්‌චෙය්‍ය; භත්‌තං චස්‌ස ඡාදෙය්‍ය, සියා චස්‌ස කායෙ බලමත්‌තා. තස්‌ස එවමස්‌ස – ‘අහං ඛො පුබ්‌බෙ ආබාධිකො අහොසිං දුක්‌ඛිතො බාළ්‌හගිලානො; භත්‌තඤ්‌ච මෙ නච්‌ඡාදෙසි, න ච මෙ ආසි [න චස්‌ස මෙ (ක.)] කායෙ බලමත්‌තා. සොම්‌හි එතරහි තම්‌හා ආබාධා මුත්‌තො; භත්‌තඤ්‌ච මෙ ඡාදෙති, අත්‌ථි ච මෙ කායෙ බලමත්‌තා’ති. සො තතොනිදානං ලභෙථ පාමොජ්‌ජං, අධිගච්‌ඡෙය්‍ය සොමනස්‌සං.

220. ‘‘සෙය්‍යථාපි, මහාරාජ, පුරිසො බන්‌ධනාගාරෙ බද්‌ධො අස්‌ස. සො අපරෙන සමයෙන තම්‌හා බන්‌ධනාගාරා මුච්‌චෙය්‍ය සොත්‌ථිනා අබ්‌භයෙන [උබ්‌බයෙන (සී. ක.)], න චස්‌ස කිඤ්‌චි භොගානං වයො. තස්‌ස එවමස්‌ස – ‘අහං ඛො පුබ්‌බෙ බන්‌ධනාගාරෙ බද්‌ධො අහොසිං, සොම්‌හි එතරහි තම්‌හා බන්‌ධනාගාරා මුත්‌තොසොත්‌ථිනා අබ්‌භයෙන. නත්‌ථි ච මෙ කිඤ්‌චි භොගානං වයො’ති. සො තතොනිදානං ලභෙථ පාමොජ්‌ජං, අධිගච්‌ඡෙය්‍ය සොමනස්‌සං.

221. ‘‘සෙය්‍යථාපි, මහාරාජ, පුරිසො දාසො අස්‌ස අනත්‌තාධීනො පරාධීනො න යෙනකාමංගමො. සො අපරෙන සමයෙන තම්‌හා දාසබ්‍යා මුච්‌චෙය්‍ය අත්‌තාධීනො අපරාධීනො භුජිස්‌සො යෙනකාමංගමො. තස්‌ස එවමස්‌ස – ‘අහං ඛො පුබ්‌බෙ දාසො අහොසිං අනත්‌තාධීනො පරාධීනො න යෙනකාමංගමො. සොම්‌හි එතරහි තම්‌හා දාසබ්‍යා මුත්‌තො අත්‌තාධීනො අපරාධීනො භුජිස්‌සො යෙනකාමංගමො’ති. සො තතොනිදානං ලභෙථ පාමොජ්‌ජං, අධිගච්‌ඡෙය්‍ය සොමනස්‌සං.

222. ‘‘සෙය්‍යථාපි, මහාරාජ, පුරිසො සධනො සභොගො කන්‌තාරද්‌ධානමග්‌ගං පටිපජ්‌ජෙය්‍ය දුබ්‌භික්‌ඛං සප්‌පටිභයං. සො අපරෙන සමයෙන තං කන්‌තාරං නිත්‌ථරෙය්‍ය සොත්‌ථිනා, ගාමන්‌තං අනුපාපුණෙය්‍ය ඛෙමං අප්‌පටිභයං. තස්‌ස එවමස්‌ස – ‘අහං ඛො පුබ්‌බෙ සධනො සභොගො කන්‌තාරද්‌ධානමග්‌ගං පටිපජ්‌ජිං දුබ්‌භික්‌ඛං සප්‌පටිභයං. සොම්‌හි එතරහි තං කන්‌තාරං නිත්‌ථිණ්‌ණො සොත්‌ථිනා, ගාමන්‌තං අනුප්‌පත්‌තො ඛෙමං අප්‌පටිභය’න්‌ති. සො තතොනිදානං ලභෙථ පාමොජ්‌ජං, අධිගච්‌ඡෙය්‍ය සොමනස්‌සං.

223. ‘‘එවමෙව ඛො, මහාරාජ, භික්‌ඛු යථා ඉණං යථා රොගං යථා බන්‌ධනාගාරං යථා දාසබ්‍යං යථා කන්‌තාරද්‌ධානමග්‌ගං, එවං ඉමෙ පඤ්‌ච නීවරණෙ අප්‌පහීනෙ අත්‌තනි සමනුපස්‌සති.

224. ‘‘සෙය්‍යථාපි, මහාරාජ, යථා ආණණ්‍යං යථා ආරොග්‍යං යථා බන්‌ධනාමොක්‌ඛං යථා භුජිස්‌සං යථා ඛෙමන්‌තභූමිං; එවමෙව ඛො, මහාරාජ, භික්‌ඛු ඉමෙ පඤ්‌ච නීවරණෙ පහීනෙ අත්‌තනි සමනුපස්‌සති.

225. ‘‘තස්‌සිමෙ පඤ්‌ච නීවරණෙ පහීනෙ අත්‌තනි සමනුපස්‌සතො පාමොජ්‌ජං ජායති, පමුදිතස්‌ස පීති ජායති, පීතිමනස්‌ස කායො පස්‌සම්‌භති, පස්‌සද්‌ධකායො සුඛං වෙදෙති, සුඛිනො චිත්‌තං සමාධියති.

පඨමජ්‌ඣානං

226. ‘‘සො විවිච්‌චෙව කාමෙහි, විවිච්‌ච අකුසලෙහි ධම්‌මෙහි සවිතක්‌කං සවිචාරං විවෙකජං පීතිසුඛං පඨමං ඣානං උපසම්‌පජ්‌ජ විහරති. සො ඉමමෙව කායං විවෙකජෙන පීතිසුඛෙන අභිසන්‌දෙති පරිසන්‌දෙති පරිපූරෙති පරිප්‌ඵරති, නාස්‌ස කිඤ්‌චි සබ්‌බාවතො කායස්‌ස විවෙකජෙන පීතිසුඛෙන අප්‌ඵුටං හොති.

227. ‘‘සෙය්‍යථාපි , මහාරාජ, දක්‌ඛො න්‌හාපකො වා න්‌හාපකන්‌තෙවාසී වා කංසථාලෙ න්‌හානීයචුණ්‌ණානි ආකිරිත්‌වා උදකෙන පරිප්‌ඵොසකං පරිප්‌ඵොසකං සන්‌නෙය්‍ය, සායං න්‌හානීයපිණ්‌ඩි ස්‌නෙහානුගතා ස්‌නෙහපරෙතා සන්‌තරබාහිරා ඵුටා ස්‌නෙහෙන, න ච පග්‌ඝරණී; එවමෙව ඛො, මහාරාජ, භික්‌ඛු ඉමමෙව කායං විවෙකජෙන පීතිසුඛෙන අභිසන්‌දෙති පරිසන්‌දෙති පරිපූරෙති පරිප්‌ඵරති, නාස්‌ස කිඤ්‌චි සබ්‌බාවතො කායස්‌ස විවෙකජෙන පීතිසුඛෙන අප්‌ඵුටං හොති. ඉදම්‌පි ඛො, මහාරාජ, සන්‌දිට්‌ඨිකං සාමඤ්‌ඤඵලං පුරිමෙහි සන්‌දිට්‌ඨිකෙහි සාමඤ්‌ඤඵලෙහි අභික්‌කන්‌තතරඤ්‌ච පණීතතරඤ්‌ච.

දුතියජ්‌ඣානං

228. ‘‘පුන චපරං, මහාරාජ, භික්‌ඛු විතක්‌කවිචාරානං වූපසමා අජ්‌ඣත්‌තං සම්‌පසාදනං චෙතසො එකොදිභාවං අවිතක්‌කං අවිචාරං සමාධිජං පීතිසුඛං දුතියං ඣානං උපසම්‌පජ්‌ජ විහරති. සො ඉමමෙව කායං සමාධිජෙන පීතිසුඛෙන අභිසන්‌දෙති පරිසන්‌දෙති පරිපූරෙති පරිප්‌ඵරති, නාස්‌ස කිඤ්‌චි සබ්‌බාවතො කායස්‌ස සමාධිජෙන පීතිසුඛෙන අප්‌ඵුටං හොති.

229. ‘‘සෙය්‍යථාපි, මහාරාජ, උදකරහදො ගම්‌භීරො උබ්‌භිදොදකො [උබ්‌භිතොදකො (ස්‍යා. කං. ක.)] තස්‌ස නෙවස්‌ස පුරත්‌ථිමාය දිසාය උදකස්‌ස ආයමුඛං, න දක්‌ඛිණාය දිසාය උදකස්‌ස ආයමුඛං, න පච්‌ඡිමාය දිසාය උදකස්‌ස ආයමුඛං, න උත්‌තරාය දිසාය උදකස්‌ස ආයමුඛං, දෙවො ච න කාලෙනකාලං සම්‌මාධාරං අනුප්‌පවෙච්‌ඡෙය්‍ය. අථ ඛො තම්‌හාව උදකරහදා සීතා වාරිධාරා උබ්‌භිජ්‌ජිත්‌වා තමෙව උදකරහදං සීතෙන වාරිනා අභිසන්‌දෙය්‍ය පරිසන්‌දෙය්‍ය පරිපූරෙය්‍ය පරිප්‌ඵරෙය්‍ය, නාස්‌ස කිඤ්‌චි සබ්‌බාවතො උදකරහදස්‌ස සීතෙන වාරිනා අප්‌ඵුටං අස්‌ස. එවමෙව ඛො, මහාරාජ, භික්‌ඛු ඉමමෙව කායං සමාධිජෙන පීතිසුඛෙන අභිසන්‌දෙති පරිසන්‌දෙති පරිපූරෙති පරිප්‌ඵරති, නාස්‌ස කිඤ්‌චි සබ්‌බාවතො කායස්‌ස සමාධිජෙන පීතිසුඛෙන අප්‌ඵුටං හොති. ඉදම්‌පි ඛො, මහාරාජ, සන්‌දිට්‌ඨිකං සාමඤ්‌ඤඵලං පුරිමෙහි සන්‌දිට්‌ඨිකෙහි සාමඤ්‌ඤඵලෙහි අභික්‌කන්‌තතරඤ්‌ච පණීතතරඤ්‌ච.

තතියජ්‌ඣානං

230. ‘‘පුන චපරං, මහාරාජ, භික්‌ඛු පීතියා ච විරාගා උපෙක්‌ඛකො ච විහරති සතො සම්‌පජානො, සුඛඤ්‌ච කායෙන පටිසංවෙදෙති, යං තං අරියා ආචික්‌ඛන්‌ති – ‘උපෙක්‌ඛකො සතිමා සුඛවිහාරී’ති, තතියං ඣානං උපසම්‌පජ්‌ජ විහරති. සො ඉමමෙව කායං නිප්‌පීතිකෙන සුඛෙන අභිසන්‌දෙති පරිසන්‌දෙති පරිපූරෙති පරිප්‌ඵරති, නාස්‌ස කිඤ්‌චි සබ්‌බාවතො කායස්‌ස නිප්‌පීතිකෙන සුඛෙන අප්‌ඵුටං හොති.

231. ‘‘සෙය්‍යථාපි, මහාරාජ, උප්‌පලිනියං වා පදුමිනියං වා පුණ්‌ඩරීකිනියං වා අප්‌පෙකච්‌චානි උප්‌පලානි වා පදුමානි වා පුණ්‌ඩරීකානි වා උදකෙ ජාතානි උදකෙ සංවඩ්‌ඪානි උදකානුග්‌ගතානි අන්‌තොනිමුග්‌ගපොසීනි, තානි යාව චග්‌ගා යාව ච මූලා සීතෙන වාරිනා අභිසන්‌නානි පරිසන්‌නානි [අභිසන්‌දානි පරිසන්‌දානි (ක.)]පරිපූරානි පරිප්‌ඵුටානි [පරිප්‌ඵුට්‌ඨානි (පී.)], නාස්‌ස කිඤ්‌චි සබ්‌බාවතං උප්‌පලානං වා පදුමානං වා පුණ්‌ඩරීකානං වා සීතෙන වාරිනා අප්‌ඵුටං අස්‌ස; එවමෙව ඛො, මහාරාජ, භික්‌ඛු ඉමමෙව කායං නිප්‌පීතිකෙන සුඛෙන අභිසන්‌දෙති පරිසන්‌දෙති පරිපූරෙති පරිප්‌ඵරති, නාස්‌ස කිඤ්‌චි සබ්‌බාවතො කායස්‌ස නිප්‌පීතිකෙන සුඛෙන අප්‌ඵුටං හොති. ඉදම්‌පි ඛො, මහාරාජ, සන්‌දිට්‌ඨිකං සාමඤ්‌ඤඵලං පුරිමෙහි සන්‌දිට්‌ඨිකෙහි සාමඤ්‌ඤඵලෙහි අභික්‌කන්‌තතරඤ්‌ච පණීතතරඤ්‌ච.

චතුත්‌ථජ්‌ඣානං

232. ‘‘පුන චපරං, මහාරාජ, භික්‌ඛු සුඛස්‌ස ච පහානා දුක්‌ඛස්‌ස ච පහානා, පුබ්‌බෙව සොමනස්‌සදොමනස්‌සානං අත්‌ථඞ්‌ගමා අදුක්‌ඛමසුඛං උපෙක්‌ඛාසතිපාරිසුද්‌ධිං චතුත්‌ථං ඣානං උපසම්‌පජ්‌ජ විහරති, සො ඉමමෙව කායං පරිසුද්‌ධෙන චෙතසා පරියොදාතෙන ඵරිත්‌වා නිසින්‌නො හොති, නාස්‌ස කිඤ්‌චි සබ්‌බාවතො කායස්‌ස පරිසුද්‌ධෙන චෙතසා පරියොදාතෙන අප්‌ඵුටං හොති.

233. ‘‘සෙය්‍යථාපි , මහාරාජ, පුරිසො ඔදාතෙන වත්‌ථෙන සසීසං පාරුපිත්‌වා නිසින්‌නො අස්‌ස, නාස්‌ස කිඤ්‌චි සබ්‌බාවතො කායස්‌ස ඔදාතෙන වත්‌ථෙන අප්‌ඵුටං අස්‌ස; එවමෙව ඛො, මහාරාජ, භික්‌ඛු ඉමමෙව කායං පරිසුද්‌ධෙන චෙතසා පරියොදාතෙන ඵරිත්‌වා නිසින්‌නො හොති, නාස්‌ස කිඤ්‌චි සබ්‌බාවතො කායස්‌ස පරිසුද්‌ධෙන චෙතසා පරියොදාතෙන අප්‌ඵුටං හොති. ඉදම්‌පි ඛො, මහාරාජ, සන්‌දිට්‌ඨිකං සාමඤ්‌ඤඵලං පුරිමෙහි සන්‌දිට්‌ඨිකෙහි සාමඤ්‌ඤඵලෙහි අභික්‌කන්‌තතරඤ්‌ච පණීතතරඤ්‌ච.

විපස්‌සනාඤාණං

234. ‘‘සො [පුන චපරං මහාරාජ භික්‌ඛු සො (ක.)] එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ ඤාණදස්‌සනාය චිත්‌තං අභිනීහරති අභිනින්‌නාමෙති. සො එවං පජානාති – ‘අයං ඛො මෙ කායො රූපී චාතුමහාභූතිකො මාතාපෙත්‌තිකසම්‌භවො ඔදනකුම්‌මාසූපචයො අනිච්‌චුච්‌ඡාදන-පරිමද්‌දන-භෙදන-විද්‌ධංසන-ධම්‌මො; ඉදඤ්‌ච පන මෙ විඤ්‌ඤාණං එත්‌ථ සිතං එත්‌ථ පටිබද්‌ධ’න්‌ති.

235. ‘‘සෙය්‍යථාපි, මහාරාජ, මණි වෙළුරියො සුභො ජාතිමා අට්‌ඨංසො සුපරිකම්‌මකතො අච්‌ඡො විප්‌පසන්‌නො අනාවිලො සබ්‌බාකාරසම්‌පන්‌නො. තත්‍රාස්‌ස සුත්‌තං ආවුතං නීලං වා පීතං වා ලොහිතං වා [පීතකං වා ලොහිතකං වා (ක.)] ඔදාතං වා පණ්‌ඩුසුත්‌තං වා. තමෙනං චක්‌ඛුමා පුරිසො හත්‌ථෙ කරිත්‌වා පච්‌චවෙක්‌ඛෙය්‍ය – ‘අයං ඛො මණි වෙළුරියො සුභො ජාතිමා අට්‌ඨංසො සුපරිකම්‌මකතො අච්‌ඡො විප්‌පසන්‌නො අනාවිලො සබ්‌බාකාරසම්‌පන්‌නො; තත්‍රිදං සුත්‌තං ආවුතං නීලං වා පීතං වා ලොහිතං වා ඔදාතං වා පණ්‌ඩුසුත්‌තං වා’ති. එවමෙව ඛො, මහාරාජ, භික්‌ඛු එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ ඤාණදස්‌සනාය චිත්‌තං අභිනීහරති අභිනින්‌නාමෙති. සො එවං පජානාති – ‘අයං ඛො මෙ කායො රූපී චාතුමහාභූතිකො මාතාපෙත්‌තිකසම්‌භවො ඔදනකුම්‌මාසූපචයො අනිච්‌චුච්‌ඡාදනපරිමද්‌දනභෙදනවිද්‌ධංසනධම්‌මො; ඉදඤ්‌ච පන මෙ විඤ්‌ඤාණං එත්‌ථ සිතං එත්‌ථ පටිබද්‌ධ’න්‌ති. ඉදම්‌පි ඛො, මහාරාජ , සන්‌දිට්‌ඨිකං සාමඤ්‌ඤඵලං පුරිමෙහි සන්‌දිට්‌ඨිකෙහි සාමඤ්‌ඤඵලෙහි අභික්‌කන්‌තතරඤ්‌ච පණීතතරඤ්‌ච.

මනොමයිද්‌ධිඤාණං

236. ‘‘සො එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ මනොමයං කායං අභිනිම්‌මානාය චිත්‌තං අභිනීහරති අභිනින්‌නාමෙති. සො ඉමම්‌හා කායා අඤ්‌ඤං කායං අභිනිම්‌මිනාති රූපිං මනොමයං සබ්‌බඞ්‌ගපච්‌චඞ්‌ගිං අහීනින්‌ද්‍රියං.

237. ‘‘සෙය්‍යථාපි, මහාරාජ, පුරිසො මුඤ්‌ජම්‌හා ඊසිකං පවාහෙය්‍ය [පබ්‌බාහෙය්‍ය (ස්‍යා. ක.)]. තස්‌ස එවමස්‌ස – ‘අයං මුඤ්‌ජො, අයං ඊසිකා, අඤ්‌ඤො මුඤ්‌ජො, අඤ්‌ඤා ඊසිකා, මුඤ්‌ජම්‌හා ත්‌වෙව ඊසිකා පවාළ්‌හා’ති [පබ්‌බාළ්‌හාති (ස්‍යා. ක.)]. සෙය්‍යථා වා පන, මහාරාජ, පුරිසො අසිං කොසියා පවාහෙය්‍ය. තස්‌ස එවමස්‌ස – ‘අයං අසි, අයං කොසි, අඤ්‌ඤො අසි, අඤ්‌ඤා කොසි, කොසියා ත්‌වෙව අසි පවාළ්‌හො’’ති. සෙය්‍යථා වා පන, මහාරාජ, පුරිසො අහිං කරණ්‌ඩා උද්‌ධරෙය්‍ය. තස්‌ස එවමස්‌ස – ‘අයං අහි, අයං කරණ්‌ඩො. අඤ්‌ඤො අහි, අඤ්‌ඤො කරණ්‌ඩො, කරණ්‌ඩා ත්‌වෙව අහි උබ්‌භතො’ති [උද්‌ධරිතො (ස්‍යා. කං.)]. එවමෙව ඛො, මහාරාජ, භික්‌ඛු එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ මනොමයං කායං අභිනිම්‌මානාය චිත්‌තං අභිනීහරති අභිනින්‌නාමෙති. සො ඉමම්‌හා කායා අඤ්‌ඤං කායං අභිනිම්‌මිනාති රූපිං මනොමයං සබ්‌බඞ්‌ගපච්‌චඞ්‌ගිං අහීනින්‌ද්‍රියං. ඉදම්‌පි ඛො, මහාරාජ, සන්‌දිට්‌ඨිකං සාමඤ්‌ඤඵලං පුරිමෙහි සන්‌දිට්‌ඨිකෙහි සාමඤ්‌ඤඵලෙහි අභික්‌කන්‌තතරඤ්‌ච පණීතතරඤ්‌ච.

ඉද්‌ධිවිධඤාණං

238. ‘‘සො එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ ඉද්‌ධිවිධාය චිත්‌තං අභිනීහරති අභිනින්‌නාමෙති . සො අනෙකවිහිතං ඉද්‌ධිවිධං පච්‌චනුභොති – එකොපි හුත්‌වා බහුධා හොති, බහුධාපි හුත්‌වා එකො හොති; ආවිභාවං තිරොභාවං තිරොකුට්‌ටං තිරොපාකාරං තිරොපබ්‌බතං අසජ්‌ජමානො ගච්‌ඡති සෙය්‍යථාපි ආකාසෙ. පථවියාපි උම්‌මුජ්‌ජනිමුජ්‌ජං කරොති සෙය්‍යථාපි උදකෙ. උදකෙපි අභිජ්‌ජමානෙ ගච්‌ඡති [අභිජ්‌ජමානො (සී. ක.)] සෙය්‍යථාපි පථවියා . ආකාසෙපි පල්‌ලඞ්‌කෙන කමති සෙය්‍යථාපි පක්‌ඛී සකුණො. ඉමෙපි චන්‌දිමසූරියෙ එවංමහිද්‌ධිකෙ එවංමහානුභාවෙ පාණිනා පරාමසති පරිමජ්‌ජති. යාව බ්‍රහ්‌මලොකාපි කායෙන වසං වත්‌තෙති.

239. ‘‘සෙය්‍යථාපි, මහාරාජ, දක්‌ඛො කුම්‌භකාරො වා කුම්‌භකාරන්‌තෙවාසී වා සුපරිකම්‌මකතාය මත්‌තිකාය යං යදෙව භාජනවිකතිං ආකඞ්‌ඛෙය්‍ය, තං තදෙව කරෙය්‍ය අභිනිප්‌ඵාදෙය්‍ය. සෙය්‍යථා වා පන, මහාරාජ, දක්‌ඛො දන්‌තකාරො වා දන්‌තකාරන්‌තෙවාසී වා සුපරිකම්‌මකතස්‌මිං දන්‌තස්‌මිං යං යදෙව දන්‌තවිකතිං ආකඞ්‌ඛෙය්‍ය, තං තදෙව කරෙය්‍ය අභිනිප්‌ඵාදෙය්‍ය. සෙය්‍යථා වා පන, මහාරාජ, දක්‌ඛො සුවණ්‌ණකාරො වා සුවණ්‌ණකාරන්‌තෙවාසී වා සුපරිකම්‌මකතස්‌මිං සුවණ්‌ණස්‌මිං යං යදෙව සුවණ්‌ණවිකතිං ආකඞ්‌ඛෙය්‍ය, තං තදෙව කරෙය්‍ය අභිනිප්‌ඵාදෙය්‍ය. එවමෙව ඛො, මහාරාජ, භික්‌ඛු එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ ඉද්‌ධිවිධාය චිත්‌තං අභිනීහරති අභිනින්‌නාමෙති. සො අනෙකවිහිතං ඉද්‌ධිවිධං පච්‌චනුභොති – එකොපි හුත්‌වා බහුධා හොති, බහුධාපි හුත්‌වා එකො හොති; ආවිභාවං තිරොභාවං තිරොකුට්‌ටං තිරොපාකාරං තිරොපබ්‌බතං අසජ්‌ජමානො ගච්‌ඡති සෙය්‍යථාපි ආකාසෙ. පථවියාපි උම්‌මුජ්‌ජනිමුජ්‌ජං කරොති සෙය්‍යථාපි උදකෙ. උදකෙපි අභිජ්‌ජමානෙ ගච්‌ඡති සෙය්‍යථාපි පථවියා. ආකාසෙපි පල්‌ලඞ්‌කෙන කමති සෙය්‍යථාපි පක්‌ඛී සකුණො. ඉමෙපි චන්‌දිමසූරියෙ එවංමහිද්‌ධිකෙ එවංමහානුභාවෙ පාණිනා පරාමසති පරිමජ්‌ජති. යාව බ්‍රහ්‌මලොකාපි කායෙන වසං වත්‌තෙති. ඉදම්‌පි ඛො, මහාරාජ, සන්‌දිට්‌ඨිකං සාමඤ්‌ඤඵලං පුරිමෙහි සන්‌දිට්‌ඨිකෙහි සාමඤ්‌ඤඵලෙහි අභික්‌කන්‌තතරඤ්‌ච පණීතතරඤ්‌ච.

දිබ්‌බසොතඤාණං

240. ‘‘සො එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ දිබ්‌බාය සොතධාතුයා චිත්‌තං අභිනීහරති අභිනින්‌නාමෙති. සො දිබ්‌බාය සොතධාතුයා විසුද්‌ධාය අතික්‌කන්‌තමානුසිකාය උභො සද්‌දෙ සුණාති දිබ්‌බෙ ච මානුසෙ ච යෙ දූරෙ සන්‌තිකෙ ච.

241. ‘‘සෙය්‍යථාපි , මහාරාජ, පුරිසො අද්‌ධානමග්‌ගප්‌පටිපන්‌නො. සො සුණෙය්‍ය භෙරිසද්‌දම්‌පි මුදිඞ්‌ගසද්‌දම්‌පි [මුතිඞ්‌ගසද්‌දම්‌පි (සී. පී.)] සඞ්‌ඛපණවදින්‌දිමසද්‌දම්‌පි[සඞ්‌ඛපණවදෙණ්‌ඩිමසද්‌දම්‌පි (සී. පී.), සඞ්‌ඛසද්‌දංපි පණවසද්‌දංපි දෙන්‌දිමසද්‌දංපි (ස්‍යා. කං.)]. තස්‌ස එවමස්‌ස – ‘භෙරිසද්‌දො’ ඉතිපි, ‘මුදිඞ්‌ගසද්‌දො’ ඉතිපි, ‘සඞ්‌ඛපණවදින්‌දිමසද්‌දො’ ඉතිපි [සඞ්‌ඛසද්‌දො ඉතිපි පණවසද්‌දො ඉතිපි දෙන්‌දිමසද්‌දො ඉතිපි (ස්‍යා. කං.)]. එවමෙව ඛො, මහාරාජ, භික්‌ඛු එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ දිබ්‌බාය සොතධාතුයා චිත්‌තං අභිනීහරති අභිනින්‌නාමෙති. සො දිබ්‌බාය සොතධාතුයා විසුද්‌ධාය අතික්‌කන්‌තමානුසිකාය උභො සද්‌දෙ සුණාති දිබ්‌බෙ ච මානුසෙ ච යෙ දූරෙ සන්‌තිකෙ ච. ඉදම්‌පි ඛො, මහාරාජ, සන්‌දිට්‌ඨිකං සාමඤ්‌ඤඵලං පුරිමෙහි සන්‌දිට්‌ඨිකෙහි සාමඤ්‌ඤඵලෙහි අභික්‌කන්‌තතරඤ්‌ච පණීතතරඤ්‌ච.

චෙතොපරියඤාණං

242. ‘‘සො එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ චෙතොපරියඤාණාය චිත්‌තං අභිනීහරති අභිනින්‌නාමෙති. සො පරසත්‌තානං පරපුග්‌ගලානං චෙතසා චෙතො පරිච්‌ච පජානාති – සරාගං වා චිත්‌තං ‘සරාගං චිත්‌ත’න්‌ති පජානාති, වීතරාගං වා චිත්‌තං ‘වීතරාගං චිත්‌ත’න්‌ති පජානාති, සදොසං වා චිත්‌තං ‘සදොසං චිත්‌ත’න්‌ති පජානාති, වීතදොසං වා චිත්‌තං ‘වීතදොසං චිත්‌ත’න්‌ති පජානාති, සමොහං වා චිත්‌තං ‘සමොහං චිත්‌ත’න්‌ති පජානාති, වීතමොහං වා චිත්‌තං ‘වීතමොහං චිත්‌ත’න්‌ති පජානාති, සඞ්‌ඛිත්‌තං වා චිත්‌තං ‘සඞ්‌ඛිත්‌තං චිත්‌ත’න්‌ති පජානාති, වික්‌ඛිත්‌තං වා චිත්‌තං ‘වික්‌ඛිත්‌තං චිත්‌ත’න්‌ති පජානාති, මහග්‌ගතං වා චිත්‌තං ‘මහග්‌ගතං චිත්‌ත’න්‌ති පජානාති, අමහග්‌ගතං වා චිත්‌තං ‘අමහග්‌ගතං චිත්‌ත’න්‌ති පජානාති, සඋත්‌තරං වා චිත්‌තං ‘සඋත්‌තරං චිත්‌ත’න්‌ති පජානාති, අනුත්‌තරං වා චිත්‌තං ‘අනුත්‌තරං චිත්‌ත’න්‌ති පජානාති, සමාහිතං වා චිත්‌තං ‘සමාහිතං චිත්‌ත’න්‌ති පජානාති, අසමාහිතං වා චිත්‌තං ‘අසමාහිතං චිත්‌ත’න්‌ති පජානාති , විමුත්‌තං වා චිත්‌තං ‘විමුත්‌තං චිත්‌ත’න්‌ති පජානාති, අවිමුත්‌තං වා චිත්‌තං ‘අවිමුත්‌තං චිත්‌ත’න්‌ති පජානාති.

243. ‘‘සෙය්‍යථාපි , මහාරාජ, ඉත්‌ථී වා පුරිසො වා දහරො යුවා මණ්‌ඩනජාතිකො ආදාසෙ වා පරිසුද්‌ධෙ පරියොදාතෙ අච්‌ඡෙ වා උදකපත්‌තෙ සකං මුඛනිමිත්‌තං පච්‌චවෙක්‌ඛමානො සකණිකං වා ‘සකණික’න්‌ති ජානෙය්‍ය, අකණිකං වා ‘අකණික’න්‌ති ජානෙය්‍ය; එවමෙව ඛො, මහාරාජ, භික්‌ඛු එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ චෙතොපරියඤාණාය චිත්‌තං අභිනීහරති අභිනින්‌නාමෙති. සො පරසත්‌තානං පරපුග්‌ගලානං චෙතසා චෙතො පරිච්‌ච පජානාති – සරාගං වා චිත්‌තං ‘සරාගං චිත්‌ත’න්‌ති පජානාති, වීතරාගං වා චිත්‌තං ‘වීතරාගං චිත්‌ත’න්‌ති පජානාති, සදොසං වා චිත්‌තං ‘සදොසං චිත්‌ත’න්‌ති පජානාති, වීතදොසං වා චිත්‌තං ‘වීතදොසං චිත්‌ත’න්‌ති පජානාති, සමොහං වා චිත්‌තං ‘සමොහං චිත්‌ත’න්‌ති පජානාති, වීතමොහං වා චිත්‌තං ‘වීතමොහං චිත්‌ත’න්‌ති පජානාති, සඞ්‌ඛිත්‌තං වා චිත්‌තං ‘සඞ්‌ඛිත්‌තං චිත්‌ත’න්‌ති පජානාති, වික්‌ඛිත්‌තං වා චිත්‌තං ‘වික්‌ඛිත්‌තං චිත්‌ත’න්‌ති පජානාති, මහග්‌ගතං වා චිත්‌තං ‘මහග්‌ගතං චිත්‌ත’න්‌ති පජානාති, අමහග්‌ගතං වා චිත්‌තං ‘අමහග්‌ගතං චිත්‌ත’න්‌ති පජානාති, සඋත්‌තරං වා චිත්‌තං ‘සඋත්‌තරං චිත්‌ත’න්‌ති පජානාති, අනුත්‌තරං වා චිත්‌තං ‘අනුත්‌තරං චිත්‌ත’න්‌ති පජානාති, සමාහිතං වා චිත්‌තං ‘සමාහිතං චිත්‌ත’න්‌ති පජානාති, අසමාහිතං වා චිත්‌තං ‘අසමාහිතං චිත්‌ත’න්‌ති පජානාති, විමුත්‌තං වා චිත්‌තං ‘විමුත්‌තං චිත්‌ත’’න්‌ති පජානාති, අවිමුත්‌තං වා චිත්‌තං ‘අවිමුත්‌තං චිත්‌ත’න්‌ති පජානාති. ඉදම්‌පි ඛො, මහාරාජ, සන්‌දිට්‌ඨිකං සාමඤ්‌ඤඵලං පුරිමෙහි සන්‌දිට්‌ඨිකෙහි සාමඤ්‌ඤඵලෙහි අභික්‌කන්‌තතරඤ්‌ච පණීතතරඤ්‌ච.

පුබ්‌බෙනිවාසානුස්‌සතිඤාණං

244. ‘‘සො එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ පුබ්‌බෙනිවාසානුස්‌සතිඤාණාය චිත්‌තං අභිනීහරති අභිනින්‌නාමෙති. සො අනෙකවිහිතං පුබ්‌බෙනිවාසං අනුස්‌සරති, සෙය්‍යථිදං – එකම්‌පි ජාතිං ද්‌වෙපි ජාතියො තිස්‌සොපි ජාතියො චතස්‌සොපි ජාතියො පඤ්‌චපි ජාතියො දසපි ජාතියො වීසම්‌පි ජාතියො තිංසම්‌පි ජාතියො චත්‌තාලීසම්‌පි ජාතියො පඤ්‌ඤාසම්‌පි ජාතියො ජාතිසතම්‌පි ජාතිසහස්‌සම්‌පි ජාතිසතසහස්‌සම්‌පි අනෙකෙපි සංවට්‌ටකප්‌පෙ අනෙකෙපි විවට්‌ටකප්‌පෙ අනෙකෙපි සංවට්‌ටවිවට්‌ටකප්‌පෙ, ‘අමුත්‍රාසිං එවංනාමො එවංගොත්‌තො එවංවණ්‌ණො එවමාහාරො එවංසුඛදුක්‌ඛප්‌පටිසංවෙදී එවමායුපරියන්‌තො, සො තතො චුතො අමුත්‍ර උදපාදිං; තත්‍රාපාසිං එවංනාමො එවංගොත්‌තො එවංවණ්‌ණො එවමාහාරො එවංසුඛදුක්‌ඛප්‌පටිසංවෙදී එවමායුපරියන්‌තො, සො තතො චුතො ඉධූපපන්‌නො’ති. ඉති සාකාරං සඋද්‌දෙසං අනෙකවිහිතං පුබ්‌බෙනිවාසං අනුස්‌සරති.

245. ‘‘සෙය්‍යථාපි, මහාරාජ, පුරිසො සකම්‌හා ගාමා අඤ්‌ඤං ගාමං ගච්‌ඡෙය්‍ය, තම්‌හාපි ගාමා අඤ්‌ඤං ගාමං ගච්‌ඡෙය්‍ය. සො තම්‌හා ගාමා සකංයෙව ගාමං පච්‌චාගච්‌ඡෙය්‍ය. තස්‌ස එවමස්‌ස – ‘අහං ඛො සකම්‌හා ගාමා අමුං ගාමං අගච්‌ඡිං [අගඤ්‌ඡිං (ස්‍යා. කං.)], තත්‍රාපි එවං අට්‌ඨාසිං, එවං නිසීදිං, එවං අභාසිං, එවං තුණ්‌හී අහොසිං, තම්‌හාපි ගාමා අමුං ගාමං අගච්‌ඡිං, තත්‍රාපි එවං අට්‌ඨාසිං, එවං නිසීදිං, එවං අභාසිං, එවං තුණ්‌හී අහොසිං, සොම්‌හි තම්‌හා ගාමා සකංයෙව ගාමං පච්‌චාගතො’ති. එවමෙව ඛො, මහාරාජ, භික්‌ඛු එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ පුබ්‌බෙනිවාසානුස්‌සතිඤාණාය චිත්‌තං අභිනීහරති අභිනින්‌නාමෙති. සො අනෙකවිහිතං පුබ්‌බෙනිවාසං අනුස්‌සරති, සෙය්‍යථිදං – එකම්‌පි ජාතිං ද්‌වෙපි ජාතියො තිස්‌සොපි ජාතියො චතස්‌සොපි ජාතියො පඤ්‌චපි ජාතියො දසපි ජාතියො වීසම්‌පි ජාතියො තිංසම්‌පි ජාතියො චත්‌තාලීසම්‌පි ජාතියො පඤ්‌ඤාසම්‌පි ජාතියො ජාතිසතම්‌පි ජාතිසහස්‌සම්‌පි ජාතිසතසහස්‌සම්‌පි අනෙකෙපි සංවට්‌ටකප්‌පෙ අනෙකෙපි විවට්‌ටකප්‌පෙ අනෙකෙපි සංවට්‌ටවිවට්‌ටකප්‌පෙ, ‘අමුත්‍රාසිං එවංනාමො එවංගොත්‌තො එවංවණ්‌ණො එවමාහාරො එවංසුඛදුක්‌ඛප්‌පටිසංවෙදී එවමායුපරියන්‌තො, සො තතො චුතො අමුත්‍ර උදපාදිං; තත්‍රාපාසිං එවංනාමො එවංගොත්‌තො එවංවණ්‌ණො එවමාහාරො එවංසුඛදුක්‌ඛප්‌පටිසංවෙදී එවමායුපරියන්‌තො, සො තතො චුතො ඉධූපපන්‌නො’ති, ඉති සාකාරං සඋද්‌දෙසං අනෙකවිහිතං පුබ්‌බෙනිවාසං අනුස්‌සරති. ඉදම්‌පි ඛො, මහාරාජ, සන්‌දිට්‌ඨිකං සාමඤ්‌ඤඵලං පුරිමෙහි සන්‌දිට්‌ඨිකෙහි සාමඤ්‌ඤඵලෙහි අභික්‌කන්‌තතරඤ්‌ච පණීතතරඤ්‌ච.

දිබ්‌බචක්‌ඛුඤාණං

246. ‘‘සො එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ සත්‌තානං චුතූපපාතඤාණාය චිත්‌තං අභිනීහරති අභිනින්‌නාමෙති. සො දිබ්‌බෙන චක්‌ඛුනා විසුද්‌ධෙන අතික්‌කන්‌තමානුසකෙන සත්‌තෙ පස්‌සති චවමානෙ උපපජ්‌ජමානෙහීනෙ පණීතෙ සුවණ්‌ණෙ දුබ්‌බණ්‌ණෙ සුගතෙ දුග්‌ගතෙ, යථාකම්‌මූපගෙ සත්‌තෙ පජානාති – ‘ඉමෙ වත භොන්‌තො සත්‌තා කායදුච්‌චරිතෙන සමන්‌නාගතා වචීදුච්‌චරිතෙන සමන්‌නාගතා මනොදුච්‌චරිතෙන සමන්‌නාගතා අරියානං උපවාදකා මිච්‌ඡාදිට්‌ඨිකා මිච්‌ඡාදිට්‌ඨිකම්‌මසමාදානා. තෙ කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපන්‌නා. ඉමෙ වා පන භොන්‌තො සත්‌තා කායසුචරිතෙන සමන්‌නාගතා වචීසුචරිතෙන සමන්‌නාගතා මනොසුචරිතෙන සමන්‌නාගතා අරියානං අනුපවාදකා සම්‌මාදිට්‌ඨිකා සම්‌මාදිට්‌ඨිකම්‌මසමාදානා, තෙ කායස්‌ස භෙදා පරං මරණා සුගතිං සග්‌ගං ලොකං උපපන්‌නා’ති. ඉති දිබ්‌බෙන චක්‌ඛුනා විසුද්‌ධෙන අතික්‌කන්‌තමානුසකෙන සත්‌තෙ පස්‌සති චවමානෙ උපපජ්‌ජමානෙ හීනෙ පණීතෙ සුවණ්‌ණෙ දුබ්‌බණ්‌ණෙ සුගතෙ දුග්‌ගතෙ, යථාකම්‌මූපගෙ සත්‌තෙ පජානාති.

247. ‘‘සෙය්‍යථාපි, මහාරාජ, මජ්‌ඣෙ සිඞ්‌ඝාටකෙ පාසාදො. තත්‌ථ චක්‌ඛුමා පුරිසො ඨිතො පස්‌සෙය්‍ය මනුස්‌සෙ ගෙහං පවිසන්‌තෙපි නික්‌ඛමන්‌තෙපි රථිකායපි වීථිං සඤ්‌චරන්‌තෙ [රථියාපී රථිං සඤ්‌චරන්‌තෙ (සී.), රථියාය විථිං සඤ්‌චරන්‌තෙපි (ස්‍යා.)] මජ්‌ඣෙ සිඞ්‌ඝාටකෙ නිසින්‌නෙපි. තස්‌ස එවමස්‌ස – ‘එතෙ මනුස්‌සා ගෙහං පවිසන්‌ති, එතෙ නික්‌ඛමන්‌ති, එතෙ රථිකාය වීථිං සඤ්‌චරන්‌ති, එතෙ මජ්‌ඣෙ සිඞ්‌ඝාටකෙ නිසින්‌නා’ති. එවමෙව ඛො, මහාරාජ, භික්‌ඛු එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ සත්‌තානං චුතූපපාතඤාණාය චිත්‌තං අභිනීහරති අභිනින්‌නාමෙති. සො දිබ්‌බෙන චක්‌ඛුනා විසුද්‌ධෙන අතික්‌කන්‌තමානුසකෙන සත්‌තෙ පස්‌සති චවමානෙ උපපජ්‌ජමානෙ හීනෙ පණීතෙ සුවණ්‌ණෙ දුබ්‌බණ්‌ණෙ සුගතෙ දුග්‌ගතෙ, යථාකම්‌මූපගෙ සත්‌තෙ පජානාති – ‘ඉමෙ වත භොන්‌තො සත්‌තා කායදුච්‌චරිතෙන සමන්‌නාගතා වචීදුච්‌චරිතෙන සමන්‌නාගතා මනොදුච්‌චරිතෙන සමන්‌නාගතා අරියානං උපවාදකා මිච්‌ඡාදිට්‌ඨිකා මිච්‌ඡාදිට්‌ඨිකම්‌මසමාදානා, තෙ කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපන්‌නා. ඉමෙ වා පන භොන්‌තො සත්‌තා කායසුචරිතෙන සමන්‌නාගතා වචීසුචරිතෙන සමන්‌නාගතා මනොසුචරිතෙන සමන්‌නාගතා අරියානං අනුපවාදකා සම්‌මාදිට්‌ඨිකා සම්‌මාදිට්‌ඨිකම්‌මසමාදානා. තෙ කායස්‌ස භෙදා පරං මරණා සුගතිං සග්‌ගං ලොකං උපපන්‌නා’ති. ඉති දිබ්‌බෙන චක්‌ඛුනා විසුද්‌ධෙන අතික්‌කන්‌තමානුසකෙන සත්‌තෙ පස්‌සති චවමානෙ උපපජ්‌ජමානෙ හීනෙ පණීතෙ සුවණ්‌ණෙ දුබ්‌බණ්‌ණෙ සුගතෙ දුග්‌ගතෙ; යථාකම්‌මූපගෙ සත්‌තෙ පජානාති. ‘ඉදම්‌පි ඛො, මහාරාජ, සන්‌දිට්‌ඨිකං සාමඤ්‌ඤඵලං පුරිමෙහි සන්‌දිට්‌ඨිකෙහි සාමඤ්‌ඤඵලෙහි අභික්‌කන්‌තතරඤ්‌ච පණීතතරඤ්‌ච.

ආසවක්‌ඛයඤාණං

248. ‘‘සො එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ ආසවානං ඛයඤාණාය චිත්‌තං අභිනීහරති අභිනින්‌නාමෙති. සො ඉදං දුක්‌ඛන්‌ති යථාභූතං පජානාති , අයං දුක්‌ඛසමුදයොති යථාභූතං පජානාති, අයං දුක්‌ඛනිරොධොති යථාභූතං පජානාති, අයං දුක්‌ඛනිරොධගාමිනී පටිපදාති යථාභූතං පජානාති. ඉමෙ ආසවාති යථාභූතං පජානාති, අයං ආසවසමුදයොති යථාභූතං පජානාති, අයං ආසවනිරොධොති යථාභූතං පජානාති, අයං ආසවනිරොධගාමිනී පටිපදාති යථාභූතං පජානාති. තස්‌ස එවං ජානතො එවං පස්‌සතො කාමාසවාපි චිත්‌තං විමුච්‌චති, භවාසවාපි චිත්‌තං විමුච්‌චති, අවිජ්‌ජාසවාපි චිත්‌තං විමුච්‌චති, ‘විමුත්‌තස්‌මිං විමුත්‌තමි’ති ඤාණං හොති, ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානාති.

249. ‘‘සෙය්‍යථාපි, මහාරාජ, පබ්‌බතසඞ්‌ඛෙපෙ උදකරහදො අච්‌ඡො විප්‌පසන්‌නො අනාවිලො. තත්‌ථ චක්‌ඛුමා පුරිසො තීරෙ ඨිතො පස්‌සෙය්‍ය සිප්‌පිසම්‌බුකම්‌පි සක්‌ඛරකථලම්‌පි මච්‌ඡගුම්‌බම්‌පි චරන්‌තම්‌පි තිට්‌ඨන්‌තම්‌පි. තස්‌ස එවමස්‌ස – ‘අයං ඛො උදකරහදො අච්‌ඡො විප්‌පසන්‌නො අනාවිලො. තත්‍රිමෙ සිප්‌පිසම්‌බුකාපි සක්‌ඛරකථලාපි මච්‌ඡගුම්‌බාපි චරන්‌තිපි තිට්‌ඨන්‌තිපී’ති. එවමෙව ඛො, මහාරාජ, භික්‌ඛු එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ ආසවානං ඛයඤාණාය චිත්‌තං අභිනීහරති අභිනින්‌නාමෙති. ‘සො ඉදං දුක්‌ඛ’න්‌ති යථාභූතං පජානාති, ‘අයං දුක්‌ඛසමුදයො’ති යථාභූතං පජානාති , ‘අයං දුක්‌ඛනිරොධො’ති යථාභූතං පජානාති, ‘අයං දුක්‌ඛනිරොධගාමිනී පටිපදා’ති යථාභූතං පජානාති. ‘ඉමෙ ආසවාති යථාභූතං පජානාති, ‘අයං ආසවසමුදයො’ති යථාභූතං පජානාති, ‘අයං ආසවනිරොධො’ති යථාභූතං පජානාති, ‘අයං ආසවනිරොධගාමිනී පටිපදාති යථාභූතං පජානාති. තස්‌ස එවං ජානතො එවං පස්‌සතො කාමාසවාපි චිත්‌තං විමුච්‌චති, භවාසවාපි චිත්‌තං විමුච්‌චති, අවිජ්‌ජාසවාපි චිත්‌තං විමුච්‌චති, ‘විමුත්‌තස්‌මිං විමුත්‌තමිති ඤාණං හොති, ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානාති. ඉදං ඛො, මහාරාජ, සන්‌දිට්‌ඨිකං සාමඤ්‌ඤඵලං පුරිමෙහි සන්‌දිට්‌ඨිකෙහි සාමඤ්‌ඤඵලෙහි අභික්‌කන්‌තතරඤ්‌ච පණීතතරඤ්‌ච. ඉමස්‌මා ච පන, මහාරාජ, සන්‌දිට්‌ඨිකා සාමඤ්‌ඤඵලා අඤ්‌ඤං සන්‌දිට්‌ඨිකං සාමඤ්‌ඤඵලං උත්‌තරිතරං වා පණීතතරං වා නත්‌ථී’’ති.

අජාතසත්‌තුඋපාසකත්‌තපටිවෙදනා

250. එවං වුත්‌තෙ, රාජා මාගධො අජාතසත්‌තු වෙදෙහිපුත්‌තො භගවන්‌තං එතදවොච – ‘‘අභික්‌කන්‌තං, භන්‌තෙ, අභික්‌කන්‌තං, භන්‌තෙ. සෙය්‍යථාපි, භන්‌තෙ, නික්‌කුජ්‌ජිතං වා උක්‌කුජ්‌ජෙය්‍ය, පටිච්‌ඡන්‌නං වා විවරෙය්‍ය, මූළ්‌හස්‌ස වා මග්‌ගං ආචික්‌ඛෙය්‍ය, අන්‌ධකාරෙ වා තෙලපජ්‌ජොතං ධාරෙය්‍ය ‘චක්‌ඛුමන්‌තො රූපානි දක්‌ඛන්‌තී’ති; එවමෙවං, භන්‌තෙ, භගවතා අනෙකපරියායෙන ධම්‌මො පකාසිතො . එසාහං, භන්‌තෙ, භගවන්‌තං සරණං ගච්‌ඡාමි ධම්‌මඤ්‌ච භික්‌ඛුසඞ්‌ඝඤ්‌ච. උපාසකං මං භගවා ධාරෙතු අජ්‌ජතග්‌ගෙ පාණුපෙතං සරණං ගතං. අච්‌චයො මං, භන්‌තෙ, අච්‌චගමා යථාබාලං යථාමූළ්‌හං යථාඅකුසලං, යොහං පිතරං ධම්‌මිකං ධම්‌මරාජානං ඉස්‌සරියකාරණා ජීවිතා වොරොපෙසිං. තස්‌ස මෙ, භන්‌තෙ භගවා අච්‌චයං අච්‌චයතො පටිග්‌ගණ්‌හාතු ආයතිං සංවරායා’’ති.

251. ‘‘තග්‌ඝ ත්‌වං, මහාරාජ, අච්‌චයො අච්‌චගමා යථාබාලං යථාමූළ්‌හං යථාඅකුසලං, යං ත්‌වං පිතරං ධම්‌මිකං ධම්‌මරාජානං ජීවිතා වොරොපෙසි. යතො ච ඛො ත්‌වං, මහාරාජ, අච්‌චයං අච්‌චයතො දිස්‌වා යථාධම්‌මං පටිකරොසි, තං තෙ මයං පටිග්‌ගණ්‌හාම. වුද්‌ධිහෙසා, මහාරාජ, අරියස්‌ස විනයෙ, යො අච්‌චයං අච්‌චයතො දිස්‌වා යථාධම්‌මං පටිකරොති, ආයතිං සංවරං ආපජ්‌ජතී’’ති.

252. එවං වුත්‌තෙ, රාජා මාගධො අජාතසත්‌තු වෙදෙහිපුත්‌තො භගවන්‌තං එතදවොච – ‘‘හන්‌ද ච දානි මයං, භන්‌තෙ, ගච්‌ඡාම බහුකිච්‌චා මයං බහුකරණීයා’’ති. ‘‘යස්‌සදානි ත්‌වං, මහාරාජ, කාලං මඤ්‌ඤසී’’ති. අථ ඛො රාජා මාගධො අජාතසත්‌තු වෙදෙහිපුත්‌තො භගවතො භාසිතං අභිනන්‌දිත්‌වා අනුමොදිත්‌වා උට්‌ඨායාසනා භගවන්‌තං අභිවාදෙත්‌වා පදක්‌ඛිණං කත්‌වා පක්‌කාමි.

253. අථ ඛො භගවා අචිරපක්‌කන්‌තස්‌ස රඤ්‌ඤො මාගධස්‌ස අජාතසත්‌තුස්‌ස වෙදෙහිපුත්‌තස්‌ස භික්‌ඛූ ආමන්‌තෙසි – ‘‘ඛතායං, භික්‌ඛවෙ, රාජා. උපහතායං, භික්‌ඛවෙ, රාජා. සචායං, භික්‌ඛවෙ, රාජා පිතරං ධම්‌මිකං ධම්‌මරාජානං ජීවිතා න වොරොපෙස්‌සථ, ඉමස්‌මිඤ්‌ඤෙව ආසනෙ විරජං වීතමලං ධම්‌මචක්‌ඛුං උප්‌පජ්‌ජිස්‌සථා’’ති. ඉදමවොච භගවා. අත්‌තමනා තෙ භික්‌ඛූ භගවතො භාසිතං අභිනන්‌දුන්‌ති.

සාමඤ්‌ඤඵලසුත්‌තං නිට්‌ඨිතං දුතියං.

No comments:

Post a Comment