2. උදුම්‌බරිකසුත්‌තං
මෙම සුත්‍ර දේශනාවේ සිංහල පරිවර්තනයට මෙතැනින් පිවිසෙන්න
සිංහල පරිවර්ථනය සදහා font මෙතැනින් ලබාගන්න
නිග්‍රොධපරිබ්‌බාජකවත්‌ථු
49. එවං මෙ සුතං – එකං සමයං භගවා රාජගහෙ විහරති ගිජ්‌ඣකූටෙ පබ්‌බතෙ. තෙන ඛො පන සමයෙන නිග්‍රොධො පරිබ්‌බාජකො උදුම්‌බරිකාය පරිබ්‌බාජකාරාමෙ පටිවසති මහතියා පරිබ්‌බාජකපරිසාය සද්‌ධිං තිංසමත්‌තෙහි පරිබ්‌බාජකසතෙහි. අථ ඛො සන්‌ධානො ගහපති දිවා දිවස්‌ස [දිවාදිවස්‌සෙව (සී. ස්‍යා. පී.)] රාජගහා නික්‌ඛමි භගවන්‌තං දස්‌සනාය. අථ ඛො සන්‌ධානස්‌ස ගහපතිස්‌ස එතදහොසි – ‘‘අකාලො ඛො භගවන්‌තං දස්‌සනාය. පටිසල්‌ලීනො භගවා. මනොභාවනීයානම්‌පි භික්‌ඛූනං අසමයො දස්‌සනාය. පටිසල්‌ලීනා මනොභාවනීයා භික්‌ඛූ. යංනූනාහං යෙන උදුම්‌බරිකාය පරිබ්‌බාජකාරාමො, යෙන නිග්‍රොධො පරිබ්‌බාජකො තෙනුපසඞ්‌කමෙය්‍ය’’න්‌ති. අථ ඛො සන්‌ධානො ගහපති යෙන උදුම්‌බරිකාය පරිබ්‌බාජකාරාමො, තෙනුපසඞ්‌කමි.
50. තෙන ඛො පන සමයෙන නිග්‍රොධො පරිබ්‌බාජකො මහතියා පරිබ්‌බාජකපරිසාය සද්‌ධිං නිසින්‌නො හොති උන්‌නාදිනියා උච්‌චාසද්‌දමහාසද්‌දාය අනෙකවිහිතං තිරච්‌ඡානකථං කථෙන්‌තියා. සෙය්‍යථිදං – රාජකථං චොරකථං මහාමත්‌තකථං සෙනාකථං භයකථං යුද්‌ධකථං අන්‌නකථං පානකථං වත්‌ථකථං සයනකථං මාලාකථං ගන්‌ධකථං ඤාතිකථං යානකථං ගාමකථං නිගමකථං නගරකථං ජනපදකථං ඉත්‌ථිකථං සූරකථං විසිඛාකථං කුම්‌භට්‌ඨානකථං පුබ්‌බපෙතකථං නානත්‌තකථං ලොකක්‌ඛායිකං සමුද්‌දක්‌ඛායිකං ඉතිභවාභවකථං ඉති වා.
51. අද්‌දසා ඛො නිග්‍රොධො පරිබ්‌බාජකො සන්‌ධානං ගහපතිං දූරතොව ආගච්‌ඡන්‌තං. දිස්‌වා සකං පරිසං සණ්‌ඨාපෙසි – ‘‘අප්‌පසද්‌දා භොන්‌තො හොන්‌තු, මා භොන්‌තො සද්‌දමකත්‌ථ. අයං සමණස්‌ස ගොතමස්‌ස සාවකො ආගච්‌ඡති සන්‌ධානො ගහපති. යාවතා ඛො පන සමණස්‌ස ගොතමස්‌ස සාවකා ගිහී ඔදාතවසනා රාජගහෙ පටිවසන්‌ති, අයං තෙසං අඤ්‌ඤතරො සන්‌ධානො ගහපති. අප්‌පසද්‌දකාමා ඛො පනෙතෙ ආයස්‌මන්‌තො අප්‌පසද්‌දවිනීතා , අප්‌පසද්‌දස්‌ස වණ්‌ණවාදිනො. අප්‌පෙව නාම අප්‌පසද්‌දං පරිසං විදිත්‌වා උපසඞ්‌කමිතබ්‌බං මඤ්‌ඤෙය්‍යා’’ති. එවං වුත්‌තෙ තෙ පරිබ්‌බාජකා තුණ්‌හී අහෙසුං.
52. අථ ඛො සන්‌ධානො ගහපති යෙන නිග්‍රොධො පරිබ්‌බාජකො තෙනුපසඞ්‌කමි, උපසඞ්‌කමිත්‌වා නිග්‍රොධෙන පරිබ්‌බාජකෙන සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො සන්‌ධානො ගහපති නිග්‍රොධං පරිබ්‌බාජකං එතදවොච – ‘‘අඤ්‌ඤථා ඛො ඉමෙ භොන්‌තො අඤ්‌ඤතිත්‌ථියා පරිබ්‌බාජකා සඞ්‌ගම්‌ම සමාගම්‌ම උන්‌නාදිනො උච්‌චාසද්‌දමහාසද්‌දා අනෙකවිහිතං තිරච්‌ඡානකථං අනුයුත්‌තා විහරන්‌ති. සෙය්‍යථිදං – රාජකථං…පෙ.… ඉතිභවාභවකථං ඉති වා. අඤ්‌ඤථා ඛො [ච (සී. පී.)] පන සො භගවා අරඤ්‌ඤවනපත්‌ථානි පන්‌තානි සෙනාසනානි පටිසෙවති අප්‌පසද්‌දානි අප්‌පනිග්‌ඝොසානි විජනවාතානි මනුස්‌සරාහස්‌සෙය්‍යකානි පටිසල්‌ලානසාරුප්‌පානී’’ති.
53. එවං වුත්‌තෙ නිග්‍රොධො පරිබ්‌බාජකො සන්‌ධානං ගහපතිං එතදවොච – ‘‘යග්‌ඝෙ ගහපති, ජානෙය්‍යාසි, කෙන සමණො ගොතමො සද්‌ධිං සල්‌ලපති, කෙන සාකච්‌ඡං සමාපජ්‌ජති, කෙන පඤ්‌ඤාවෙය්‍යත්‌තියං සමාපජ්‌ජති? සුඤ්‌ඤාගාරහතා සමණස්‌ස ගොතමස්‌ස පඤ්‌ඤා අපරිසාවචරො සමණො ගොතමො නාලං සල්‌ලාපාය. සො අන්‌තමන්‌තානෙව සෙවති [අන්‌තපන්‌තානෙව (ස්‍යා.)]. සෙය්‍යථාපි නාම ගොකාණා පරියන්‌තචාරිනී අන්‌තමන්‌තානෙව සෙවති. එවමෙව සුඤ්‌ඤාගාරහතා සමණස්‌ස ගොතමස්‌ස පඤ්‌ඤා; අපරිසාවචරො සමණො ගොතමො; නාලං සල්‌ලාපාය. සො අන්‌තමන්‌තානෙව සෙවති. ඉඞ්‌ඝ, ගහපති, සමණො ගොතමො ඉමං පරිසං ආගච්‌ඡෙය්‍ය, එකපඤ්‌හෙනෙව නං සංසාදෙය්‍යාම [සංහරෙය්‍යාම (ක.)], තුච්‌ඡකුම්‌භීව නං මඤ්‌ඤෙ ඔරොධෙය්‍යාමා’’ති.
54. අස්‌සොසි ඛො භගවා දිබ්‌බාය සොතධාතුයා විසුද්‌ධාය අතික්‌කන්‌තමානුසිකාය සන්‌ධානස්‌ස ගහපතිස්‌ස නිග්‍රොධෙන පරිබ්‌බාජකෙන සද්‌ධිං ඉමං කථාසල්‌ලාපං. අථ ඛො භගවා ගිජ්‌ඣකූටා පබ්‌බතා ඔරොහිත්‌වා යෙන සුමාගධාය තීරෙ මොරනිවාපො තෙනුපසඞ්‌කමි; උපසඞ්‌කමිත්‌වා සුමාගධාය තීරෙ මොරනිවාපෙ අබ්‌භොකාසෙ චඞ්‌කමි. අද්‌දසා ඛො නිග්‍රොධො පරිබ්‌බාජකො භගවන්‌තං සුමාගධාය තීරෙ මොරනිවාපෙ අබ්‌භොකාසෙ චඞ්‌කමන්‌තං. දිස්‌වාන සකං පරිසං සණ්‌ඨාපෙසි – ‘‘අප්‌පසද්‌දා භොන්‌තො හොන්‌තු, මා භොන්‌තො සද්‌දමකත්‌ථ, අයං සමණො ගොතමො සුමාගධාය තීරෙ මොරනිවාපෙ අබ්‌භොකාසෙ චඞ්‌කමති. අප්‌පසද්‌දකාමො ඛො පන සො ආයස්‌මා, අප්‌පසද්‌දස්‌ස වණ්‌ණවාදී. අප්‌පෙව නාම අප්‌පසද්‌දං පරිසං විදිත්‌වා උපසඞ්‌කමිතබ්‌බං මඤ්‌ඤෙය්‍ය. සචෙ සමණො ගොතමො ඉමං පරිසං ආගච්‌ඡෙය්‍ය, ඉමං තං පඤ්‌හං පුච්‌ඡෙය්‍යාම – ‘කො නාම සො, භන්‌තෙ, භගවතො ධම්‌මො, යෙන භගවා සාවකෙ විනෙති, යෙන භගවතා සාවකා විනීතා අස්‌සාසප්‌පත්‌තා පටිජානන්‌ති අජ්‌ඣාසයං ආදිබ්‍රහ්‌මචරිය’න්‌ති? එවං වුත්‌තෙ තෙ පරිබ්‌බාජකා තුණ්‌හී අහෙසුං.
තපොජිගුච්‌ඡාවාදො
55. අථ ඛො භගවා යෙන නිග්‍රොධො පරිබ්‌බාජකො තෙනුපසඞ්‌කමි. අථ ඛො නිග්‍රොධො පරිබ්‌බාජකො භගවන්‌තං එතදවොච – ‘‘එතු ඛො, භන්‌තෙ, භගවා, ස්‌වාගතං, භන්‌තෙ, භගවතො. චිරස්‌සං ඛො, භන්‌තෙ, භගවා ඉමං පරියායමකාසි යදිදං ඉධාගමනාය. නිසීදතු, භන්‌තෙ, භගවා, ඉදමාසනං පඤ්‌ඤත්‌ත’’න්‌ති. නිසීදි භගවා පඤ්‌ඤත්‌තෙ ආසනෙ. නිග්‍රොධොපි ඛො පරිබ්‌බාජකො අඤ්‌ඤතරං නීචාසනං ගහෙත්‌වා එකමන්‌තං නිසීදි. එකමන්‌තං නිසින්‌නං ඛො නිග්‍රොධං පරිබ්‌බාජකං භගවා එතදවොච – ‘‘කාය නුත්‌ථ, නිග්‍රොධ, එතරහි කථාය සන්‌නිසින්‌නා, කා ච පන වො අන්‌තරාකථා විප්‌පකතා’’ති? එවං වුත්‌තෙ, නිග්‍රොධො පරිබ්‌බාජකො භගවන්‌තං එතදවොච, ‘‘ඉධ මයං, භන්‌තෙ, අද්‌දසාම භගවන්‌තං සුමාගධාය තීරෙ මොරනිවාපෙ අබ්‌භොකාසෙ චඞ්‌කමන්‌තං, දිස්‌වාන එවං අවොචුම්‌හා – ‘සචෙ සමණො ගොතමො ඉමං පරිසං ආගච්‌ඡෙය්‍ය, ඉමං තං පඤ්‌හං පුච්‌ඡෙය්‍යාම – කො නාම සො, භන්‌තෙ, භගවතො ධම්‌මො, යෙන භගවා සාවකෙ විනෙති, යෙන භගවතා සාවකා විනීතා අස්‌සාසප්‌පත්‌තා පටිජානන්‌ති අජ්‌ඣාසයං ආදිබ්‍රහ්‌මචරිය’න්‌ති? අයං ඛො නො, භන්‌තෙ, අන්‌තරාකථා විප්‌පකතා; අථ භගවා අනුප්‌පත්‌තො’’ති.
56. ‘‘දුජ්‌ජානං ඛො එතං, නිග්‍රොධ, තයා අඤ්‌ඤදිට්‌ඨිකෙන අඤ්‌ඤඛන්‌තිකෙන අඤ්‌ඤරුචිකෙන අඤ්‌ඤත්‍රායොගෙන අඤ්‌ඤත්‍රාචරියකෙන, යෙනාහං සාවකෙ විනෙමි , යෙන මයා සාවකා විනීතා අස්‌සාසප්‌පත්‌තා පටිජානන්‌ති අජ්‌ඣාසයං ආදිබ්‍රහ්‌මචරියං. ඉඞ්‌ඝ ත්‌වං මං, නිග්‍රොධ, සකෙ ආචරියකෙ අධිජෙගුච්‌ඡෙ පඤ්‌හං පුච්‌ඡ – ‘කථං සන්‌තා නු ඛො, භන්‌තෙ, තපොජිගුච්‌ඡා පරිපුණ්‌ණා හොති, කථං අපරිපුණ්‌ණා’ති? එවං වුත්‌තෙ තෙ පරිබ්‌බාජකා උන්‌නාදිනො උච්‌චාසද්‌දමහාසද්‌දා අහෙසුං – ‘‘අච්‌ඡරියං වත භො, අබ්‌භුතං වත භො, සමණස්‌ස ගොතමස්‌ස මහිද්‌ධිකතා මහානුභාවතා, යත්‍ර හි නාම සකවාදං ඨපෙස්‌සති, පරවාදෙන පවාරෙස්‌සතී’’ති.
57. අථ ඛො නිග්‍රොධො පරිබ්‌බාජකො තෙ පරිබ්‌බාජකෙ අප්‌පසද්‌දෙ කත්‌වා භගවන්‌තං එතදවොච – ‘‘මයං ඛො, භන්‌තෙ, තපොජිගුච්‌ඡාවාදා[තරොජිගුච්‌ඡංසාරොදා (ක.)] තපොජිගුච්‌ඡාසාරා තපොජිගුච්‌ඡාඅල්‌ලීනා විහරාම . කථං සන්‌තා නු ඛො, භන්‌තෙ, තපොජිගුච්‌ඡා පරිපුණ්‌ණා හොති, කථං අපරිපුණ්‌ණා’’ති?
‘‘ඉධ, නිග්‍රොධ, තපස්‌සී අචෙලකො හොති මුත්‌තාචාරො, හත්‌ථාපලෙඛනො [හත්‌ථාවලෙඛනො (ස්‍යා.)], න එහිභද්‌දන්‌තිකො, න තිට්‌ඨභද්‌දන්‌තිකො, නාභිහටං , න උද්‌දිස්‌සකතං, න නිමන්‌තනං සාදියති, සො න කුම්‌භිමුඛා පටිග්‌ගණ්‌හාති, න කළොපිමුඛා පටිග්‌ගණ්‌හාති, න එළකමන්‌තරං, න දණ්‌ඩමන්‌තරං, න මුසලමන්‌තරං, න ද්‌වින්‌නං භුඤ්‌ජමානානං, න ගබ්‌භිනියා, න පායමානාය, න පුරිසන්‌තරගතාය, න සඞ්‌කිත්‌තීසු, න යත්‌ථ සා උපට්‌ඨිතො හොති, න යත්‌ථ මක්‌ඛිකා සණ්‌ඩසණ්‌ඩචාරිනී, න මච්‌ඡං, න මංසං, න සුරං, න මෙරයං, න ථුසොදකං පිවති, සො එකාගාරිකො වා හොති එකාලොපිකො, ද්‌වාගාරිකො වා හොති ද්‌වාලොපිකො, සත්‌තාගාරිකො වා හොති සත්‌තාලොපිකො, එකිස්‌සාපි දත්‌තියා යාපෙති, ද්‌වීහිපි දත්‌තීහි යාපෙති, සත්‌තහිපි දත්‌තීහි යාපෙති; එකාහිකම්‌පි ආහාරං ආහාරෙති, ද්‌වීහිකම්‌පි [ද්‌වාහිකංපි (සී. ස්‍යා.)] ආහාරං ආහාරෙති, සත්‌තාහිකම්‌පි ආහාරං ආහාරෙති, ඉති එවරූපං අද්‌ධමාසිකම්‌පි පරියායභත්‌තභොජනානුයොගමනුයුත්‌තො විහරති. සො සාකභක්‌ඛො වා හොති, සාමාකභක්‌ඛො වා හොති, නීවාරභක්‌ඛො වා හොති, දද්‌දුලභක්‌ඛො වා හොති, හටභක්‌ඛො වා හොති, කණභක්‌ඛො වා හොති, ආචාමභක්‌ඛො වා හොති, පිඤ්‌ඤාකභක්‌ඛො වා හොති, තිණභක්‌ඛො වා හොති, ගොමයභක්‌ඛො වා හොති; වනමූලඵලාහාරො යාපෙති පවත්‌තඵලභොජී. සො සාණානිපි ධාරෙති , මසාණානිපි ධාරෙති, ඡවදුස්‌සානිපි ධාරෙති, පංසුකූලානිපි ධාරෙති, තිරීටානිපි ධාරෙති, අජිනම්‌පි ධාරෙති, අජිනක්‌ඛිපම්‌පි ධාරෙති, කුසචීරම්‌පි ධාරෙති, වාකචීරම්‌පි ධාරෙති, ඵලකචීරම්‌පි ධාරෙති, කෙසකම්‌බලම්‌පි ධාරෙති, වාළකම්‌බලම්‌පි ධාරෙති, උලූකපක්‌ඛම්‌පි ධාරෙති, කෙසමස්‌සුලොචකොපි හොති කෙසමස්‌සුලොචනානුයොගමනුයුත්‌තො , උබ්‌භට්‌ඨකොපි [උභට්‌ඨකොපි (ස්‍යා.), උබ්‌භට්‌ඨිකොපි (ක.)] හොති ආසනපටික්‌ඛිත්‌තො, උක්‌කුටිකොපි හොති උක්‌කුටිකප්‌පධානමනුයුත්‌තො, කණ්‌ටකාපස්‌සයිකොපි හොති කණ්‌ටකාපස්‌සයෙ සෙය්‍යං කප්‌පෙති, ඵලකසෙය්‍යම්‌පි කප්‌පෙති, ථණ්‌ඩිලසෙය්‍යම්‌පි කප්‌පෙති, එකපස්‌සයිකොපි හොති රජොජල්‌ලධරො, අබ්‌භොකාසිකොපි හොති යථාසන්‌ථතිකො, වෙකටිකොපි හොති විකටභොජනානුයොගමනුයුත්‌තො, අපානකොපි හොති අපානකත්‌තමනුයුත්‌තො, සායතතියකම්‌පි උදකොරොහනානුයොගමනුයුත්‌තො විහරති. තං කිං මඤ්‌ඤසි, නිග්‍රොධ, යදි එවං සන්‌තෙ තපොජිගුච්‌ඡා පරිපුණ්‌ණා වා හොති අපරිපුණ්‌ණා වා’’ති? ‘‘අද්‌ධා ඛො, භන්‌තෙ, එවං සන්‌තෙ තපොජිගුච්‌ඡා පරිපුණ්‌ණා හොති, නො අපරිපුණ්‌ණා’’ති. ‘‘එවං පරිපුණ්‌ණායපි ඛො අහං, නිග්‍රොධ, තපොජිගුච්‌ඡාය අනෙකවිහිතෙ උපක්‌කිලෙසෙ වදාමී’’ති.
උපක්‌කිලෙසො
58. ‘‘යථා කථං පන, භන්‌තෙ, භගවා එවං පරිපුණ්‌ණාය තපොජිගුච්‌ඡාය අනෙකවිහිතෙ උපක්‌කිලෙසෙ වදතී’’ති? ‘‘ඉධ, නිග්‍රොධ, තපස්‌සී තපං සමාදියති, සො තෙන තපසා අත්‌තමනො හොති පරිපුණ්‌ණසඞ්‌කප්‌පො. යම්‌පි, නිග්‍රොධ, තපස්‌සී තපං සමාදියති, සො තෙන තපසා අත්‌තමනො හොති පරිපුණ්‌ණසඞ්‌කප්‌පො. අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
‘‘පුන චපරං, නිග්‍රොධ, තපස්‌සී තපං සමාදියති, සො තෙන තපසා අත්‌තානුක්‌කංසෙති පරං වම්‌භෙති. යම්‌පි, නිග්‍රොධ, තපස්‌සී තපං සමාදියති, සො තෙන තපසා අත්‌තානුක්‌කංසෙති පරං වම්‌භෙති. අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
‘‘පුන චපරං, නිග්‍රොධ, තපස්‌සී තපං සමාදියති, සො තෙන තපසා මජ්‌ජති මුච්‌ඡති පමාදමාපජ්‌ජති [මදමාපජ්‌ජති (ස්‍යා.)]. යම්‌පි, නිග්‍රොධ, තපස්‌සී තපං සමාදියති, සොතෙන තපසා මජ්‌ජති මුච්‌ඡති පමාදමාපජ්‌ජති. අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
59. ‘‘පුන චපරං, නිග්‍රොධ, තපස්‌සී තපං සමාදියති, සො තෙන තපසා ලාභසක්‌කාරසිලොකං අභිනිබ්‌බත්‌තෙති, සො තෙන ලාභසක්‌කාරසිලොකෙන අත්‌තමනො හොති පරිපුණ්‌ණසඞ්‌කප්‌පො. යම්‌පි, නිග්‍රොධ, තපස්‌සී තපං සමාදියති, සො තෙන තපසා ලාභසක්‌කාරසිලොකං අභිනිබ්‌බත්‌තෙති, සො තෙන ලාභසක්‌කාරසිලොකෙන අත්‌තමනො හොති පරිපුණ්‌ණසඞ්‌කප්‌පො. අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
‘‘පුන චපරං, නිග්‍රොධ, තපස්‌සී තපං සමාදියති, සො තෙන තපසා ලාභසක්‌කාරසිලොකං අභිනිබ්‌බත්‌තෙති, සො තෙන ලාභසක්‌කාරසිලොකෙන අත්‌තානුක්‌කංසෙති පරං වම්‌භෙති. යම්‌පි, නිග්‍රොධ, තපස්‌සී තපං සමාදියති, සො තෙන තපසා ලාභසක්‌කාරසිලොකං අභිනිබ්‌බත්‌තෙති, සො තෙන ලාභසක්‌කාරසිලොකෙන අත්‌තානුක්‌කංසෙති පරං වම්‌භෙති. අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
‘‘පුන චපරං, නිග්‍රොධ, තපස්‌සී තපං සමාදියති, සො තෙන තපසා ලාභසක්‌කාරසිලොකං අභිනිබ්‌බත්‌තෙති, සො තෙන ලාභසක්‌කාරසිලොකෙන මජ්‌ජති මුච්‌ඡති පමාදමාපජ්‌ජති. යම්‌පි, නිග්‍රොධ, තපස්‌සී තපං සමාදියති, සො තෙන තපසා ලාභසක්‌කාරසිලොකං අභිනිබ්‌බත්‌තෙති, සො තෙන ලාභසක්‌කාරසිලොකෙන මජ්‌ජති මුච්‌ඡති පමාදමාපජ්‌ජති. අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
60. ‘‘පුන චපරං, නිග්‍රොධ, තපස්‌සී භොජනෙසු වොදාසං ආපජ්‌ජති – ‘ඉදං මෙ ඛමති, ඉදං මෙ නක්‌ඛමතී’ති. සො යඤ්‌ච [යං හි (සී. පී.)] ඛ්‌වස්‌ස නක්‌ඛමති, තං සාපෙක්‌ඛො පජහති. යං පනස්‌ස ඛමති, තං ගධිතො [ගථිතො (සී. පී.)] මුච්‌ඡිතො අජ්‌ඣාපන්‌නො අනාදීනවදස්‌සාවී අනිස්‌සරණපඤ්‌ඤො පරිභුඤ්‌ජති…පෙ.… අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
‘‘පුන චපරං, නිග්‍රොධ, තපස්‌සී තපං සමාදියති ලාභසක්‌කාරසිලොකනිකන්‌තිහෙතු – ‘සක්‌කරිස්‌සන්‌ති මං රාජානො රාජමහාමත්‌තා ඛත්‌තියා බ්‍රාහ්‌මණා ගහපතිකා තිත්‌ථියා’ති…පෙ.… අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
61. ‘‘පුන චපරං, නිග්‍රොධ, තපස්‌සී අඤ්‌ඤතරං සමණං වා බ්‍රාහ්‌මණං වා අපසාදෙතා [අපසාරෙතා (ක.)] හොති – ‘කිං පනායං සම්‌බහුලාජීවො [බහුලාජීවො (සී. පී.)]සබ්‌බං සංභක්‌ඛෙති. සෙය්‍යථිදං – මූලබීජං ඛන්‌ධබීජං ඵළුබීජං අග්‌ගබීජං බීජබීජමෙව පඤ්‌චමං, අසනිවිචක්‌කං දන්‌තකූටං, සමණප්‌පවාදෙනා’ති…පෙ.… අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
‘‘පුන චපරං, නිග්‍රොධ, තපස්‌සී පස්‌සති අඤ්‌ඤතරං සමණං වා බ්‍රාහ්‌මණං වා කුලෙසු සක්‌කරියමානං ගරුකරියමානං මානියමානං පූජියමානං. දිස්‌වා තස්‌ස එවං හොති – ‘ඉමඤ්‌හි නාම සම්‌බහුලාජීවං කුලෙසු සක්‌කරොන්‌ති ගරුං කරොන්‌ති මානෙන්‌ති පූජෙන්‌ති. මං පන තපස්‌සිං ලූඛාජීවිං කුලෙසු න සක්‌කරොන්‌ති න ගරුං කරොන්‌ති න මානෙන්‌ති න පූජෙන්‌තී’ති, ඉති සො ඉස්‌සාමච්‌ඡරියං කුලෙසු උප්‌පාදෙතා හොති…පෙ.… අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
62. ‘‘පුන චපරං, නිග්‍රොධ, තපස්‌සී ආපාථකනිසාදී හොති…පෙ.… අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
‘‘පුන චපරං, නිග්‍රොධ, තපස්‌සී අත්‌තානං අදස්‌සයමානො කුලෙසු චරති – ‘ඉදම්‌පි මෙ තපස්‌මිං ඉදම්‌පි මෙ තපස්‌මි’න්‌ති…පෙ.… අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
‘‘පුන චපරං, නිග්‍රොධ, තපස්‌සී කිඤ්‌චිදෙව පටිච්‌ඡන්‌නං සෙවති. සො ‘ඛමති තෙ ඉද’න්‌ති පුට්‌ඨො සමානො අක්‌ඛමමානං ආහ – ‘ඛමතී’ති. ඛමමානං ආහ – ‘නක්‌ඛමතී’ති. ඉති සො සම්‌පජානමුසා භාසිතා හොති…පෙ.… අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
‘‘පුන චපරං, නිග්‍රොධ, තපස්‌සී තථාගතස්‌ස වා තථාගතසාවකස්‌ස වා ධම්‌මං දෙසෙන්‌තස්‌ස සන්‌තංයෙව පරියායං අනුඤ්‌ඤෙය්‍යං නානුජානාති…පෙ.… අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
63. ‘‘පුන චපරං, නිග්‍රොධ, තපස්‌සී කොධනො හොති උපනාහී. යම්‌පි, නිග්‍රොධ, තපස්‌සී කොධනො හොති උපනාහී. අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
‘‘පුන චපරං, නිග්‍රොධ, තපස්‌සී මක්‌ඛී හොති පළාසී [පලාසී (සී. ස්‍යා. පී.)] …පෙ.… ඉස්‌සුකී හොති මච්‌ඡරී… සඨො හොති මායාවී… ථද්‌ධො හොති අතිමානී… පාපිච්‌ඡො හොති පාපිකානං ඉච්‌ඡානං වසං ගතො… මිච්‌ඡාදිට්‌ඨිකො හොති අන්‌තග්‌ගාහිකාය දිට්‌ඨියා සමන්‌නාගතො… සන්‌දිට්‌ඨිපරාමාසී හොති ආධානග්‌ගාහී දුප්‌පටිනිස්‌සග්‌ගී. යම්‌පි, නිග්‍රොධ, තපස්‌සී සන්‌දිට්‌ඨිපරාමාසී හොති ආධානග්‌ගාහී දුප්‌පටිනිස්‌සග්‌ගී. අයම්‌පි ඛො, නිග්‍රොධ, තපස්‌සිනො උපක්‌කිලෙසො හොති.
‘‘තං කිං මඤ්‌ඤසි, නිග්‍රොධ, යදිමෙ තපොජිගුච්‌ඡා [තපොජිගුච්‌ඡාය (?)] උපක්‌කිලෙසා වා අනුපක්‌කිලෙසා වා’’ති? ‘‘අද්‌ධා ඛො ඉමෙ, භන්‌තෙ, තපොජිගුච්‌ඡා[තපොජිගුච්‌ඡාය (?)] උපක්‌කිලෙසා [උපක්‌කිලෙසා හොති (ක.)], නො අනුපක්‌කිලෙසා. ඨානං ඛො පනෙතං, භන්‌තෙ, විජ්‌ජති යං ඉධෙකච්‌චො තපස්‌සී සබ්‌බෙහෙව ඉමෙහි උපක්‌කිලෙසෙහි සමන්‌නාගතො අස්‌ස; කො පන වාදො අඤ්‌ඤතරඤ්‌ඤතරෙනා’’ති.
පරිසුද්‌ධපපටිකප්‌පත්‌තකථා
64. ‘‘ඉධ, නිග්‍රොධ, තපස්‌සී තපං සමාදියති, සො තෙන තපසා න අත්‌තමනො හොති න පරිපුණ්‌ණසඞ්‌කප්‌පො. යම්‌පි, නිග්‍රොධ, තපස්‌සී තපං සමාදියති, සො තෙන තපසා න අත්‌තමනො හොති න පරිපුණ්‌ණසඞ්‌කප්‌පො. එවං සො තස්‌මිං ඨානෙ පරිසුද්‌ධො හොති.
‘‘පුන චපරං, නිග්‍රොධ, තපස්‌සී තපං සමාදියති, සො තෙන තපසා න අත්‌තානුක්‌කංසෙති න පරං වම්‌භෙති…පෙ.… එවං සො තස්‌මිං ඨානෙ පරිසුද්‌ධො හොති.
‘‘පුන චපරං, නිග්‍රොධ, තපස්‌සී තපං සමාදියති, සො තෙන තපසා න මජ්‌ජති න මුච්‌ඡති න පමාදමාපජ්‌ජති…පෙ.… එවං සො තස්‌මිං ඨානෙ පරිසුද්‌ධො හොති.
65. ‘‘පුන චපරං, නිග්‍රොධ, තපස්‌සී තපං සමාදියති, සො තෙන තපසා ලාභසක්‌කාරසිලොකං අභිනිබ්‌බත්‌තෙති, සො තෙන ලාභසක්‌කාරසිලොකෙන න අත්‌තමනො හොති න පරිපුණ්‌ණසඞ්‌කප්‌පො…පෙ.… එවං සො තස්‌මිං ඨානෙ පරිසුද්‌ධො හොති.
‘‘පුන චපරං, නිග්‍රොධ, තපස්‌සී තපං සමාදියති, සො තෙන තපසා ලාභසක්‌කාරසිලොකං අභිනිබ්‌බත්‌තෙති, සො තෙන ලාභසක්‌කාරසිලොකෙන න අත්‌තානුක්‌කංසෙති න පරං වම්‌භෙති…පෙ.… එවං සො තස්‌මිං ඨානෙ පරිසුද්‌ධො හොති.
‘‘පුන චපරං, නිග්‍රොධ, තපස්‌සී තපං සමාදියති, සො තෙන තපසා ලාභසක්‌කාරසිලොකං අභිනිබ්‌බත්‌තෙති, සො තෙන ලාභසක්‌කාරසිලොකෙන න මජ්‌ජති න මුච්‌ඡති න පමාදමාපජ්‌ජති…පෙ.… එවං සො තස්‌මිං ඨානෙ පරිසුද්‌ධො හොති.
66. ‘‘පුන චපරං, නිග්‍රොධ, තපස්‌සී භොජනෙසු න වොදාසං ආපජ්‌ජති – ‘ඉදං මෙ ඛමති, ඉදං මෙ නක්‌ඛමතී’ති. සො යඤ්‌ච ඛ්‌වස්‌ස නක්‌ඛමති, තං අනපෙක්‌ඛො පජහති. යං පනස්‌ස ඛමති , තං අගධිතො අමුච්‌ඡිතො අනජ්‌ඣාපන්‌නො ආදීනවදස්‌සාවී නිස්‌සරණපඤ්‌ඤො පරිභුඤ්‌ජති…පෙ.… එවං සො තස්‌මිං ඨානෙ පරිසුද්‌ධො හොති.
‘‘පුන චපරං, නිග්‍රොධ, තපස්‌සී න තපං සමාදියති ලාභසක්‌කාරසිලොකනිකන්‌තිහෙතු – ‘සක්‌කරිස්‌සන්‌ති මං රාජානො රාජමහාමත්‌තා ඛත්‌තියා බ්‍රාහ්‌මණා ගහපතිකා තිත්‌ථියා’ති…පෙ.… එවං සො තස්‌මිං ඨානෙ පරිසුද්‌ධො හොති.
67. ‘‘පුන චපරං, නිග්‍රොධ, තපස්‌සී අඤ්‌ඤතරං සමණං වා බ්‍රාහ්‌මණං වා නාපසාදෙතා හොති – ‘කිං පනායං සම්‌බහුලාජීවො සබ්‌බං සංභක්‌ඛෙති. සෙය්‍යථිදං – මූලබීජං ඛන්‌ධබීජං ඵළුබීජං අග්‌ගබීජං බීජබීජමෙව පඤ්‌චමං, අසනිවිචක්‌කං දන්‌තකූටං, සමණප්‌පවාදෙනා’ති…පෙ.… එවං සො තස්‌මිං ඨානෙ පරිසුද්‌ධො හොති.
‘‘පුන චපරං, නිග්‍රොධ, තපස්‌සී පස්‌සති අඤ්‌ඤතරං සමණං වා බ්‍රාහ්‌මණං වා කුලෙසු සක්‌කරියමානං ගරු කරියමානං මානියමානං පූජියමානං. දිස්‌වා තස්‌ස න එවංහොති – ‘ඉමඤ්‌හි නාම සම්‌බහුලාජීවං කුලෙසු සක්‌කරොන්‌ති ගරුං කරොන්‌ති මානෙන්‌ති පූජෙන්‌ති. මං පන තපස්‌සිං ලූඛාජීවිං කුලෙසු න සක්‌කරොන්‌ති න ගරුං කරොන්‌ති න මානෙන්‌ති න පූජෙන්‌තී’ති, ඉති සො ඉස්‌සාමච්‌ඡරියං කුලෙසු නුප්‌පාදෙතා හොති…පෙ.… එවං සො තස්‌මිං ඨානෙ පරිසුද්‌ධො හොති.
68. ‘‘පුන චපරං, නිග්‍රොධ, තපස්‌සී න ආපාථකනිසාදී හොති…පෙ.… එවං සො තස්‌මිං ඨානෙ පරිසුද්‌ධො හොති.
‘‘පුන චපරං, නිග්‍රොධ, තපස්‌සී න අත්‌තානං අදස්‌සයමානො කුලෙසු චරති – ‘ඉදම්‌පි මෙ තපස්‌මිං, ඉදම්‌පි මෙ තපස්‌මි’න්‌ති…පෙ.… එවං සො තස්‌මිං ඨානෙ පරිසුද්‌ධො හොති.
‘‘පුන චපරං, නිග්‍රොධ, තපස්‌සී න කඤ්‌චිදෙව පටිච්‌ඡන්‌නං සෙවති, සො – ‘ඛමති තෙ ඉද’න්‌ති පුට්‌ඨො සමානො අක්‌ඛමමානං ආහ – ‘නක්‌ඛමතී’ති. ඛමමානං ආහ – ‘ඛමතී’ති. ඉති සො සම්‌පජානමුසා න භාසිතා හොති…පෙ.… එවං සො තස්‌මිං ඨානෙ පරිසුද්‌ධො හොති.
‘‘පුන චපරං, නිග්‍රොධ, තපස්‌සී තථාගතස්‌ස වා තථාගතසාවකස්‌ස වා ධම්‌මං දෙසෙන්‌තස්‌ස සන්‌තංයෙව පරියායං අනුඤ්‌ඤෙය්‍යං අනුජානාති…පෙ.… එවං සො තස්‌මිං ඨානෙ පරිසුද්‌ධො හොති.
69. ‘‘පුන චපරං, නිග්‍රොධ, තපස්‌සී අක්‌කොධනො හොති අනුපනාහී. යම්‌පි, නිග්‍රොධ, තපස්‌සී අක්‌කොධනො හොති අනුපනාහී එවං සො තස්‌මිං ඨානෙ පරිසුද්‌ධො හොති.
‘‘පුන චපරං, නිග්‍රොධ, තපස්‌සී අමක්‌ඛී හොති අපළාසී…පෙ.… අනිස්‌සුකී හොති අමච්‌ඡරී… අසඨො හොති අමායාවී… අත්‌ථද්‌ධො හොති අනතිමානී… න පාපිච්‌ඡො හොති න පාපිකානං ඉච්‌ඡානං වසං ගතො… න මිච්‌ඡාදිට්‌ඨිකො හොති න අන්‌තග්‌ගාහිකාය දිට්‌ඨියා සමන්‌නාගතො… න සන්‌දිට්‌ඨිපරාමාසී හොති න ආධානග්‌ගාහී සුප්‌පටිනිස්‌සග්‌ගී. යම්‌පි, නිග්‍රොධ, තපස්‌සී න සන්‌දිට්‌ඨිපරාමාසී හොති න ආධානග්‌ගාහී සුප්‌පටිනිස්‌සග්‌ගී. එවං සො තස්‌මිං ඨානෙ පරිසුද්‌ධො හොති.
‘‘තං කිං මඤ්‌ඤසි, නිග්‍රොධ, යදි එවං සන්‌තෙ තපොජිගුච්‌ඡා පරිසුද්‌ධා වා හොති අපරිසුද්‌ධා වා’’ති? ‘‘අද්‌ධා ඛො, භන්‌තෙ, එවං සන්‌තෙ තපොජිගුච්‌ඡා පරිසුද්‌ධාහොති නො අපරිසුද්‌ධා, අග්‌ගප්‌පත්‌තා ච සාරප්‌පත්‌තා චා’’ති. ‘‘න ඛො, නිග්‍රොධ, එත්‌තාවතා තපොජිගුච්‌ඡා අග්‌ගප්‌පත්‌තා ච හොති සාරප්‌පත්‌තා ච; අපි ච ඛො පපටිකප්‌පත්‌තා [පප්‌පටිකපත්‌තා (ක.)] හොතී’’ති.
පරිසුද්‌ධතචප්‌පත්‌තකථා
70. ‘‘කිත්‌තාවතා පන, භන්‌තෙ, තපොජිගුච්‌ඡා අග්‌ගප්‌පත්‌තා ච හොති සාරප්‌පත්‌තා ච? සාධු මෙ, භන්‌තෙ, භගවා තපොජිගුච්‌ඡාය අග්‌ගඤ්‌ඤෙව පාපෙතු, සාරඤ්‌ඤෙව පාපෙතූ’’ති. ‘‘ඉධ, නිග්‍රොධ, තපස්‌සී චාතුයාමසංවරසංවුතො හොති. කථඤ්‌ච, නිග්‍රොධ, තපස්‌සී චාතුයාමසංවරසංවුතො හොති? ඉධ, නිග්‍රොධ, තපස්‌සී න පාණං අතිපාතෙති [අතිපාපෙති (ක. සී. පී. ක.)], න පාණං අතිපාතයති, න පාණමතිපාතයතො සමනුඤ්‌ඤො හොති . න අදින්‌නං ආදියති, න අදින්‌නං ආදියාපෙති, න අදින්‌නං ආදියතො සමනුඤ්‌ඤො හොති. න මුසා භණති, න මුසා භණාපෙති, න මුසා භණතො සමනුඤ්‌ඤො හොති. න භාවිතමාසීසති [න භාවිතමාසිං සති (සී. ස්‍යා. පී.)], න භාවිතමාසීසාපෙති, න භාවිතමාසීසතො සමනුඤ්‌ඤො හොති. එවං ඛො, නිග්‍රොධ, තපස්‌සී චාතුයාමසංවරසංවුතො හොති.
‘‘යතො ඛො, නිග්‍රොධ, තපස්‌සී චාතුයාමසංවරසංවුතො හොති, අදුං චස්‌ස හොති තපස්‌සිතාය. සො අභිහරති නො හීනායාවත්‌තති. සො විවිත්‌තං සෙනාසනං භජති අරඤ්‌ඤං රුක්‌ඛමූලං පබ්‌බතං කන්‌දරං ගිරිගුහං සුසානං වනපත්‌ථං අබ්‌භොකාසං පලාලපුඤ්‌ජං. සො පච්‌ඡාභත්‌තං පිණ්‌ඩපාතප්‌පටික්‌කන්‌තො නිසීදති පල්‌ලඞ්‌කං ආභුජිත්‌වා උජුං කායං පණිධාය පරිමුඛං සතිං උපට්‌ඨපෙත්‌වා. සො අභිජ්‌ඣං ලොකෙ පහාය විගතාභිජ්‌ඣෙන චෙතසා විහරති, අභිජ්‌ඣාය චිත්‌තං පරිසොධෙති. බ්‍යාපාදප්‌පදොසං පහාය අබ්‍යාපන්‌නචිත්‌තො විහරති සබ්‌බපාණභූතහිතානුකම්‌පී, බ්‍යාපාදප්‌පදොසා චිත්‌තං පරිසොධෙති. ථිනමිද්‌ධං [ථීනමිද්‌ධං (සී. ස්‍යා. පී.)]පහාය විගතථිනමිද්‌ධො විහරති ආලොකසඤ්‌ඤී සතො සම්‌පජානො, ථිනමිද්‌ධා චිත්‌තං පරිසොධෙති. උද්‌ධච්‌චකුක්‌කුච්‌චං පහාය අනුද්‌ධතො විහරති අජ්‌ඣත්‌තං වූපසන්‌තචිත්‌තො, උද්‌ධච්‌චකුක්‌කුච්‌චා චිත්‌තං පරිසොධෙති. විචිකිච්‌ඡං පහාය තිණ්‌ණවිචිකිච්‌ඡො විහරති අකථංකථී කුසලෙසු ධම්‌මෙසු, විචිකිච්‌ඡාය චිත්‌තං පරිසොධෙති.
71. ‘‘සො ඉමෙ පඤ්‌ච නීවරණෙ පහාය චෙතසො උපක්‌කිලෙසෙ පඤ්‌ඤාය දුබ්‌බලීකරණෙ මෙත්‌තාසහගතෙන චෙතසා එකං දිසං ඵරිත්‌වා විහරති. තථා දුතියං. තථා තතියං. තථා චතුත්‌ථං. ඉති උද්‌ධමධො තිරියං සබ්‌බධි සබ්‌බත්‌තතාය සබ්‌බාවන්‌තං ලොකං මෙත්‌තාසහගතෙන චෙතසා විපුලෙන මහග්‌ගතෙන අප්‌පමාණෙන අවෙරෙන අබ්‍යාපජ්‌ජෙන ඵරිත්‌වා විහරති. කරුණාසහගතෙන චෙතසා…පෙ.… මුදිතාසහගතෙන චෙතසා…පෙ.… උපෙක්‌ඛාසහගතෙන චෙතසා එකං දිසං ඵරිත්‌වා විහරති. තථා දුතියං. තථා තතියං. තථා චතුත්‌ථං. ඉති උද්‌ධමධො තිරියං සබ්‌බධි සබ්‌බත්‌තතාය සබ්‌බාවන්‌තං ලොකං උපෙක්‌ඛාසහගතෙන චෙතසා විපුලෙන මහග්‌ගතෙන අප්‌පමාණෙන අවෙරෙන අබ්‍යාපජ්‌ජෙන ඵරිත්‌වා විහරති.
‘‘තං කිං මඤ්‌ඤසි, නිග්‍රොධ. යදි එවං සන්‌තෙ තපොජිගුච්‌ඡා පරිසුද්‌ධා වා හොති අපරිසුද්‌ධා වා’’ති? ‘‘අද්‌ධා ඛො, භන්‌තෙ, එවං සන්‌තෙ තපොජිගුච්‌ඡා පරිසුද්‌ධා හොති නො අපරිසුද්‌ධා, අග්‌ගප්‌පත්‌තා ච සාරප්‌පත්‌තා චා’’ති. ‘‘න ඛො, නිග්‍රොධ, එත්‌තාවතා තපොජිගුච්‌ඡා අග්‌ගප්‌පත්‌තා ච හොති සාරප්‌පත්‌තා ච; අපි ච ඛො තචප්‌පත්‌තා හොතී’’ති.
පරිසුද්‌ධඵෙග්‌ගුප්‌පත්‌තකථා
72. ‘‘කිත්‌තාවතා පන, භන්‌තෙ, තපොජිගුච්‌ඡා අග්‌ගප්‌පත්‌තා ච හොති සාරප්‌පත්‌තා ච? සාධු මෙ, භන්‌තෙ, භගවා තපොජිගුච්‌ඡාය අග්‌ගඤ්‌ඤෙව පාපෙතු, සාරඤ්‌ඤෙව පාපෙතූ’’ති. ‘‘ඉධ, නිග්‍රොධ, තපස්‌සී චාතුයාමසංවරසංවුතො හොති. කථඤ්‌ච, නිග්‍රොධ, තපස්‌සී චාතුයාමසංවරසංවුතො හොති…පෙ.… යතො ඛො, නිග්‍රොධ, තපස්‌සී චාතුයාමසංවරසංවුතො හොති, අදුං චස්‌ස හොති තපස්‌සිතාය. සො අභිහරති නො හීනායාවත්‌තති. සො විවිත්‌තං සෙනාසනං භජති…පෙ.… සො ඉමෙ පඤ්‌ච නීවරණෙ පහාය චෙතසො උපක්‌කිලෙසෙ පඤ්‌ඤාය දුබ්‌බලීකරණෙ මෙත්‌තාසහගතෙන චෙතසා…පෙ.… කරුණාසහගතෙන චෙතසා…පෙ.… මුදිතාසහගතෙන චෙතසා…පෙ.… උපෙක්‌ඛාසහගතෙන චෙතසා විපුලෙන මහග්‌ගතෙන අප්‌පමාණෙන අවෙරෙන අබ්‍යාපජ්‌ජෙන ඵරිත්‌වා විහරති. සො අනෙකවිහිතං පුබ්‌බෙනිවාසං අනුස්‌සරති සෙය්‍යථිදං – එකම්‌පි ජාතිං ද්‌වෙපි ජාතියො තිස්‌සොපි ජාතියො චතස්‌සොපි ජාතියො පඤ්‌චපි ජාතියො දසපි ජාතියො වීසම්‌පි ජාතියො තිංසම්‌පි ජාතියො චත්‌තාලීසම්‌පි ජාතියො පඤ්‌ඤාසම්‌පි ජාතියො ජාතිසතම්‌පි ජාතිසහස්‌සම්‌පි ජාතිසතසහස්‌සම්‌පි අනෙකෙපි සංවට්‌ටකප්‌පෙ අනෙකෙපි විවට්‌ටකප්‌පෙ අනෙකෙපි සංවට්‌ටවිවට්‌ටකප්‌පෙ – ‘අමුත්‍රාසිං එවංනාමො එවංගොත්‌තො එවංවණ්‌ණො එවමාහාරො එවංසුඛදුක්‌ඛප්‌පටිසංවෙදී එවමායුපරියන්‌තො, සො තතො චුතො අමුත්‍ර උදපාදිං, තත්‍රාපාසිං එවංනාමො එවංගොත්‌තො එවංවණ්‌ණො එවමාහාරො එවංසුඛදුක්‌ඛප්‌පටිසංවෙදී එවමායුපරියන්‌තො, සො තතො චුතො ඉධූපපන්‌නො’ති. ඉති සාකාරං සඋද්‌දෙසං අනෙකවිහිතං පුබ්‌බෙනිවාසං අනුස්‌සරති.
‘‘තං කිං මඤ්‌ඤසි, නිග්‍රොධ, යදි එවං සන්‌තෙ තපොජිගුච්‌ඡා පරිසුද්‌ධා වා හොති අපරිසුද්‌ධා වා’’ති? ‘‘අද්‌ධා ඛො, භන්‌තෙ, එවං සන්‌තෙ තපොජිගුච්‌ඡා පරිසුද්‌ධාහොති, නො අපරිසුද්‌ධා, අග්‌ගප්‌පත්‌තා ච සාරප්‌පත්‌තා චා’’ති. ‘‘න ඛො, නිග්‍රොධ, එත්‌තාවතා තපොජිගුච්‌ඡා අග්‌ගප්‌පත්‌තා ච හොති සාරප්‌පත්‌තා ච; අපි ච ඛො ඵෙග්‌ගුප්‌පත්‌තා හොතී’’ති.
පරිසුද්‌ධඅග්‌ගප්‌පත්‌තසාරප්‌පත්‌තකථා
73. ‘‘කිත්‌තාවතා පන, භන්‌තෙ, තපොජිගුච්‌ඡා අග්‌ගප්‌පත්‌තා ච හොති සාරප්‌පත්‌තා ච? සාධු මෙ, භන්‌තෙ, භගවා තපොජිගුච්‌ඡාය අග්‌ගඤ්‌ඤෙව පාපෙතු, සාරඤ්‌ඤෙව පාපෙතූ’’ති. ‘‘ඉධ, නිග්‍රොධ, තපස්‌සී චාතුයාමසංවරසංවුතො හොති. කථඤ්‌ච, නිග්‍රොධ, තපස්‌සී චාතුයාමසංවරසංවුතො හොති…පෙ.… යතො ඛො, නිග්‍රොධ, තපස්‌සී චාතුයාමසංවරසංවුතො හොති, අදුං චස්‌ස හොති තපස්‌සිතාය. සො අභිහරති නො හීනායාවත්‌තති. සො විවිත්‌තං සෙනාසනං භජති…පෙ.… සො ඉමෙ පඤ්‌ච නීවරණෙ පහාය චෙතසො උපක්‌කිලෙසෙ පඤ්‌ඤාය දුබ්‌බලීකරණෙ මෙත්‌තාසහගතෙන චෙතසා…පෙ.… උපෙක්‌ඛාසහගතෙන චෙතසා විපුලෙන මහග්‌ගතෙන අප්‌පමාණෙන අවෙරෙන අබ්‍යාපජ්‌ජෙන ඵරිත්‌වා විහරති. සො අනෙකවිහිතං පුබ්‌බෙනිවාසං අනුස්‌සරති. සෙය්‍යථිදං – එකම්‌පි ජාතිං ද්‌වෙපි ජාතියො තිස්‌සොපි ජාතියො චතස්‌සොපි ජාතියො පඤ්‌චපි ජාතියො…පෙ.… ඉති සාකාරං සඋද්‌දෙසං අනෙකවිහිතං පුබ්‌බෙනිවාසං අනුස්‌සරති. සො දිබ්‌බෙන චක්‌ඛුනා විසුද්‌ධෙන අතික්‌කන්‌තමානුසකෙන සත්‌තෙ පස්‌සති චවමානෙ උපපජ්‌ජමානෙ හීනෙ පණීතෙ සුවණ්‌ණෙ දුබ්‌බණ්‌ණෙ සුගතෙ දුග්‌ගතෙ, යථාකම්‌මූපගෙ සත්‌තෙ පජානාති – ‘ඉමෙ වත භොන්‌තො සත්‌තා කායදුච්‌චරිතෙන සමන්‌නාගතා වචීදුච්‌චරිතෙන සමන්‌නාගතා මනොදුච්‌චරිතෙන සමන්‌නාගතා අරියානං උපවාදකා මිච්‌ඡාදිට්‌ඨිකා මිච්‌ඡාදිට්‌ඨිකම්‌මසමාදානා. තෙ කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපන්‌නා. ඉමෙ වා පන භොන්‌තො සත්‌තා කායසුචරිතෙන සමන්‌නාගතා වචීසුචරිතෙන සමන්‌නාගතා මනොසුචරිතෙන සමන්‌නාගතා අරියානං අනුපවාදකා සම්‌මාදිට්‌ඨිකා සම්‌මාදිට්‌ඨිකම්‌මසමාදානා. තෙ කායස්‌ස භෙදා පරං මරණා සුගතිං සග්‌ගං ලොකං උපපන්‌නා’ති. ඉති දිබ්‌බෙන චක්‌ඛුනා විසුද්‌ධෙන අතික්‌කන්‌තමානුසකෙන සත්‌තෙ පස්‌සති චවමානෙ උපපජ්‌ජමානෙ හීනෙ පණීතෙ සුවණ්‌ණෙ දුබ්‌බණ්‌ණෙ සුගතෙ දුග්‌ගතෙ, යථාකම්‌මූපගෙ සත්‌තෙ පජානාති.
‘‘තං කිං මඤ්‌ඤසි, නිග්‍රොධ, යදි එවං සන්‌තෙ තපොජිගුච්‌ඡා පරිසුද්‌ධා වා හොති අපරිසුද්‌ධා වා’’ති? ‘‘අද්‌ධා ඛො, භන්‌තෙ, එවං සන්‌තෙ තපොජිගුච්‌ඡා පරිසුද්‌ධා හොති නො අපරිසුද්‌ධා, අග්‌ගප්‌පත්‌තා ච සාරප්‌පත්‌තා චා’’ති.
74. ‘‘එත්‌තාවතා ඛො, නිග්‍රොධ, තපොජිගුච්‌ඡා අග්‌ගප්‌පත්‌තා ච හොති සාරප්‌පත්‌තා ච. ඉති ඛො, නිග්‍රොධ [ඉති නිග්‍රොධ (ස්‍යා.)], යං මං ත්‌වං අවචාසි – ‘කො නාම සො, භන්‌තෙ, භගවතො ධම්‌මො, යෙන භගවා සාවකෙ විනෙති, යෙන භගවතා සාවකා විනීතා අස්‌සාසප්‌පත්‌තා පටිජානන්‌ති අජ්‌ඣාසයං ආදිබ්‍රහ්‌මචරිය’න්‌ති. ඉති ඛො තං, නිග්‍රොධ, ඨානං උත්‌තරිතරඤ්‌ච පණීතතරඤ්‌ච, යෙනාහං සාවකෙ විනෙමි, යෙන මයා සාවකා විනීතා අස්‌සාසප්‌පත්‌තා පටිජානන්‌ති අජ්‌ඣාසයං ආදිබ්‍රහ්‌මචරිය’’න්‌ති.
එවං වුත්‌තෙ, තෙ පරිබ්‌බාජකා උන්‌නාදිනො උච්‌චාසද්‌දමහාසද්‌දා අහෙසුං – ‘‘එත්‌ථ මයං අනස්‌සාම සාචරියකා, න මයං ඉතො භිය්‍යො උත්‌තරිතරං පජානාමා’’ති.
නිග්‍රොධස්‌ස පජ්‌ඣායනං
75. යදා අඤ්‌ඤාසි සන්‌ධානො ගහපති – ‘‘අඤ්‌ඤදත්‌ථු ඛො දානිමෙ අඤ්‌ඤතිත්‌ථියා පරිබ්‌බාජකා භගවතො භාසිතං සුස්‌සූසන්‌ති, සොතං ඔදහන්‌ති, අඤ්‌ඤාචිත්‌තං උපට්‌ඨාපෙන්‌තී’’ති. අථ [අථ නං (ක.)] නිග්‍රොධං පරිබ්‌බාජකං එතදවොච – ‘‘ඉති ඛො, භන්‌තෙ නිග්‍රොධ, යං මං ත්‌වං අවචාසි – ‘යග්‌ඝෙ, ගහපති, ජානෙය්‍යාසි, කෙන සමණො ගොතමො සද්‌ධිං සල්‌ලපති, කෙන සාකච්‌ඡං සමාපජ්‌ජති, කෙන පඤ්‌ඤාවෙය්‍යත්‌තියං සමාපජ්‌ජති, සුඤ්‌ඤාගාරහතා සමණස්‌ස ගොතමස්‌ස පඤ්‌ඤා, අපරිසාවචරො සමණො ගොතමො නාලං සල්‌ලාපාය, සො අන්‌තමන්‌තානෙව සෙවති; සෙය්‍යථාපි නාම ගොකාණා පරියන්‌තචාරිනී අන්‌තමන්‌තානෙව සෙවති. එවමෙව සුඤ්‌ඤාගාරහතා සමණස්‌ස ගොතමස්‌ස පඤ්‌ඤා, අපරිසාවචරො සමණො ගොතමො නාලං සල්‌ලාපාය; සො අන්‌තමන්‌තානෙව සෙවති; ඉඞ්‌ඝ, ගහපති, සමණො ගොතමො ඉමං පරිසං ආගච්‌ඡෙය්‍ය, එකපඤ්‌හෙනෙව නං සංසාදෙය්‍යාම, තුච්‌ඡකුම්‌භීව නං මඤ්‌ඤෙ ඔරොධෙය්‍යාමා’ති. අයං ඛො සො, භන්‌තෙ, භගවා අරහං සම්‌මාසම්‌බුද්‌ධො ඉධානුප්‌පත්‌තො, අපරිසාවචරං පන නං කරොථ, ගොකාණං පරියන්‌තචාරිනිං කරොථ, එකපඤ්‌හෙනෙව නං සංසාදෙථ, තුච්‌ඡකුම්‌භීව නං ඔරොධෙථා’’ති. එවං වුත්‌තෙ, නිග්‍රොධො පරිබ්‌බාජකො තුණ්‌හීභූතො මඞ්‌කුභූතො පත්‌තක්‌ඛන්‌ධො අධොමුඛො පජ්‌ඣායන්‌තො අප්‌පටිභානො නිසීදි.
76. අථ ඛො භගවා නිග්‍රොධං පරිබ්‌බාජකං තුණ්‌හීභූතං මඞ්‌කුභූතං පත්‌තක්‌ඛන්‌ධං අධොමුඛං පජ්‌ඣායන්‌තං අප්‌පටිභානං විදිත්‌වා නිග්‍රොධං පරිබ්‌බාජකං එතදවොච – ‘‘සච්‌චං කිර, නිග්‍රොධ, භාසිතා තෙ එසා වාචා’’ති? ‘‘සච්‌චං , භන්‌තෙ, භාසිතා මෙ එසා වාචා, යථාබාලෙන යථාමූළ්‌හෙන යථාඅකුසලෙනා’’ති. ‘‘තං කිං මඤ්‌ඤසි, නිග්‍රොධ. කින්‌ති තෙ සුතං පරිබ්‌බාජකානං වුඩ්‌ඪානං මහල්‌ලකානං ආචරියපාචරියානං භාසමානානං – ‘යෙ තෙ අහෙසුං අතීතමද්‌ධානං අරහන්‌තො සම්‌මාසම්‌බුද්‌ධා, එවං සු තෙ භගවන්‌තො සංගම්‌ම සමාගම්‌ම උන්‌නාදිනො උච්‌චාසද්‌දමහාසද්‌දා අනෙකවිහිතං තිරච්‌ඡානකථං අනුයුත්‌තා විහරන්‌ති. සෙය්‍යථිදං – රාජකථං චොරකථං…පෙ.… ඉතිභවාභවකථං ඉති වා. සෙය්‍යථාපි ත්‌වං එතරහි සාචරියකො. උදාහු, එවං සු තෙ භගවන්‌තො අරඤ්‌ඤවනපත්‌ථානි පන්‌තානි සෙනාසනානි පටිසෙවන්‌ති අප්‌පසද්‌දානි අප්‌පනිග්‌ඝොසානි විජනවාතානි මනුස්‌සරාහස්‌සෙය්‍යකානි පටිසල්‌ලානසාරුප්‌පානි, සෙය්‍යථාපාහං එතරහී’ති.
‘‘සුතං මෙතං, භන්‌තෙ. පරිබ්‌බාජකානං වුඩ්‌ඪානං මහල්‌ලකානං ආචරියපාචරියානං භාසමානානං – ‘යෙ තෙ අහෙසුං අතීතමද්‌ධානං අරහන්‌තො සම්‌මාසම්‌බුද්‌ධා , න එවං සු [නාස්‌සු (සී. පී.)] තෙ භගවන්‌තො සංගම්‌ම සමාගම්‌ම උන්‌නාදිනො උච්‌චාසද්‌දමහාසද්‌දා අනෙකවිහිතං තිරච්‌ඡානකථං අනුයුත්‌තා විහරන්‌ති. සෙය්‍යථිදං – රාජකථං චොරකථං…පෙ.… ඉතිභවාභවකථං ඉති වා, සෙය්‍යථාපාහං එතරහි සාචරියකො. එවං සු තෙ භගවන්‌තො අරඤ්‌ඤවනපත්‌ථානි පන්‌තානි සෙනාසනානි පටිසෙවන්‌ති අප්‌පසද්‌දානි අප්‌පනිග්‌ඝොසානි විජනවාතානි මනුස්‌සරාහස්‌සෙය්‍යකානි පටිසල්‌ලානසාරුප්‌පානි, සෙය්‍යථාපි භගවා එතරහී’’’ති.
‘‘තස්‌ස තෙ, නිග්‍රොධ, විඤ්‌ඤුස්‌ස සතො මහල්‌ලකස්‌ස න එතදහොසි – ‘බුද්‌ධො සො භගවා බොධාය ධම්‌මං දෙසෙති, දන්‌තො සො භගවා දමථාය ධම්‌මං දෙසෙති, සන්‌තො සො භගවා සමථාය ධම්‌මං දෙසෙති, තිණ්‌ණො සො භගවා තරණාය ධම්‌මං දෙසෙති, පරිනිබ්‌බුතො සො භගවා පරිනිබ්‌බානාය ධම්‌මං දෙසෙතී’’’ති?
බ්‍රහ්‌මචරියපරියොසානසච්‌ඡිකිරියා
77. එවං වුත්‌තෙ, නිග්‍රොධො පරිබ්‌බාජකො භගවන්‌තං එතදවොච – ‘‘අච්‌චයො මං, භන්‌තෙ, අච්‌චගමා යථාබාලං යථාමූළ්‌හං යථාඅකුසලං, ය්‌වාහං එවං භගවන්‌තං අවචාසිං. තස්‌ස මෙ, භන්‌තෙ, භගවා අච්‌චයං අච්‌චයතො පටිග්‌ගණ්‌හාතු ආයතිං සංවරායා’’ති. ‘‘තග්‌ඝ ත්‌වං [තං (සී. ස්‍යා. පී.)], නිග්‍රොධ, අච්‌චයො අච්‌චගමා යථාබාලං යථාමූළ්‌හං යථාඅකුසලං, යො මං ත්‌වං එවං අවචාසි. යතො ච ඛො ත්‌වං, නිග්‍රොධ, අච්‌චයං අච්‌චයතො දිස්‌වා යථාධම්‌මං පටිකරොසි, තං තෙ මයං පටිග්‌ගණ්‌හාම. වුද්‌ධි හෙසා, නිග්‍රොධ, අරියස්‌ස විනයෙ, යො අච්‌චයං අච්‌චයතො දිස්‌වා යථාධම්‌මං පටිකරොති ආයතිං සංවරං ආපජ්‌ජති. අහං ඛො පන, නිග්‍රොධ, එවං වදාමි –
‘එතු විඤ්‌ඤූ පුරිසො අසඨො අමායාවී උජුජාතිකො, අහමනුසාසාමි අහං ධම්‌මං දෙසෙමි. යථානුසිට්‌ඨං තථා [යථානුසිට්‌ඨං (?)] පටිපජ්‌ජමානො, යස්‌සත්‌ථාය කුලපුත්‌තා සම්‌මදෙව අගාරස්‌මා අනගාරියං පබ්‌බජන්‌ති, තදනුත්‌තරං බ්‍රහ්‌මචරියපරියොසානං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරිස්‌සති සත්‌තවස්‌සානි. තිට්‌ඨන්‌තු, නිග්‍රොධ, සත්‌ත වස්‌සානි. එතු විඤ්‌ඤූ පුරිසො අසඨො අමායාවී උජුජාතිකො, අහමනුසාසාමි අහං ධම්‌මං දෙසෙමි. යථානුසිට්‌ඨං තථා පටිපජ්‌ජමානො, යස්‌සත්‌ථාය කුලපුත්‌තා සම්‌මදෙව අගාරස්‌මා අනගාරියං පබ්‌බජන්‌ති, තදනුත්‌තරං බ්‍රහ්‌මචරියපරියොසානං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරිස්‌සති ඡ වස්‌සානි. පඤ්‌ච වස්‌සානි… චත්‌තාරි වස්‌සානි… තීණි වස්‌සානි… ද්‌වෙ වස්‌සානි… එකං වස්‌සං. තිට්‌ඨතු, නිග්‍රොධ, එකං වස්‌සං. එතු විඤ්‌ඤූ පුරිසො අසඨො අමායාවී උජුජාතිකො අහමනුසාසාමි අහං ධම්‌මං දෙසෙමි. යථානුසිට්‌ඨං තථා පටිපජ්‌ජමානො, යස්‌සත්‌ථාය කුලපුත්‌තා සම්‌මදෙව අගාරස්‌මා අනගාරියං පබ්‌බජන්‌ති, තදනුත්‌තරං බ්‍රහ්‌මචරියපරියොසානං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරිස්‌සති සත්‌ත මාසානි. තිට්‌ඨන්‌තු, නිග්‍රොධ, සත්‌ත මාසානි… ඡ මාසානි… පඤ්‌ච මාසානි … චත්‌තාරි මාසානි… තීණි මාසානි… ද්‌වෙ මාසානි… එකං මාසං… අඩ්‌ඪමාසං. තිට්‌ඨතු, නිග්‍රොධ, අඩ්‌ඪමාසො. එතු විඤ්‌ඤූ පුරිසො අසඨො අමායාවී උජුජාතිකො, අහමනුසාසාමි අහං ධම්‌මං දෙසෙමි. යථානුසිට්‌ඨං තථා පටිපජ්‌ජමානො, යස්‌සත්‌ථාය කුලපුත්‌තා සම්‌මදෙව අගාරස්‌මා අනගාරියං පබ්‌බජන්‌ති, තදනුත්‌තරං බ්‍රහ්‌මචරියපරියොසානං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරිස්‌සති සත්‌තාහං’.
පරිබ්‌බාජකානං පජ්‌ඣායනං
78. ‘‘සියා ඛො පන තෙ, නිග්‍රොධ, එවමස්‌ස – ‘අන්‌තෙවාසිකම්‍යතා නො සමණො ගොතමො එවමාහා’ති. න ඛො පනෙතං, නිග්‍රොධ, එවං දට්‌ඨබ්‌බං. යො එව වො[තෙ (සී. ස්‍යා.)] ආචරියො, සො එව වො ආචරියො හොතු. සියා ඛො පන තෙ, නිග්‍රොධ, එවමස්‌ස – ‘උද්‌දෙසා නො චාවෙතුකාමො සමණො ගොතමො එවමාහා’ති. න ඛො පනෙතං, නිග්‍රොධ , එවං දට්‌ඨබ්‌බං. යො එව වො උද්‌දෙසො සො එව වො උද්‌දෙසො හොතු. සියා ඛො පන තෙ, නිග්‍රොධ, එවමස්‌ස – ‘ආජීවා නො චාවෙතුකාමො සමණො ගොතමො එවමාහා’ති. න ඛො පනෙතං, නිග්‍රොධ, එවං දට්‌ඨබ්‌බං. යො එව වො ආජීවො, සො එව වො ආජීවො හොතු. සියා ඛො පන තෙ, නිග්‍රොධ, එවමස්‌ස – ‘යෙ නො ධම්‌මා අකුසලා අකුසලසඞ්‌ඛාතා සාචරියකානං, තෙසු පතිට්‌ඨාපෙතුකාමො සමණො ගොතමො එවමාහා’ති. න ඛො පනෙතං, නිග්‍රොධ, එවං දට්‌ඨබ්‌බං. අකුසලා චෙව වො තෙ ධම්‌මා [වොධම්‌මා (ක.), තෙ ධම්‌මා (ස්‍යා.)] හොන්‌තු අකුසලසඞ්‌ඛාතා ච සාචරියකානං. සියා ඛො පන තෙ , නිග්‍රොධ, එවමස්‌ස – ‘යෙ නො ධම්‌මා කුසලා කුසලසඞ්‌ඛාතා සාචරියකානං, තෙහි විවෙචෙතුකාමො සමණො ගොතමො එවමාහා’ති. න ඛො පනෙතං, නිග්‍රොධ, එවං දට්‌ඨබ්‌බං. කුසලා චෙව වො තෙ ධම්‌මා හොන්‌තු කුසලසඞ්‌ඛාතා ච සාචරියකානං. ඉති ඛ්‌වාහං, නිග්‍රොධ, නෙව අන්‌තෙවාසිකම්‍යතා එවං වදාමි, නපි උද්‌දෙසා චාවෙතුකාමො එවං වදාමි, නපි ආජීවා චාවෙතුකාමො එවං වදාමි, නපි යෙ වො ධම්‌මා [නපි යෙ ඛො ධම්‌මා (සී.), නපි යෙ තෙ ධම්‌මා (ස්‍යා.), නපි යෙ ච වො ධම්‌මා (ක.)] අකුසලා අකුසලසඞ්‌ඛාතා සාචරියකානං, තෙසු පතිට්‌ඨාපෙතුකාමො එවං වදාමි, නපි යෙ වො ධම්‌මා [නපි යෙ ඛො ධම්‌මා (සී.), නපි යෙ තෙ ධම්‌මා (ස්‍යා.), නපි යෙ ච වො ධම්‌මා (ක.)] කුසලා කුසලසඞ්‌ඛාතා සාචරියකානං, තෙහි විවෙචෙතුකාමො එවං වදාමි. සන්‌ති ච ඛො, නිග්‍රොධ, අකුසලා ධම්‌මා අප්‌පහීනා සංකිලෙසිකා පොනොබ්‌භවිකා [පොනොභවිකා (ක.)] සදරා [සද්‌දරා (පී. ක.), සදරථා (ස්‍යා. ක.)] දුක්‌ඛවිපාකා ආයතිං ජාතිජරාමරණියා, යෙසාහං පහානාය ධම්‌මං දෙසෙමි. යථාපටිපන්‌නානං වො සංකිලෙසිකා ධම්‌මා පහීයිස්‌සන්‌ති, වොදානීයා ධම්‌මා අභිවඩ්‌ඪිස්‌සන්‌ති, පඤ්‌ඤාපාරිපූරිං වෙපුල්‌ලත්‌තඤ්‌ච දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරිස්‌සථා’’ති.
79. එවං වුත්‌තෙ, තෙ පරිබ්‌බාජකා තුණ්‌හීභූතා මඞ්‌කුභූතා පත්‌තක්‌ඛන්‌ධා අධොමුඛා පජ්‌ඣායන්‌තා අප්‌පටිභානා නිසීදිංසු යථා තං මාරෙන පරියුට්‌ඨිතචිත්‌තා. අථ ඛො භගවතො එතදහොසි – ‘‘සබ්‌බෙ පිමෙ මොඝපුරිසා ඵුට්‌ඨා පාපිමතා. යත්‍ර හි නාම එකස්‌සපි න එවං භවිස්‌සති – ‘හන්‌ද මයං අඤ්‌ඤාණත්‌ථම්‌පි සමණෙ ගොතමෙ බ්‍රහ්‌මචරියං චරාම, කිං කරිස්‌සති සත්‌තාහො’’’ති? අථ ඛො භගවා උදුම්‌බරිකාය පරිබ්‌බාජකාරාමෙ සීහනාදං නදිත්‌වා වෙහාසං අබ්‌භුග්‌ගන්‌ත්‌වා ගිජ්‌ඣකූටෙ පබ්‌බතෙ පච්‌චුපට්‌ඨාසි [පච්‌චුට්‌ඨාසි (සී. ස්‍යා. පී.)]. සන්‌ධානො පන ගහපති තාවදෙව රාජගහං පාවිසීති.
උදුම්‌බරිකසුත්‌තං නිට්‌ඨිතං දුතියං.
No comments:
Post a Comment